ລັດຖະບານຍີ່ປຸ່ນ ຊ່ວຍໂຮງຮຽນປະຖົມສົມບູນບ້ານພະໂພ 70.000 ໂດລາ

ລັດຖະບານຍີ່ປຸ່ນ ໃຫ້ການສະໜັບສະໜູນປັບປຸງສະພາບແວດລ້ອມການສຶກສາຢູ່ໂຮງຮຽນແຂວງຈຳປາສັກ ມູນຄ່າປະມານ 70.000 ໂດລາສະຫະລັດ ພາຍໃຕ້ໂຄງການເສີມສ້າງຄວາມໝັ້ນຄົງ ຂອງມະນຸດຂັ້ນຮາກຖານ (GGP) ເພື່ອສ້າງອາຄານຮຽນ ພ້ອມທັງສະໜອງອຸປະກອນເຄື່ອງໃຊ້ໃຫ້ແກ່ໂຮງຮຽນປະຖົມສົມບູນບ້ານພະໂພ ເມືອງປະທຸມພອນ ແຂວງຈຳປາສັກ ໂດຍໄດ້ມີພິທີເຊັນສັນຍາຊ່ວຍເຫລືອ ໃນວັນທີ 4 ກັນຍາ 2023 ລະຫວ່າງ ທ່ານ ໂຄບະຢະຊິ ເຄັນອິຈິ ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ແລະທ່ານ ບົວທອງ ສຸວັນນະສານ ຫົວໜ້າພະແນກສຶກສາທິການ ແລະກິລາ ແຂວງຈຳປາສັກ ໂດຍມີທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໃຫ້ກຽດເຂົ້າຮ່ວມເປັນສັກຂີພິຍານ.

ທ່ານ ວິໄລວົງ ບຸດດາຄຳ ໄດ້ກ່າວວ່າ: ການສະໜັບສະໜູນ ໃນຄັ້ງນີ້, ເປັນການປະກອບສ່ວນເຂົ້າໃນການປັບປຸງສະພາບແວດລ້ອມການສຶກສາຂອງໂຮງຮຽນປະຖົມສົມບູນບ້ານພະໂພ. ເຊິ່ງຫລາຍປີຜ່ານມາ, ລັດຖະບານຍີ່ປຸ່ນ ໄດ້ປະກອບສ່ວນເຂົ້າໃນວຽກງານພັດທະນາເສດຖະກິດ-ສັງຄົມ ແລະພັດທະນາຊັບພະຍາກອນມະນຸດ ຂອງແຂວງຈຳປາສັກ ໃນດ້ານການສຶກສາໃນຂັ້ນພື້ນຖານມາຢ່າງຫລວງຫລາຍ, ການຊ່ວຍເຫລືອອັນລໍ້າຄ່າໃນຄັ້ງນີ້, ມີຄວາມສໍາຄັນຢ່າງຍິ່ງທີ່ຈະຊ່ວຍໃຫ້ແຂວງສາມາດສ້າງສະພາບແວດລ້ອມທີ່ປອດໄພ ແລະຮັບປະກັນໃຫ້ນ້ອງນັກຮຽນມີຜົນການຮຽນທີ່ດີຍິ່ງຂຶ້ນເຊິ່ງຈະເປັນການປະກອບສ່ວນ ໃນການສ້າງຊັບພະຍາກອນມະນຸດ ທີ່ຈະກາຍເປັນອະນາຄົດຂອງຊາດ.

ທ່ານ ໂຄບະຢະຊິ ເຄັນອິຈິ ໄດ້ກ່າວວ່າ: ອາຄານຮຽນທີ່ໂຮງຮຽນປະຖົມພະໂພແມ່ນເກົ່າ ແລະເປ່ເພຫລາຍຈາກພາຍຸໃນແຕ່ລະປີ. ນອກຈາກນັ້ນ, ຈຳນວນຫ້ອງຮຽນກໍບໍ່ພຽງພໍເຮັດໃຫ້ນັກຮຽນແຕ່ລະຫ້ອງແອອັດ, ພວກເຮົາຫວັງວ່າການຊ່ວຍເຫລືອຈາກລັດຖະບານຍີ່ປຸ່ນໃນຄັ້ງນີ້,ຈະຊ່ວຍປັບປຸງສະພາບແວດລ້ອມການສຶກສາຮໍ່າຮຽນຂອງນັກຮຽນທີ່ຈະກາຍເປັນອະນາຄົດຂອງຊາດໃຫ້ດີຍິ່ງຂຶ້ນ, ພ້ອມທັງເປັນການປັບປຸງສະພາບການເຮັດວຽກຂອງຄູອາຈານນໍາດ້ວຍ.

ໂຄງການເສີມສ້າງຄວາມໝັ້ນຄົງຂອງມະນຸດຂັ້ນຮາກຖານ (GGP) ແມ່ນການສະໜອງທຶນໃຫ້ແກ່ໂຄງການຂະໜາດນ້ອຍທີ່ສ້າງຜົນປະໂຫຍດໂດຍກົງແກ່ປະຊາຊົນຜູ້ອາໄສ ແລະມີຈຸດປະສົງໃນການພັດທະນາເສດຖະກິດ-ສັງຄົມ ຂອງປະເທດລາວ ໂດຍອີງຕາມຄວາມຕ້ອງການພື້ນຖານຂອງມະນຸດເປັນຫລັກ.

ໃນໄລຍະ 5 ປີຜ່ານມາ, ລັດຖະບານຍີ່ປຸ່ນໄດ້ໃຫ້ການສະໜັບສະໜູນ ແຂວງຈຳປາສັກ ຫລາຍກວ່າ 780.000 ໂດລາສະຫະລັດ ໃນຂະແໜງການສຶກສາ, ສາທາລະນະສຸກ ແລະອື່ນໆຢ່າງກວ້າງຂວາງ. ປະເທດຍີ່ປຸ່ນຈະສືບຕໍ່ໃຫ້ການຊ່ວຍເຫລືອປະເທດລາວໃນການປັບປຸງພື້ນຖານຊີວິດການເປັນຢູ່ຂັ້ນຮາກຖານຕໍ່ໄປເພື່ອຮັບປະກັນ “ບໍ່ໃຫ້ມີໃຜຖືກຖິ້ມໄວ້ທາງຫລັງ” ໂດຍຜ່ານການແກ້ໄຂຄວາມແຕກໂຕນໃນພາກພື້ນ.

แชร์