ເກດມະນີ ຄອງມົງກຸດ ນາງສາວ ນວ

 ນາງສາວ ເກດມະນີ ວົງປະສີດ (ປຸ້ຍ) ອາຍຸ 22 ປີ ໝາຍເລກ MVT15 ຄວ້າມົງກຸດນາງສາວນະຄອນຫຼວງວຽງຈັນ ປະຈຳປີ 2019 ມູນຄ່າ 80 ລ້ານກີບ ມາຄອງ, ທັງຍັງໄດ້ຮັບລາງວັນນາງສາວສະເໜ່ຍິງລາວ ແລະລາງວັັນນາງສາວຜິວງາມໜ້າໃສນໍາອີກຊຶ່ງຈະໄດ້ເປັນຕົວແທນນາງສາວນະຄອນຫຼວງວຽງຈັນ ໄປປະກວດຕໍ່ໃນເວທີ Miss Chinese International ຢູ່ຮົງກົງ ປະເທດຈີນ. 

  ການປະກວດນາງສາວນະຄອນຫຼວງວຽງຈັນ ປະຈໍາປີ 2019 ແມ່ນການຮ່ວມມືລະຫວ່າງພະແນກຖະແຫຼງຂ່າວວັດທະນະທໍາ ແລະທ່ອງທ່ຽວ ນວ ຮ່ວມກັບ ບໍລິສັດ ກຣິດຕະພົງກຣຸບ ຈໍາກັດໂດຍ ໃນວັນທີ 16 ມີນາຜ່ານມາໄດ້ຄັດເລືອກເອົານາງສາວນະຄອນຫຼວງວຽງຈັນ 20 ຄົນສຸດທ້າຍ ແລະໃນຄໍ່າຄືນຂອງວັນທີ 6 ເມາສາ ປະກວດຮອດຕັດສິນທີ່ໂຮງ ແຮມແລນມາກແມ່ຂອງລີເວີໄຊ, ໂດຍ ມີທ່ານນາງ ສຸມາລີ ທໍາມະວົງ ຈາກຄະນະຊາວໜຸ່ມນະຄອນຫຼວງວຽງຈັນ, ທ່ານ ພູວົງ ພະມີສິດ ເຈົ້າຂອງຮ້ານຄໍາພູວົງ ຜູ້ສະໜັບສະໜູນມົງກຸດຊຶ່ງປີນີ້ມີທັງໝົດ 3 ມົງກຸດ ລວມມູນຄ່າ 150 ລ້ານກີບ, ມີບັນດາຄະນະກໍາມະການ, ບໍລິສັດຫ້າງຮ້ານທີ່ໃຫ້ການສະໜັບສະໜູນ ແລະມວນຊົນເຂົ້າຮ່ວມຢ່າງຫຼວງຫຼາຍ. 

 ສໍາລັບຜົນການປະກວດປາກົດວ່າໝາຍເລກ MVT15 ນາງ ເກດມະນີ ວົງ ປະສີດ (ປຸ້ຍ) ອາຍຸ 22 ປີ ເປັນຜູ້ຊະນະເລີດ ໄດ້ຄອງຕໍາແໜ່ງນາງສາວ ນວ ປະຈຳປີ 2019, ສ່ວນຮອງອັນດັບ 1 ຕົກເປັນຂອງໝາຍເລກ MVT08 ນາງ ຄໍາຫຼ້າ ຈັນທະລັງສີ (ນ້ອຍ) ອາຍຸ 20 ປີ, ຮອງອັນດັບ 2 ໄດ້ແກ່ໝາຍເລກ MVT01 ນາງ ນິກສະຢາ ໄຊສົມພູ (ເອລິກ) ອາຍຸ 18 ປີ, ສໍາລັບຮອງອັນດັບ 3 ມີ 4 ລາງວັນ ຄົນທໍາອິດໄດ້ແກ່ໝາຍເລກ MVT06 ນາງ ສົ້ມທອງ ວົງສະໝອນ (ນໍ້າສົ້ມ) ອາຍຸ 20 ປີ, ຄົນທີສອງແມ່ນໝາຍເລກ MVT04 ນາງ ນໍ້າຝົນ ພູມານິວົງ (ນໍ້າຝົນ) ອາຍຸ 20 ປີ; ຄົນທີສາມໄດ້ແກ່ໝາຍເລກ MVT17 ນາງ ສິງທອງ ເລົ່າບຸນ ແພງທະໝັ້ນ (ສອງ) ອາຍຸ 18 ປີ ແລະ ຄົນທີ່ສີ່ໄດ້ແກ່ໝາຍເລກ MVT14 ເມລາລີ ພັນທະວົງ (ເມ) ອາຍຸ 19 ປີ. ໂດຍທັງ 7 ນາງສາວທີ່ຄັດເລືອກໄດ້ນີ້ແມ່ນຈະໄດ້ເປັນຕົວແທນໃຫ້ແກ່ນາງສັງຂານ ຂອງນະຄອນຫຼວງວຽງຈັນ ໃນປີໃໝ່ລາວ ຊຶ່ງເປັນປະເພນີທີ່ສືບທອດກັນມາແຕ່ບູຮານນະການ.

  ສ່ວນລາງວັນນາງສາວສະເໜ່ຍິງລາວ ແລະລາງວັັນນາງສາວຜິວງາມໜ້າໃສທັງສອງລາງວັນໄດ້ແກ່ໝາຍເລກ MVT15 ນາງ ເກດມະນີ ວົງປະສີດ (ປຸ້ຍ), ລາງວັນນາງສາວໜ້າອ່ອນກວ່າໄວໄດ້ແກ່ໝາຍເລກ MVT08 ນາງ ຄໍາຫຼ້າ ຈັນທະລັງສີ (ນ້ອຍ), ລາງວັນນາງສາວຂວັນໃຈຊ່າງພາບໄດ້ແກ່ໝາຍເລກ MVT19 ນາງ ຕໍາບຸ້ຍ ພານພູວົງ (ບຸ້ຍ), ລາງວັນນາງສາວບຸກຄະລິກກະພາບດີໄດ້ແກ່ໝາຍເລກ MVT16 ນາງ ພຸດອານົງ ສີດາຄໍາ (ອານົງ), ສໍາລັບລາງວັນນາງສາວຂວັນໃຈມິດຕະພາບ ແລະລາງວັນນາງສາວຂວັນໃຈມວນຊົນໄດ້ແກ່ໝາຍເລກ MVT01 ນາງ ນິກສະຢາ ໄຊສົມພູ (ເອລິກ). 

 ການປະກວດໃນປີນີ້ແມ່ນພາຍໃຕ້ຄຳຂວັນສົ່ງເສີມວັດທະນະທຳນຳຄຸນຄ່າສູ່ແມ່ຍິງລາວ, ຊຶ່ງຜູ້ທີ່ຊະນະເລີດທີ່ໄດ້ຄອບຄອງຕໍາແໜ່ງເປັນນາງສາວນະຄອນ ຫຼວງວຽງຈັນປະຈຳປີ 2019 ຍັງ ໄດ້ປະກວດໃນເວທີ Miss Chinese International ຢູ່ຮົງກົງ ປະເທດຈີນ, ສ່ວນຮອງອັນດັບໜຶ່ງຈະໄດ້ໄປປະກວດຕໍ່ເວທີ Miss Asia pacitic ຢູ່ປະເທດສິງກະໂປໃນໄວໆນີ້.

ຂ່າວ: ກິ່ງລັດຕະນະ    

แชร์