ລັດຖະບານລາວ ລົງຢ້ຽມຢາມໂຄງການລະດັບໂລກຂອງບໍລິສັດ ພູເບ້ຍ ມາຍນິງ

ນັບແຕ່ວັນທີ 4 ຫາ 6 ກັນຍາຜ່ານມາ, ບໍລິສັດ ພູເບ້ຍ ມາຍນິງ ໄດ້ຕ້ອນຮັບຄະນະຕາງໜ້າລັດຖະບານຈາກກົມຄຸ້ມຄອງບໍ່ແຮ່, ກະຊວງພະລັງງານ ແລະບໍ່ແຮ່, ກົມສິ່ງແວດລ້ອມ ແລະກົມຊັບພະຍາກອນນໍ້າ, ກະຊວງຊັບພະຍາກອນທໍາມະຊາດ ແລະສິ່ງແວດລ້ອມ, ກົມສົ່ງເສີມການລົງທຶນ, ກະຊວງແຜນການ ແລະການລົງທຶນ ແລະ ພະແນກພະລັງງານ ແລະບໍ່ແຮ່ແຂວງໄຊສົມບູນ ລວມທັງໝົດຈໍານວນ 14 ທ່ານລົງຢ້ຽມຢາມການດໍາເນີນງານຂອງບໍລິສັດ ພູເບ້ຍ ມາຍນິງ ຢູ່ແຂວງໄຊສົມບູນ.

ຢູ່ໂຄງການຂຸດຄົ້ນ-ປຸງແຕ່ງ ຄໍາ-ເງິນ ບ້ານຫ້ວຍຊາຍ, ຄະນະດັ່ງກ່າວໄດ້ຢ້ຽມຊົມໂຮງງານຜະລິດ-ປຸງແຕ່ງ, ບໍ່ ແລະໂຄງການຂະຫຍາຍບໍ່ຂຸດຄົ້ນບ້ານຫ້ວຍຊາຍ. ການລົງຢ້ຽມຢາມໂຄງການບ້ານຫ້ວຍຊາຍໃນຄັ້ງນີ້ ແມ່ນຊ່ວຍໃຫ້ຄະນະດັ່ງກ່າວໄດ້ເຫັນຄວາມເປັນເລີດດ້ານການດໍາເນີນງານຂອງພວກເຮົາ, ລວມມີການນໍາໃຊ້ ແລະ ຄຸ້ມຄອງສານໄຊຍະນາຍຢູ່ພື້ນທີ່ການຜະລິດຂອງໂຄງການບ້ານຫ້ວຍຊາຍ ແລະໂຄງການຕ່າງໆທີ່ພວກເຮົາກໍາລັງດໍາເນີນງານເພື່ອຕໍ່ອາຍຸຂອງບໍ່ຂຸດຄົ້ນອອກໄປຈົນເຖິງປີ 2030.

ໃນໄລຍະການລົງຢ້ຽມຢາມຂອງພວກເຂົາຢູ່ໂຄງການຂຸດຄົ້ນ-ປຸງແຕ່ງ ທອງ-ຄໍາ ພູຄໍາ, ຄະນະດັ່ງກ່າວ ໄດ້ເຂົ້າຮ່ວມປະຊຸມຖາມ-ຕອບ ກັບພະນັກງານຄົນລາວຂອງພວກເຮົາ. ຕາງໜ້າລັດຖະບານ ແມ່ນມີຄວາມເຂົ້າໃຈຫຼາຍຂຶ້ນກ່ຽວກັບກິດຈະກໍາ ແລະ ແຜນລິເລີ້ມຕ່າງໆທາງດ້ານທຸລະກິດຂອງບໍລິສັດ ພູເບ້ຍ ມາຍນິງ ຊຶ່ງລວມມີ ການຜະລິດ, ສຸຂະພາບ ແລະ ຄວາມປອດໄພທີ່ປະຕິບັດໄດ້ຢ່າງດີເລີດລະດັບສາກົນ, ການພັດທະນາຊຸມຊົນ, ການຝຶກອົບຮົມ ແລະການພັດທະນາບຸກຄະລາກອນ ແລະແຜນງານຄຸ້ມຄອງດ້ານສິ່ງແວດລ້ອມ.

