ເຂດພິເສດສາມຫຼ່ຽມຄຳ ລົງກວດກາປ້າຍໂຄສະນາທີ່ບໍ່ຖືກຕາມລະບຽບກົດໝາຍ ແລະວາງມາດຕະການເດັດຂາດຕໍ່ຜູ້ກະທຳຜິດ

ສະພາບໍລິຫານເຂດເສດຖະກິດພິເສດສາມຫຼ່ຽມຄຳລາຍງານວັນທີ 5 ກັນຍາ 2023 ນີ້ວ່າ: ເລີ່ມແຕ່ຕົ້ນເດືອນສິງຫາ 2023 ເປັນຕົ້ນມາໜ່ວຍງານກວດກາ-ຄຸ້ມຄອງປ້າຍຂອງສະພາບໍລິຫານເຂດເສດຖະກິດພິເສດສາມຫຼ່ຽມຄຳ ຮ່ວມກັບຄະນະຄຸ້ມຄອງເຂດເສດຖະກິດພິເສດແຂວງບໍ່ແກ້ວ ໄດ້ພ້ອມກັນລົງກວດກາປ້າຍຂອງຜູ້ປະກອບການດຳເນີນທຸລະກິດຕ່າງໆພາຍໃນເຂດເສດຖະກິດພິເສດສາມຫຼ່ຽມຄຳ ທັງໝົດ 91 ປ້າຍ, ໃນນີ້ມີປ້າຍທີ່ຖືກຕ້ອງຕາມລະບຽບກົດໝາຍ7 ປ້າຍ, ພົບບັນດາປ້າຍທີ່ບໍ່ຖືກຕ້ອງຕາມລະບຽບເຊັ່ນ: ຂະໜາດຕົວໜັງສື, ສະຫລະພະຍັນຊະນະ, ປ້າຍບໍ່ມີພາສາລາວ, ປ້າຍພິມເປັນພາສາໄທ ແລະ ປ້າຍເນື້ອໃນບໍ່ສອດຄ່ອງກັບໃບທະບຽນວິສາຫະກິດລວມມີ 85 ປ້າຍ.

ການລົງກວດກາປ້າຍໂຄສະນາທຸລະກິດຄັ້ງນີ້ແນໃສ່ເປັນການແນະນຳ, ສຶກສາອົບຮົມ, ຕັກເຕືອນຜູ້ປະກອບການຫັນມາປັບປຸງປ້າຍທຸລະກິດໃຫ້ຖືກຕ້ອງຕາມລະບຽບກົດໝາຍວ່າດ້ວຍປ້າຍເລກທີ 50/ສພຂ ລົງວັນທີ 21 ມິຖຸນາ 2018 ແລະ ນິຕິກຳລຸ່ມກົດໝາຍຂອງເຂດເສດຖະກິດພິເສດສາມຫລ່ຽມຄຳວາງອອກໃຫ້ມີຄວາມເຂັ້ມງວດ-ຮັດຄຸມ. ຖ້າຮ້ານໃດຫາກຝ່າຝືນບໍ່ໃຫ້ຄວາມຮ່ວມມື, ເມີນເສີຍ, ບໍ່ມາພົວພັນປັບປຸງປ້າຍຂອງຕົນໃຫ້ຖືກຕ້ອງຕາມລະບຽບການ,ແມ່ນຈະໄດ້ປັບໄໝ, ເລິກຮື້ປ້າຍອອກ,ກ້າວໄປເຖິງການໂຈະການດຳເນີນກິດຈະການຂອງຜູ້ປະກອບການ. ທັງນີ້ກໍ່ເພື່ອເຮັດໃຫ້ພາບຕົວເມືອງຂອງເຂດເສດຖະກິດພິເສດສາມຫຼ່ຽມຄຳມີຄວາມສວຍງາມ, ເປັນລະບຽບຮຽບຮ້ອຍ, ສ້າງສີສັນ ແລະເປັນສິ່ງດຶງດູດໃຫ້ແກ່ນັກທ່ອງທ່ຽວທັງພາຍໃນ ແລະຕ່າງປະເທດເຂົ້າທ່ອງທ່ຽວເຂດເສດຖະກິດພິເສດສາມຫຼ່ຽມຄຳນັບມື້ນັບຫຼາຍຂຶ້ນເລື້ອຍໆ.

แชร์