ເຊັນສັນຍາການພັດທະນາ ແລະຄຸ້ມຄອງບູລະນະສວນສາທາລະນາທີ່ນະຄອນປາກເຊ

ໃນວັນທີ 9 ກັນຍາ​ 2023​ ໄດ້ມີພິທີເຊັນສັນຍາສຳປະທານ (ຊີເອ)​ ຫຼື​ Concestion Agreement (CA) ໂຄງການພັດທະນາຈັດສັນຄຸ້ມຄອງ​ ແລະ​ບູລະນະສວນສາທາລະນະແຄມຂອງ ຢູ່ບ້ານປາກເຊ, ບ້ານພັດທະນາໂພນກຸງ ນະຄອນປາກເຊ ແລະບ້ານຫ້ວຍເພັກ ເມືອງໂພນທອງ ແຂວງຈຳປາສັກ ໃນເນື້ອທີ່ຈຳນວນ 8,2 ເຮັກຕາ ລະຫວ່າງ​ ອົງການປົກຄອງແຂວງຈຳປາສັກ​ ຕາງໜ້າໂດຍພະແນກແຜນການ ແລະ​ການລົງທຶນ​ແຂວງ​ ກັບ​ ບໍລິສັດ ຈຳປາຄຳ ກໍ່ສ້າງ ຈຳກັດ ໄດ້ຈັດຂື້ນທີ່ໂຮງແຮມຈໍາປາສັກແກຣນ ໂດຍການໃຫ້ກຽດເຂົ້າຮ່ວມຂອງ​ ພົນເອກ ວິໄລ​ ຫຼ້າຄໍາຟອງ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ທ່ານ​ ປອ.​ວິໄລວົງ​ ບຸດດາຄໍາ​ ກໍາມະການ​ສູນກາງ​ພັກ​ ເລຂາ​ພັກ​ແຂວງ​ ເຈົ້າແຂວງຈໍາປາສັກ​ ທ່ານ​ ສາຍທອງ​ ໄຊຍະວົງ​ ຮອງເລຂາພັກແຂວງ​ ປະທານສະພາ​ປະຊາຊົນ​ແຂວງ,​ ທ່ານ​ ປອ.​ສຸກສະຫວັນ​ ວິໄລວົງ​ ຄະນະປະຈໍາ​ພັກ​ແຂວງ ຫົວໜ້າ​ພະແນກແຜນການ​ ແລະ​ການລົງທຶນ​ແຂວງ,​ ທ່ານ​ ບົວລີ​ ເພັດສົງຄາມ​ ເຈົ້າ​ນະຄອນປາກເຊ,​ ທ່ານ​ ສຸພາບ​ ທໍາມະຮັກສາ​ ເຈົ້າເມືອງໆໂພນທອງ​ ທ່ານ​ ຄໍາພຸກ ຈັນທະບັນດິດ ຮອງຫົວໜ້າ​ພະແນກໂຍທາທິການ​ ແລະ​ຂົນສົ່ງແຂວງ ທ່ານ​ ໄພທູນ​ ປະທຸມທອງ ປະທານກຸ່ມບໍລິສັດ ຈຳປາຄຳ ກໍ່ສ້າງ ຈຳກັດຜູ້ດຽວມີການນໍາພະແນກການກົມກອງທີ່ກ່ຽວຂ້ອງອ້ອມຂ້າງແຂວງ,​ ການນໍາ​ຫ້ອງວ່າການແຂວງ,​ ຂະແໜງ​ການ​ ແລະ​ພະນັກງານ​ວິຊາການທີ່ກ່ຽວຂ້ອງເຂົ້າຮ່ວມເປັນສັກຂີພະຍານ.

