ນາຍົກລັດຖະມົນຕີ ສືບຕໍ່ພົບປະຜູ້ນຳ ສ ເກົາຫຼີ ເພື່ອພົວພັນມິດຕະພາບທີ່ດີ ແລະການຮ່ວມມືກັນໃນອະນາຄົດ

ເນື່ອງໃນໂອກາດກອງປະຊຸມສຸດຍອດອາຊຽນ ຄັ້ງທີ 43 ຜ່ານມາ, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ສືບຕໍ່ພົບປະສອງຝ່າຍກັບຜູ້ນຳປະເທດເພື່ອນມິດ ກໍຄື ສ ເກົາຫລີ ທ່ານ ຢຸນ ຊອກ ຢອນ(Yoon Suk Yeol) ປະທານາທິບໍດີ ແຫ່ງ ສາທາລະນະລັດ ເກົາຫລີ ໃນວັນທີ 7 ກັນຍາ 2023 ເພື່ອທົບທວນຄືນການພົວພັນຮ່ວມມືໃນໄລຍະຜ່ານມາ ແລະ ປຶກສາຫາລືກ່ຽວກັບແຜນການຮ່ວມມືກັນໃນຕໍ່ຫນ້າ ເຊິ່ງເປັນການພົບປະຄັ້ງທຳອິດ ແລະເພື່ອສືບຕໍ່ເສີມຂະຫຍາຍການພົວພັນຮ່ວມມື ລາວ-ສ ເກົາຫລີ ໃຫ້ມີບາດກ້າວອັນໃໝ່ໃນອະນາຄົດ.
 
ໂອກາດນີ້, ທັງສອງຝ່າຍ ໄດ້ຕີລາຄາສູງຕໍ່ການພົວພັນມິດຕະພາບທີ່ດີ ແລະ ການຮ່ວມມືທີ່ເຕັມໄປດ້ວຍໝາກຜົນ ຕະຫລອດໄລຍະ 28 ປີ ຜ່ານມາ, ຝ່າຍ ສ ເກົາຫລີ ຍິນດີທີ່ຈະສືບຕໍ່ໃຫ້ ການຊ່ວຍເຫລືອສະໜອງເງິນກູ້ຜ່ານກອງທຶນຮ່ວມມືພັດທະນາເສດຖະກິດ (EDCF) ຂອງ ສ ເກົາຫລີ ໃຫ້ແກ່ ສປປ ລາວ ໂດຍສະເພາະການພັດທະນາໂຄງລ່າງພື້ນຖານ, ສາທາລະນະສຸກ, ວຽກງານສຶກສາ, ກະສິກຳ ແລະອື່ນໆ.
 
ພ້ອມນີ້, ຝ່າຍ ເກົາຫລີ ເຫັນດີທີ່ຈະສືບຕໍ່ ແລະເພີ່ມໂຕເລກນໍາເຂົ້າແຮງງານລາວ ເພື່ອໄປເຮັດວຽກຢູ່ ສ ເກົາຫລີ ໃຫ້ນັບມື້ນັບຫລາຍຂຶ້ນ, ພ້ອມທັງຈະໃຫ້ການຮ່ວມມື ແລະສະໜັບສະໜູນເຊິ່ງກັນ ແລະກັນ ໃນຂອບການຮ່ວມມືຫລາຍຝ່າຍເປັນຕົ້ນການຮ່ວມມືໃນຂອບ ອາຊຽນ-ສ ເກົາຫລີ, ແມ່ນໍ້າຂອງ-ສ ເກົາຫລີ, ອົງການ ສປຊ ແລະອື່ນໆ.
ທີ່ມາ : ຂປລ

แชร์