ແຫລ່ງຂ່າວຈາກ ແຂວງບໍ່ແກ້ວ ໃຫ້ຮູ້ວ່າ: ໃນວັນທີ 10 ກັນຍາ ທີ່ຜ່ານມາ, ຢູ່ເມືອງຫ້ວຍຊາຍ ແຂວງບໍ່ແກ້ວ ມີຝົນຕົກໜັກໜັກຢູ່ບາງເຂດ ຕິດຕໍ່ກັນເປັນເວລາຫລາຍຊົ່ວໂມງ, ມາຮອດເວລາ 04:00 ໂມງ ວັນທີ 11 ກັນຍາ ໄດ້ມີນໍ້າປ່າໄຫຼຊຸ ລົງສູ່ນໍ້າສາຍຕ່າງໆ ແລ້ວໄປປ່ອງໃສ່ແມ່ນໍ້າຍຸງ ເຮັດໃຫ້ເກີດມີນໍ້າຖ້ວມຢ່າງກະທັນຫັນ ຖ້ວມເຮືອນຊານ, ບ້ານຊ່ອງ, ຖະໜົນຫົນທາງ ໂດຍສະເພາະແມ່ນບ້ານບໍ່ເຫລັກ, ບ້ານໂພນທອງ, ບ້ານນໍ້າຈ້າງ, ບ້ານນໍ້າຕອຍ, ບ້ານໄຊຈະເລີນ ແລະ ບ້ານອື່ນໆ ທີ່ຕັ້ງຢູ່ລຽບແຄມສາຍນໍ້າຍຸງ.

 

ໂອກາດນີ້, ທ່ານ ຄໍາມີ ນາຍບ້ານໆບໍ່ເຫລັກ ກຸ່ມປາງປອດ ທີ່ຢູ່ໃນເຫດການ ໄດ້ໃຫ້ຮູ້ວ່າ: ເຫດການດັ່ງກ່າວໄດ້ສ້າງຄວາມເສຍຫາຍເປັນຈຳນວນຫຼາຍ, ເຮັດໃຫ້ມີສັດລ້ຽງຂອງປະຊາຊົນປະເພດ ເປັດ, ໄກ່, ງົວ ຖືກນໍ້າພັດໄຫຼໄປຕາມກະແສ່ນໍ້າ. ໃນນີ້, ມີງົວຕາຍ 6 ໂຕ, ໂຮງສີເຂົ້າ, ລົດຈັກ, ລົດໄຖນາ, ປໍ້ານໍ້າມັນ ແລະ ເຄື່ອງໃຊ້ຕ່າງໆພາຍໃນເຮືອນຖືກນໍ້າຖ້ວມ, ບາງບ່ອນລະດັບນໍ້າຂຶ້ນສູງຮອດ 1 ແມັດ, ປະຊາຊົນໄດ້ຊ່ວຍກັນເກັບເຄື່ອງຂອງ ໄປໄວ້ບ່ອນສູງຮັບປະກັນຄວາມປອດໄພ. ນອກຈາກນິ້, ນໍ້າຍັງຖ້ວມເນື້ອທີ່ທໍາການຜະລິດ ຂອງປະຊາຊົນ ໂດຍສະເພາະ ເຂົ້ານາປີ ແລະ ພືດຜັກຕ່າງໆ ເຊິ່ງເປັນພຽງຂໍ້ມູນເບື້ອງຕົ້ນ. ສ່ວນຜົນເສຍຫາຍນັ້ນ, ຢູ່ໃນໄລຍະ ທີ່ທາງການຈັດຕັ້ງບ້ານ ແລະ ພາກສ່ວນທີ່ກ່ຽວຂ້ອງ ລົງເກັບກໍາຂໍ້ມູນລະອຽດ.