ນອກຈາກນັ້ນ, ພວກເຮົາໄດ້ສະແດງໃຫ້ເຫັນການປະກອບສ່ວນໂດຍກົງທາງດ້ານການເງິນໃຫ້ແກ່ລັດຖະບານ, ຜົນປະໂຫຍດທາງອ້ອມດ້ານເສດຖະກິດຈໍານວນມະຫາສານ, ແລະໂຄງການປັບປຸງຊີວິດການເປັນຢູ່ແບບຍືນຍົງ ແລະໂຄງການພັດທະນາຊຸມຊົນເພື່ອຊ່ວຍປະຊາຊົນລາວ. ຄະນະດັ່ງກ່າວຍັງໄດ້ເຂົ້າໄປຢ້ຽມຊົມຫ້ອງຄວບຄຸມບໍ່ຂຸດຄົ້ນດ້ວຍລະບົບຄອມພິວເຕີ, ໂຮງງານຜະລິດ-ປຸງແຕ່ງ, ບໍ່ເປີດໜ້າດິນ ແລະອ່າງເກັບຫາງແຮ່ຂອງໂຄງການພູຄໍາ ແລະເຂດຟື້ນຟູຕ່າງໆຂອງໂຄງການ.
ຕາງໜ້າບໍລິສັດ ແພນອອສ໌, ຊຶ່ງເປັນບໍລິສັດແມ່ຂອງບໍລິສັດ ພູເບ້ຍ ມາຍນິງ, ທ່ານ ດາລິງ ເຊັງ, ຜູ້ອໍານວຍການໃຫຍ່ ແລະ ປະທານບໍລິຫານ ໄດ້ເວົ້າເຖິງວິໄສທັດຂອງບໍລິສັດ ພູເບ້ຍ ມາຍນິງ ສໍາລັບການເຕີບໂຕຂອງປະເທດລາວ ແລະແຜນງານຕ່າງໆດ້ານການພັດທະນາແບບຍືນຍົງ.

ທ່ານ ດາລິງ ເຊັງ ກ່າວວ່າ “ບໍລິສັດພູເບ້ຍ ມາຍນິງ ແລະ ບໍລິສັດ ແພນອອສ໌ ມີເປົ້າໝາຍສ້າງການເຕີບໂຕຂອງປະເທດລາວໃນໄລຍະຍາວ ແລະເຮັດວຽກຮ່ວມຂັ້ນຕ່າງໆທີ່ແຕກຕ່າງກັນຂອງລັດຖະບານເພື່ອບັນລຸໝາກຜົນທີ່ດີສໍາລັບຄວາມຕໍ່ເນື່ອງຂອງທຸລະກິດ. ການລົງຢ້ຽມຢາມດັ່ງກ່າວນີ້ ແມ່ນເປັນຊ່ອງທາງທີ່ສໍາຄັນສໍາລັບພວກເຮົາທີ່ຈະໄດ້ສະແດງໃຫ້ເຫັນແຜນງານຕ່າງໆທີ່ເປັນເລີດດ້ານການດໍາເນີນງານລະດັບໂລກ ໃນລາວ”

ທ່ານຈັນເພັງ ບຸນນະຜົນ, ປະທານບໍລິສັດ ພູເບ້ຍ ມາຍນິງ ໄດ້ໃຫ້ຮູ້ຕື່ມອີກວ່າ, “ເປັນເວລາຫຼາຍກວ່າທົດສະວັດ, ບໍລິສັດໄດ້ມຸ້ງໝັ້ນສ້າງຄວາມເຂົ້າໃຈຮອບດ້ານກ່ຽວກັບວິທີການປະຕິບັດດ້ານການຂຸດຄົ້ນແບບຍືນຍົງ ແລະແບ່ງປັນຄວາມຮູ້ຂອງພວກເຮົາກັບລັດຖະບານ ແລະສັງຄົມ. ຄະນະຢ້ຽມຢາມຂອງຂອງພວກເຮົາທຸກຄົນຍັງສາມາດຮຽນຮູ້ປະຫວັດ, ກິດຈະກໍາ ແລະວິໄສທັດໄລຍະຍາວຂອງພວກເຮົາວ່າພວກເຮົາຈະສືບຕໍ່ປະກອບສ່ວນເຂົ້າໃນການພັດທະນາປະເທດລາວໄດ້ຄືແນວໃດ.”

แชร์