ຄອບຄົວຜູ້ປະສົບເຄາະຮ້າຍຈາກອັກຄີໄພ ຢູ່ບ້ານດາກໂດມ ໄດ້ຮັບເຄື່ອງຊ່ວຍເຫລືອ

ໃນວັນທີ 10 ກັນຍາ 2023 ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ພ້ອມຄະນະນໍາຂອງແຂວງ, ເມືອງດາກຈຶງ ແລະບໍລິສັດ ໄດ້ນໍາເອົາເຄື່ອງຊ່ວຍເຫລືອໄປມອບໃຫ້ຄອບຄົວທ່ານ ແກ້ວຊະວົງ, ທ່ານ ລິດ, ທ່ານ ນາງ ລີສອນ, ທ່ານ ແສງນີວົງ, ທ່ານ ວິລະກອນ ປະຊາຊົນບ້ານດາກໂດມ ທີ່ປະສົບເຄາະຮ້າຍຈາກອັກຄີໄພ (ໄຟໄໝ້ເຮືອນ) ໂດຍມີອົງການປົກຄອງບ້ານ ແລະພາກສ່ວນກ່ຽວຂ້ອງເຂົ້າຮ່ວມ.

ເຄື່ອງຊ່ວຍເຫລືອທີ່ນໍາມາມອບໃນຄັ້ງນີ້, ປະກອບມີ: ຜ້າຫົ່ມ, ເສື່ອ-ສາດ, ປ່ອງປາ, ໝີ່ໄວໆ, ເຄື່ອງໃຊ້ຄົວເຮືອນ, ເຂົ້າສານ, ສັງກະສີ, ເຫລັກຕະປູ, ນໍ້າດື່ມ, ເກີບ, ເຄື່ອງນຸ່ງ-ຫົ່ມ ແລະ ອື່ນໆ, ລວມມູນຄ່າ 40 ລ້ານກວ່າກີບ ແລະ ເງິນສົດ 20 ລ້ານກວ່າກີບ. ເຊິ່ງເຫດການໄຟໄໝ້ເຮືອນ ແມ່ນເກີດຂຶ້ນໃນວັນທີ 8 ກັນຍາ 2023 ຜ່ານມາ, ສາເຫດເນື່ອງຈາກໄຟຟ້າພະລັງນໍ້າຂະໜາດນ້ອຍຂອງຄອບຄົວ ຫລືໄຟຟ້າໄດນາໂມລັດວົງຈອນ ເຮັດໃຫ້ເຄື່ອງໃຊ້ຄົວເຮືອນ ແລະພາຫະນະຮັບໃຊ້ພາຍໃນເຮືອນເສຍຫາຍຄິດເປັນມູນຄ່າທັງໝົດ 1 ຕື້ກວ່າກີບ.

ໂອກາດນີ້, ທ່ານ ເຫລັກໄຫລ ສີວິໄລ ກໍໄດ້ສະແດງຄວາມເສຍໃຈຕໍ່ເຫດການທີ່ເກີດຂຶ້ນໃນຄັ້ງນີ້ ແລະຮຽກຮ້ອງໃຫ້ປະຊາຊົນມີສະຕິ, ມີແນວຄິດອຸ່ນອ່ຽງທຸ່ນທ່ຽງເຊື່ອໝັ້ນຕໍ່ການນໍາພາຂອງພັກ ແລະລັດກໍຄືຄະນະພັກ-ອົງການປົກຄອງແຂວງ, ເມືອງ ແລະບ້ານຊຶ່ງເວລາໃດກໍເປັນຫ່ວງເປັນໄຍຕໍ່ຊີວິດການເປັນຢູ່ຂອງປະຊາຊົນໂດຍສະເພາະແມ່ນຄອບຄົວທີ່ຖືກເຄາະຮ້າຍໄຟໄໝ້ເຮືອນໃນຄັ້ງນີ້ຈຶ່ງໄດ້ປຸກລະດົມ, ຂົນຂວາຍບັນດາຂະແໜງການ, ບັນດາບໍລິສັດ-ລັດວິສາຫະກິດ ແລະບຸກຄົນ-ນິຕິບຸກຄົນ ນໍາເອົ່າເຄື່ອງຊ່ວຍເຫລືອ-ວັດຖຸປັດໄຈ ມາມອບໃຫ້ເພື່ອເປັນການບັນເທົາທຸກ ແລະນໍາໄປຟື້ນຟູໃຫ້ກັບຄືນສູ່ສະພາບປົກກະຕິໂດຍໄວ.
ຂ່າວ: ພຸດທະສອນ

แชร์