ການເຊັນສັນຍາສໍາປະທານໃນຄັ້ງນີ້ ແມ່ນ​ປະຕິບັດຕາມ​ຂໍ້ຕົກລົງຂອງ​ເຈົ້າແຂວງຈຳປາສັກ​ ເລກທີ​ 1079/ຈຂ.ຈສ, ລົງວັນທີ 8​ ກັນຍາ 2023​ ວ່າດ້ວຍການມອບສິດໃຫ້ພະແນກແຜນການ ແລະການລົງທຶນແຂວງ ຕາງໜ້າອົງການປົກຄອງແຂວງ ເຊັນສັນຍາສຳປະທານໂຄງການ​ດັ່ງກ່າວ​ເຊິ່ງໄດ້ສຶກສາສຳຫຼວດຄວາມເປັນໄປໄດ້ຂອງໂຄງການ ແຕ່ທ້າຍເດືອນທັນວາ 2018; ກິດຈະກໍາຕົ້ນຕໍຂອງໂຄງການ​ປະກອບມີຕະຫຼາດກາງຄືນ, ຕະຫຼາດຫ້ອງແຖວຖາວອນ,​ ຮ້ານກາເຟ,​ ຮ້ານອາຫານ, ຮ້ານຂາຍເຄື່ອງທີ່ລະນຶກ,​ ໃນນັ້ນ​ຕະຫຼາດກາງຄືນ, ສວນສະໜຸກເຊິ່ງການອອກແບບໃຫ້ມີຄວາມທັນສະໄໝ,​ ສາມາດຮອງຮັບຜູ້ປະກອບການ​ ຊື້​ - ຂາຍ, ສາມາດຈັດຂາຍຍ່ອຍ ຂະຫນາດນ້ອຍຕ່າງໆໄດ້ຕາມເໝາະສົມ, ໃຫ້ບໍລິການຊື້​ - ຂາຍ ແຕ່ເວລາ 18 ໂມງ ຫາ 22 ໂມງ, ຈາກນັ້ນ ຕ້ອງໄດ້ມີການເກັບມ້ຽນໃຫ້ມີຄວາມສະອາດ ເພື່ອໃຫ້ສາມາດບໍລິການຜູ້ຊື້, ນັກທ່ອງທ່ຽວ ໂດຍເນັ້ນສິນຄ້າທີ່ຜະລິດພາຍໃນແຂວງ​ ເພື່ອເປັນການສົ່ງເສີມການຜະລິດຂອງປະຊາຊົນ. ສໍາລັບ​ຮ້ານກາເຟ,​ ຮ້ານອາຫານ, ຮ້ານຂາຍເຄື່ອງທີ່ລະນຶກ​ ເປັນຫ້ອງຖາວອນຈຸດໃຫ້ບໍລິການ​ຂາຍກາເຟ, ນໍ້າໝາກໄມ້, ຂະໜົມ ແລະ ເຄື່ອງທີ່ລະນຶກທີ່ເປັນເອກະລັກຂອງຊາວແຂວງຈຳປາສັກ ແຕ່ຫ້າມຂາຍເຄື່ອງດື່ມທີ່ມີທາດມຶນເມົາ ຕາມຂອບເຂດຈຸດທີ່ກໍານົດໄວ້.​ ນອກນີ້​ ຕ້ອງເອົາໃຈໃສ່ປົກປັກຮັກສາ ແລະຄຸ້ມຄອງເຂດໜ້ານໍ້າ ໃນຈຸດເຂດສໍາປະທານ (50 ແມັດ ຫ່າງຈາກຕາຝັ່ງ) ເພື່ອຮັບປະກັນໄດ້ ຄວາມສະອາດ,​ ຜົນກະທົບຕໍ່ສັງຄົມ -​ ສິ່ງແວດລ້ອມ.​ ໄລຍະເວລາສຳປະທານ​ ເລີ່ມແຕ່ວັນທີຈັດຕັ້ງປະຕິບັດສັນຍາສໍາປະທານ ເປັນໄລຍະເວລາ 30 ປີ, ສາມາດຕໍ່ອາຍຸການສຳປະທານໄດ້ບົນພື້ນຖານເງື່ອນໄຂທັງສອງຝ່າຍເຫັນດີເອກະພາບຮ່ວມກັນ​ ແລະຕາມລະບຽບກົດຫມາຍຂອງ ສປປ ລາວ​ ກໍານົດໄວ້.​ ໂຄງການດັ່ງກ່າວ ລົງທຶນທັງໝົດ​ 55​ ຕື້ກີບກີບ ເຊິ່ງເປັນທຶນຂອງຜູ້ສໍາປະທານ 100%.

ລົງນາມໂດຍ ທ່ານ​ ປອ.​ສຸກສະຫວັນ​ ວິໄລວົງ​ ​ ຫົວໜ້າ​ພະແນກແຜນການ​ ແລະ​ ການລົງທຶນ​ແຂວງ, ກຸ່ມບໍລິສັດ ຈໍາປາຄໍາ ກໍ່ສ້າງ​ ຈໍາກັດ​ຜູ້ດຽວ ລົງນາມໂດຍ​ ທ່ານ​ ໄພທູນ​ ປະທຸມທອງ ປະທານກຸ່ມບໍລິສັດ​ ຈໍາປາ​ຄໍາ​ ກໍ່ສ້າງ​ ຈໍາກັດຜູ້ດຽວ.​ ຝ່າຍອົງການປົກຄອງແຂວງ ລົງນາມເປັນພະຍານ ມີທ່ານ​ ບົວລີ​ ເພັດສົງຄາມ​ ​ເຈົ້າ​ນະຄອນປາກເຊ,​ ທ່ານ​ ສຸພາບ​ ທໍາມະຮັກສາ ເຈົ້າເມືອງໆໂພນທອງ,​ ທ່ານ​ ຄໍາພຸກ ຈັນທະບັນດີດ ຮອງຫົວໜ້າ​ພະແນກໂຍທາທິການ​ ແລະ​ ຂົນສົ່ງແຂວງ.​ ຝ່າຍກຸ່ມບໍສັດ ຈໍາປາ​ຄໍາ​ ກໍ່ສ້າງ​ ຈໍາກັດຜູ້ດຽວ​ ລົງນາມເປັນພະຍານມີ​ ທ່ານ ບຸນເພັງ​ ພາຈະເລີນສຸກ ຜູ້ຈັດການຝ່າຍ​ ກຸ່ມບໍລິສັດ​ ຈໍາປາຄໍາ​ ກໍ່ສ້າງ​ ຈຳກັດ​ຜູ້ດຽວ.​
ໂດຍ: ໂພທິລາດ

แชร์