ນາຍົກ ເຄື່ອນໄຫວຢ້ຽມຢາມ ແລະເຮັດວຽກຢູ່ແຂວງຫົວພັນ

ວັນທີ 9 ກັນຍາຜ່ານມາ, ທ່ານ ສອນໄຊ ສີພັນດອນ ນາຍົກລັດຖະມົນຕີພ້ອມດ້ວຍຄະນະໄດ້ເຄື່ອນໄຫວຢ້ຽມຢາມ ແລະເຮັດວຽກເພື່ອຊຸກຍູ້ການຈັດຕັ້ງປະຕິບັດ 2 ວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະການແກ້ໄຂບັນຫາຢາເສບຕິດ, ຢູ່ພາຍໃນແຂວງຫົວພັນ.

ໂອກາດນີ້, ທ່ານ ສອນໄຊ ສີພັນດອນ ໄດ້ເນັ້ນໃຫ້ບັນດາພະແນກການ, ພາກສ່ວນທີ່ກ່ຽວຂ້ອງຂັ້ນແຂວງຕ້ອງພ້ອມກັນເອົາໃຈໃສ່ຈັດຕັ້ງປະຕິບັດ 2 ວາລະແຫ່ງຊາດໃຫ້ໄດ້, ໂດຍສະເພາະ ຕ້ອງສຸມໃສ່ສະກັດກັ້ນບັນຫາຢາເສບຕິດເຂດລຽບຊາຍແດນໃຫ້ມີຄວາມສະຫງົບໂດຍພື້ນຖານ, ຊຸກຍູ້ປະຊາຊົນສຸມໃສ່ການປູກຝັ່ງ-ລ້ຽງສັດໄກ, ຄ້າຂາຍບໍລິການຕ່າງໆຕາມທ່າແຮງທີ່ມີພາຍໃນແຂວງ,ຕາມຄວາມສາມາດຂອງແຕ່ລະຄອບຄົວໃຫ້ຫຼາຍກາຍເປັນສິນຄ້າສົ່ງອອກໃຫ້ຫຼາຍຂຶ້ນກວ່າເກົ່າ,ສຸມໃສ່ວຽກງານການເກັບລາຍຮັບ-ລາຍຈ່າຍພາຍໃນແຂວງໃຫ້ມີຄວາມສອດຄ່ອງເໝາະສົມ, ປັບປຸງ ແລະ ບໍລິການ ບັນດາແຫຼ່ງທ່ອງທ່ຽວທີ່ມີ ເພື່ອດຶງດູດນັກທ່ອງທ່ຽວທັງພາຍໃນ ແລະຕ່າງປະເທດເຂົ້າມາທ່ອງທ່ຽວໃຫ້ນັບມື້ຫຼາຍຂຶ້ນ,ແຂວງຕ້ອງສ້າງສິ່ງອໍານວຍຄວາມສະດວກໃຫ້ນັກລົງທຶນທີ່ຈະເຂົ້າມາລົງທຶນພາຍໃນແຂວງເພື່ອພັດທະນາພື້ນຖານໂຄງລ່າງໃຫ້ມີການພັດທະນາຂຶ້ນເລື້ອຍໆ, ເພື່ອເຮັດໃຫ້ຊິວິດການເປັນຢູ່ຂອງປະຊາຊົນບັນດາເຜົ່າໃຫ້ມີທ່າກ້າວຂະຫຍາຍຕົວກ້າວໄປເຖິງການຫຼຸດພົ້ນອອກຈາກຄວາມທຸກຍາກເທື່ອລະກ້າວ.

ທ່ານນາຍົກລັດຖະມົນຕີ ຍັງໄດ້ເຄື່ອນໄຫວຢ້ຽມຢາມການຜະລິດເຄຶ່ອງຫັດຖະກຳ ປະເພດເສື່ອ-ໝອນ-ຜ້ານັ່ງ ຂອງປະຊາຊົນຢູ່ບ້ານດ່ານ ເມືອງແອດ ແຂວງຫົວພັນ ທີ່ສາມາດນຳໃຊ້ທ່າແຮງພື້ນຖານຂອງຕົນສ້າງລາຍຮັບໃຫ້ຄອບຄົວ, ເຮັດໃຫ້ຄອບຄົວມີຢູ່ມີກິນຂຶ້ນເລື້ອຍໆ ທ່ຽວຊົມສະຖານທີ່ຮູບຈຳລອງປາ (ວັງປາສະຫງວນ) ຊຶ່ງເປັນເອກະລັກຂອງເມືອງແອດອີກດ້ວຍ.

แชร์