ທ່ານນາງ ນະຄອນສີ ມະໂນທໍາ ໄດ້ກ່າວເປີດຊຸດຝຶກອົບຮົມວ່າ: ມາດ​ຕະ​ຖານ​ສາ​ກົນ​ດ້ານ​ການ​ລາຍ​ງານ​ການ​ເງິນ IFRS ເປັນ​ວຽກ​ງານ​ໜຶ່ງ​ທີ່​ມີ​ຄວາມ​ສຳ​ຄັນ​ໃນ​ການ​​ຮັກ​ສາ​ສະ​ຖຽນ​ລະ​ພາບ​ທາງ​ດ້ານ​ການ​ເງິນໂດຍ​ສະ​ເພາະ​ແມ່ນ​ຕໍ່​ກັບ​ການ​ຄຸ້ມ​ຄອງ​ຄວາມ​ໝັ້ນ​ຄົງ ແລະ ການ​ບໍ​ລິ​ຫານ​ທຸ​ລະ​ກິດຂອງ​​ສະຖາ​ບັນ​ການ​ເງິນ ທີ່ບໍ່ແມ່ນທະນາຄານ ​ແລະ ເພື່ອປະຕິບັດຕາມກົດໝາຍວ່າດ້ວຍການບັນຊີ (ສະບັບປັບປຸງ) ມາດຕາ 14, ສະບັບເລກທີ 47/ສພຊ, ລົງວັນທີ 26 ທັນວາ 2013 ທີ່ກຳນົດໃຫ້ວິສາ​ຫະກິດ​ຮັບ​ໃຊ້​ຜົນ​ປະ​ໂຫຍ​ດສາ​ທາ​ລະນະ (PIE) ຊຶ່ງລວມມີທະນາຄານ ແລະ ສະຖາບັນການເງິນອື່ນ ທີ່ຢູ່ພາຍໃຕ້ການຄຸ້ມຄອງຂອງທະນາຄານແຫ່ງ ສປປ ລາວ ປະຕິບັດມາດຕະຖານສາກົນດ້ານການລາຍງານການເງິນ (IFRS). ຊຶ່ງໃນຈັດຕັ້ງປະຕິບັດມາດ​ຕະ​ຖານ​ດັ່ງ​ກ່າວເມື່ອ​ທຽບ​ກັບ​ສະ​ພາບ​ຄວາມ​ເປັນ​ຈິງ​ທາງ​ດ້ານ​ເງື່ອນ​ໄຂ​ຄວາມ​ພ້ອມ​ຂອງ​ສະ​ຖາ​ບັນ​ການ​ເງິນ​ທີ່ບໍ່ແມ່ນທະນາຄານແມ່ນ​ຍັງມີ​ຄວາມ​ທ້າ​ທາຍຫຼາຍ​ປະ​ການ​ໂດຍ​ສະ​ເພາະ ຄວາມ​ຮູ້​ຄວາມ​ສາ​ມາດ​ຂອງບຸກ​ຄະ​ລາ​ກອນໃນ​ການ​ຄຸ້ມ​ຄອງ​ກໍ​ຄື​ໃນ​ການ​ຈັດ​ຕັ້ງ​ປະ​ຕິ​ບັດ​ຕົວ​ຈິງ​ຍັງ​ຈຳ​ກັດ, ​ລະ​ບົບ​ຂໍ້​ມູນ​ຂ່າວ​ສານ​ຍັງ​ບໍ່​ທັນ​ສາ​ມາດ​ຮອງ​ຮັບ ແລະຜົນ​ກະ​ທົບທີ່​ຈະ​ມີຕໍ່​ຖາ​ນະ​ການ​ເງິນໃນໄລຍະຂ້າມຜ່ານ.

 

ເພື່ອກະກຽມຄວາມພ້ອມໃນການຈັດຕັ້ງປະຕິບັດ IFRS ຂອງສະຖາບັນການເງິນທີ່ບໍ່ແມ່ນທະນາຄານ, ທະນາຄານແຫ່ງ ສປປ ລາວ ໄດ້ອອກແຈ້ງການຈັດຕັ້ງປະຕິບັດມາດຕະຖານສາກົນດ້ານການລາຍງານການເງິນ IFRS ສຳລັບສະຖາບັນການເງິນທີ່ບໍ່ແມ່ນທະນາຄານ ທີ່ເຂົ້າເງື່ອນໄຂເປັນວິສາຫະກິດທີ່ຮັບໃຊ້ຜົນປະໂຫຍດສາທາລະນະ (PIEs) ຕ້ອງໄດ້ກະກຽມຈັດຕັ້ງປະຕິບັດມາດຕະຖານສາກົນ IFRS ໃນປີ 2031. ດັ່ງນັ້ນ,​ ເພື່ອເປັນການສ້າງຄວາມເຂັ້ມແຂງໃຫ້ບຸກຄະລາກອນຂອງສະຖາບັນການເງິນທີ່ບໍ່ແມ່ນທະນາຄານ ທີ່ເປັນ PIEs ເພື່ອກະກຽມຈັດຕັ້ງປະຕິບັດມາດຕະຖານສາກົນ IFRS ດັ່ງກ່າວ, ກົມບັນຊີແແລະການເງິນ ຮ່ວມກັບ ກົມຄຸ້ມຄອງສະຖາບັນການເງິນ ຈຶ່ງໄດ້ຈັດຝຶກອົບຮົມໃນຄັ້ງນີ້ຂື້ນ ເພື່ອເຜີຍແຜ່ແຈ້ງການຈັດຕັ້ງປະຕິບັດ IFRS ສຳລັບສະຖາບັນການເງິນທີ່ບໍ່ແມ່ນທະນາຄານ ແລະ ຝຶກອົບຮົມຄວາມຮູ້ພື້ນຖານກ່ຽວກັບມາດຕະຖານສາກົນທີ່ຕິດພັນກັບສະຖາບັນການເງິນລວມທັງ ການສ້າງບົດວິເຄາະຊ່ອງຫວ່າງ ແລະ ແຜນການຈັດຕັ້ງປະຕິບັດ IFRS ຂອງສະຖາບັນການເງິນ ເປັນເວລາ 5 ວັນ, ໂດຍການຝຶກອົບຮົມຄັ້ງນີ້ ຖືເປັນໂອກາດອັນດີແກ່ ພະນັກງານຂອງສະຖາບັນການເງິນທີ່ຈະໄດ້ຮັບຮູ້, ເຊື່ອມຊຶມ, ເຂົ້າໃຈບັນດາເນື້ອໃນຂອງ ມາດຕະຖານສາກົນ IAS ແລະ IFRS.

 

ທ່ານ ຫົວຫນ້າກົມບັນຊີ ແລະ ການເງິນ ຍັງໄດ້ຮຽກຮ້ອງມາຍັງບັນດາທ່ານນັກສຳມະນາກອນ ຈົ່ງເອົາໃຈໃສ່ຮັບຟັງ, ແລກປ່ຽນບົດຮຽນ, ປະກອບຄຳເຫັນໃຫ້ເລິກເຊິ່ງ ແລະມີບັນຍາກາດຟົດຟື້ນເພື່ອເຮັດໃຫ້ການຝຶກອົບຮົມໃນຄັ້ງນີ້ມີຜົນສຳເລັດຕາມລະດັບຄາດໝາຍ.