ເມືອງສັງທອງ ມີໂຄງການລົງທຶນດ້ານພະລັງງານ 3 ໂຄງການ

ທ່ານ ເສີມຄໍາ ທຸມມະວົງ ຫົວໜ້າພະແນກພະລັງງານແລະບໍ່ແຮ່ນະຄອນຫຼວງວຽງຈັນໄດ້ລາຍງານໃຫ້ທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະບໍ່ແຮ່ (ພບ) ໃນໂອກາດທ່ານລັດຖະມົນຕີ ພ້ອມດ້ວຍຄະນະໄດ້ໄປຢ້ຽມຢາມແລະຊຸກຍູ້ວຽກງານພະລັງງານ ແລະບໍ່ແຮ່ຢູ່ເມືອງສັງທອງເມື່ອທ້າຍອາທິດຜ່ານມາວ່າ: ໃນໄລຍະ 8 ເດືອນຕົ້ນປີ 2023, ວຽກງານການລົງທຶນດ້ານພະລັງງານຢູ່ເມືອງສັງທອງລວມ ມີ 3 ໂຄງການຄື: ໂຄງການສຶກສາຄວາມເປັນໄປໄດ້ທາງດ້ານເສດຖະກິດ-ເຕັກນິກການກໍ່ສ້າງໄຟຟ້ານໍ້າຕົກມີ 2 ໂຄງການ ແລະພະລັງງານໄຟຟ້າແສງອາທິດມີ 1 ໂຄງການ, ສ່ວນວຽກງານທໍລະນີສາດ ແລະແຮ່ທາດປະຈຸບັນທົ່ວເມືອງສັງທອງມີບັນດາບໍລິສັດໄດ້ຮັບອະນຸຍາດສໍາປະທານລົງທຶນ ແລະເຄື່ອນໄຫວດໍາເນີນທຸລະກິດກ່ຽວກັບແຮ່ທາດໂລຫະ ແລະອະໂລຫະ ມີທັງໝົດ 32 ບໍລິສັດ ໃນນັ້ນມີຂັ້ນສູນກາງອະນຸຍາດ 10 ບໍລິສັດ ແລະຂັ້ນນະຄອນຫຼວງອອກໃບອະນຸຍາດມີ 22 ບໍລິສັດ.

ໂອກາດນີ້,ທ່ານລັດຖະມົນຕີໄດ້ຊີ້ນໍາໃຫ້ສືບຕໍ່ປັບປຸງແກ້ໄຂໂດຍປະສານສົມທົບຢ່າງກົມກຽວກັບຂະແໜງການກ່ຽວຂ້ອງຂອງສູນກາງ ແລະ ທ້ອງຖິ່ນ ເພື່ອເຮັດໃຫ້ໂຄງການພະລັງງານປະສົບຜົນສໍາເລັດ, ເອົາໃຈໃສ່ປະຕິບັດມາດຕະການເຕັກນິກຄຸນນະພາບຂອງໂຄງການ ແລະ ປະສິດທິພາບຂອງໂຄງການໃນໄລຍະຍາວ, ທັງເປັນການປະກອບສ່ວນອັນສໍາຄັນໃນການພັດທະນາເສດຖະກິດ-ສັງຄົມຂອງຊາດ.

ຫຼັງຈາກນັ້ນ, ທ່ານລັດຖະມົນຕີ ພ້ອມດ້ວຍຄະນະຍັງໄດ້ລົງເຄື່ອນໄຫວຢ້ຽມຢາມ ແລະລົງຊຸກຍູ້ໂຄງການຂຸດຄົ້ນ ແລະປຸງແຕ່ງແຮ່ທາດເພື່ອກວດກາປະເມີນຄືນການເຄື່ອນໄຫວໄລຍະຜ່ານມາ ແລະຮັບຟັງແຜນການດໍາເນີນກິດຈະການຂອງໂຄງການໃນຕໍ່ໜ້າ.
ຈາກ, ສູນຂ່າວສານພະລັງງານ ແລະບໍ່ແຮ່

• 05/09/2023