ປກສ ເມືອງປາກຊັນ ທຳລາຍຕົ້ນກະທ່ອມ ທີ່ປະຊາຊົນປູກໄວ້

ແຫລ່ງຂ່າວຈາກ ແຂວງບໍລິຄຳໄຊ ໃຫ້ຮູ້ວ່າ: ວັນທີ 04 ກັນຍາ 2023 ຜ່ານມາ, ກອງບັນຊາການ ປກສ ເມືອງປາກຊັນ, ພ້ອມດ້ວຍຫ້ອງການ ປກສ ບໍລິການ ປະຊາຊົນກຸ່ມເທສະບານ 2 ໄດ້ລົງທຳລາຍພືດມີສານເສບຕິດ (ຕົ້ນກະທ່ອມ) ທີ່ປະຊາຊົນປູກໃນສວນຢາງພາລາ ຢູ່ບ້ານທົ່ງນ້ອຍ (ຄຸ້ມສອງຄອນນໍ້າງຽບ) ໂດຍຊ້ອງໜ້າການຈັດຕັ້ງບ້ານ ແລະເຈົ້າໜ້າທີ່ວິຊາສະເພາະທີ່ກ່ຽວຂ້ອງພ້ອມດ້ວຍເຈົ້າຂອງສວນ, ຜູ້ປູກເຂົ້າຮ່ວມ.

ທ່ານ ພັຕ ຄຳເຫລັກ ໄຊຍະວົງ ຮອງຫົວໜ້າພະແນກຕຳຫລວດ ປກສ ເມືອງປາກຊັນ ໃຫ້ຮູ້: ເຈົ້າໜ້າທີ່ວິຊາສະເພາະໄດ້ຮັບຂໍ້ມູນຈາກພົນລະເມືອງດີວ່າ: ຢູ່ບໍລິເວນຖຽງນ້ອຍ ສວນປູກຢາງພາລາ ຄຸ້ມສອງຄອນນໍ້າງຽບ ບ້ານທົ່ງນ້ອຍ ໄດ້ມີການລັກລອບປູກຕົ້ນກະທ່ອມ. ດັ່ງນັ້ນ,ເຈົ້າໜ້າທີ່ວິຊາສະເພາະ ປກສ ເມືອງປາກຊັນ ຈຶ່ງໄດ້ລົງກວດກວດກາສະຖານທີ່ຕົວຈິງແລ້ວພົບເຫັນຕົ້ນກະທ່ອມ ຈຳນວນ 2 ຕົ້ນ.

ຜ່ານການດຳເນີນການສືບສວນ-ສອບສວນ ຈຶ່ງຮູ້ວ່າ: ຜູ້ກະທຳຜີດ ຊື່ ທ້າວ ຈີ້ນ ອາຍຸ 34 ປີ, ອາຊີບ ກຳມະກອນ, ບ້ານຢູ່ໂພນສາວເອ້ ເມືອງໜອງບົກ ແຂວງຄຳມ່ວນ, ປັດຈຸບັນພັກເຊົາຢູ່ ບ້ານທົ່ງນ້ອຍ (ຄຸມສອງຄອນນໍ້າງຽບ) ເມືອງປາກຊັນ. ຜູ້ກ່ຽວໃຫ້ການຮັບສາລະພາບກັບເຈົ້າໜ້າທີ່ວ່າ: ໄດ້ມາຮັບຈ້າງຂີດຢາງພາລາແຕ່ປີ 2018 ເປັນຕົ້ນມາພາຍຫລັງຢູ່ໄດ້ປະມານ 1 ປີ ຜູ້ກ່ຽວກໍ່ໄດ້ກັບເມື່ອຢາມບ້ານ ແລ້ວໄດ້ນຳຕົ້ນໃບກະທ່ອມມາປູກຢູ່ສວນຢາງພາລາບ່ອນທີ່ອາໄສຢູ່ເພື່ອນໍາໃຊ້ປຸງແຕ່ກິນເອງ ແລະຂາຍໃບກະທ່ອມໃຫ້ແກ່ໄວໜຸ່ມພາຍໃນເຂດໃກ້ຄຽງເປັນຈຳນວນຫລາຍຄັ້ງ, ຄັ້ງລະ 40 ໃບ-60 ໃບ ໄດ້ເງິນຄັ້ງລະ 20.000 ກີບ ຫາ 200,000 ກີບ.

ດັ່ງນັ້ນ, ເຈົ້າໜ້າທີ່ວິຊາສະເພາະຈຶ່ງໄດ້ກວດກາເກັບກໍາເຄື່ອງຂອງກາງໃນນີ້ມີ: ຕົ້ນກະທ່ອມ ຈຳນວນ 2 ຕົ້ນ, ມີວົງກ້ວາງ 8-10 ຊັງຕີແມັດ, ຕົ້ນສູງຍາວ 4 ແມັດ, ໃບກະທ່ອມ ຈຳນວນ 7 ກິໂລກຣາມ ເພື່ອທຳລາຍຖິ້ມຕາມລະບຽບກົດໝາຍ.

แชร์