ລາວ-ຈີນ-ໄທ ຈັດກອງປະຊຸມຈຸດປະສານງານພາສີ 3 ຝ່າຍ

ສປປ ລາວ ສປ ຈີນ ແລະ ຣາຊະອານາຈັກໄທ ຈັດກອງປະຊຸມຈຸດປະສານງານພາສີ 3 ຝ່າຍ ເພື່ອອໍານວຍຄວາມສະດວກການຄ້າຕາມເສັ້ນທາງບາງກອກ-ຄຸນໝິງ ແລະ ການຮ່ວມມືຂອງແມ່ນໍ້າຂອງ-ແມ່ນໍ້າລ້ານຊ້າງຄັ້ງທີ IX ຈັດຂຶ້ນໃນລະຫວ່າງວັນທີ 11-13 ກັນຍາ 2023 ທີ່ໂຮງແຮມລາວພລາຊາ ນະຄອນຫຼວງວຽງຈັນ ເປັນປະທານຮ່ວມຂອງ ທ່ານ ພຸດທະນິກອນ ເຄນນະວົງ ຫົວໜ້າພາສີປະຈຳນະຄອນຫຼວງວຽງຈັນ ທ່ານ ຈິ້ນ ຢານຢົງ ຫົວໜ້າພາສີ ຄູໝິງ ກະຊວງພາສີ ສປຈີນ ແລະທ່ານ ບັນທູນ ອູ່ຈະເລີນ ຜູ້ຊ່ຽວ ຊານດ້ານການຄວບຄຸມພາສີພື້ນທີ່ພາກ 3 ກົມພາສີໄທ ມີຂະແໜງການພາສີ 3 ປະເທດ ແມ່ນໍ້າຂອງ-ແມ່ນໍ້າລ້ານຊ້າງເຂົ້າຮ່ວມ.

ໂອກາດນີ້ທ່ານ ພູເຂົາຄຳ ວັນນະວົງໄຊ ຫົວໜ້າກົມພາສີກະຊວງການເງິນກ່າວເປີດກອງປະຊຸມຄັ້ງນີ້ວ່າ: ກອງປະຊຸມຄັ້ງນີ້ແມ່ນໜຶ່ງໃນກົນໄກ 2 ຝ່າຍ ຂອງການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ທີ່ໄດ້ຮັບການສ້າງຕັ້ງຂຶ້ນມາເປັນເວລາ 10 ກ່າວປີ ເຊິ່ງຈຸດ ປະສົງຂອງການສ້າງຕັ້ງຂອບການຮ່ວມມືດັ່ງກ່າວເພື່ອການຮ່ວມມືອຳນວຍຄວາມສະດວກດ້ານການຄ້າຕາມແລວເສັ້ນທາງບາງກອກ-ຄຸນໝິງ ແລະແມ່ນໍ້າຂອງ-ແມ່ ນໍ້າລ້ານຊ້າງ.

ກອງປະຊຸມຄັ້ງນີ້ໄດ້ທົບທວນຄືນການຈັດຕັ້ງປະຕິບັດເນື້ອໃນຈິດໃຈຂອງກອງປະຊຸມ 3 ຝ່າຍຄັ້ງທີ 8 ທີ່ຈັດຂຶ້ນຢູ່ຕາລີ ສປ ຈີນ ໃນປີ 2019 ຜ່ານມາພ້ອມທັງວາງແຜນການຮ່ວມມືໃນອານະຄົດເນື່ອງຈາກການຮ່ວມມືດັ່ງກ່າວມີຄວາມສຳຄັນຢ່າງຍິ່ງໃນຂອບການຮ່ວມມືດ້ານພາສີທີ່ຈະປະກອບສ່ວນເຂົ້າໃນການອຳນວຍຄວາມສະດວກດ້ານການຄ້າ ແລະຄວາມປອດໄພຂອງຕ່ອງໂສ້ການສະໜອງການຄ້າສາກົນລະ ຫວ່າງ 3 ປະເທດພວກເຮົາໃຫ້ມີຄວາມເຂັ້ມແຂງຍິ່ງຂຶ້ນ.

ກອງປະຊຸມຄັ້ງນີ້ຍັງເປັນອົງປະກອບສຳຄັນໃນການຈັດຕັ້ງປະຕິບັດຖະແຫຼງການຮ່ວມຂອງປະເທດແມ່ນໍ້າຂອງ-ແມ່ນໍ້າລ້ານຊ້າງ ກ່ຽວກັບການລົງເລິກການຮ່ວມມືດ້ານພາສີເພື່ອຮັກສາຄວາມປອດໄພການຄ້າ ແລະອຳນວຍຄວາມສະດວກໃຫ້ແກ່ການແຈ້ງພາສີໃນຂອບການຮ່ວມມືແມ່ນໍ້າຂອງ-ແມ່ລ້ານຊ້າງ ທີ່ໄດ້ຮັບຮອງເອົາໃນກອງປະຊຸມລັດຖະມົນຕີການຕ່າງປະເທດແມ່ນໍ້າຂອງ-ລ້ານຊ້າງ ຄັ້ງທີ 7 ໃນວັນທີ 4 ກໍລະກົດ 2022 ຜ່ານມາທີ່ນະຄອນບາການປະເທດມຽນມາພ້ອມນີ້ຍັງເປັນໂອກາດອັນດີເພື່ອໃຫ້ຂະແໜງພາສີ 3 ປະເທດ ໄດ້ເພີ່ມທະວີການຮ່ວມມືໃນວຽກງານພາສີ ຮຽນຮູ້ບົດຮຽນທີ່ດີເດັ່ນຂອງກັນ ແລະກັນແລກປ່ຽນຄວາມຄິດເຫັນ ແລະປະສົບ ການເພື່ອເພີ່ມທະວີການບັງຄັບໃຊ້ກົດໝາຍພາສີຢູ່ດ່ານຊາຍແດນໃຫ້ມີປະສິດທິຜົນເພື່ອເປົ້າໝາຍສ້າງກາລະໂອກາດ ແລະການອຳນວຍຄວາມສະດວກທາງການຄ້າແລະຜົນປະໂຫຍດຕົວຈິງໃຫ້ແກ່ທຸລະກິດ ແລະການຄ້າ ລະຫວ່າງ 3 ປະເທດ ພ້ອມກັນສ້າງຊຸກຍູ້ການພັດທະນາແບບຍືນຍົງຂອງການພົວພັນດ້ານເສດຖະກິດກໍຄື ການຮ່ວມມືດ້ານພາສີໃນຂອບແມ່ນໍ້າຂອງ-ລ້ານຊ້າງໃຫ້ມີຜົນສຳເລັດເທື່ອລະກ້າວ.
ທີມາ: ວຽງຈັນໃໝ່

แชร์