ແຂວງເຊກອງ ສຸມໃສ່ກໍ່ສ້າງພື້ນຖານໂຄງລ່າງສະໜອງໃຫ້ແກ່ການພັດທະນາເສດຖະກິດ

ທ່ານ ສາກົນ ພອນປະເສີດ ຫົວໜ້າພະແນກແຜນການ ແລະການລົງທຶນໃນກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງເຊກອງ ຊຸດທີ II ເມື່ອບໍ່ດົນນີ້ວ່າ: ໃນໄລຍະ 2 ປີເຄິ່ງຜ່ານມາ ແຂວງເຊກອງ ໄດ້ສຸມໃສ່ກໍ່ສ້າງ, ຍົກລະດັບເສັ້ນທາງ ແລະ ຂະຫຍາຍເສັ້ນທາງ ເພື່ອຍູ້ແຮງການພັດທະນາເສດຖະກິດ-ສັງຄົມໃຫ້ຂະຫຍາຍຕົວ, ທັງຮັບປະກັນການສັນຈອນໄປ-ມາຫາສູ່, ການແລກປ່ຽນຊື້-ຂາຍສິນຄ້າ, ການຄ້າ ແລະ ການບໍລິການດ້ານຕ່າງໆ ລະຫວ່າງ ແຂວງຫາເມືອງ, ເມືອງຫາບ້ານ, ແຂວງສູ່ຕ່າງແຂວງ ກໍຄືຕ່າງປະເທດໃຫ້ນັບມື້ສະດວກສະບາຍກວ່າເກົ່າ.

ຊຶ່ງປັດຈຸບັນທົ່ວແຂວງເຊກອງ ມີເສັ້ນທາງທັງໝົດ 291 ເສັ້ນ, ມີລວງຍາວ 2.077,81 ກິໂລ ແມັດ. ໃນນີ້, ທາງເບຕົງ 4,2 ກິໂລແມັດ, ທາງປູອັດສະຟານ 8,02 ກິໂລແມັດ, ທາງປູຢາງ 346,98 ກິໂລແມັດ, ທາງປູແຮ່-ດິນແດງ 1.072,26 ກິໂລແມັດ ແລະ ທາງດິນທໍາມະຊາດ 646,35 ກິໂລ ແມັດ, ມີຂົວ 34 ແຫ່ງ ຍາວ 1.553,04 ແມັດ, ບ້ານທີ່ມີເສັ້ນທາງເຂົ້າເຖິງແລ້ວ 196 ບ້ານກວມເອົາ 99,04% ທຽວໄດ້ສອງລະດູລວມມີ 155 ບ້ານກວມເອົາ 79,58%.
ພ້ອມນີ້, ກໍໄດ້ປັບປຸງລະບົບການຂົນສົ່ງ, ຍົກລະດັບການບໍລິການຂົນສົ່ງພາຍໃນແຂວງໃຫ້ເປັນລະບົບ ສາມາດຮອງຮັບ ແລະ ບໍລິ ການຮັບໃຊ້ສັງຄົມຢ່າງເປັນປົກກະຕິ, ມີສະຖາຂົນສົ່ງໂດຍສານ 2 ແຫ່ງ, ມີສາຍທາງການຂົນສົ່ງພາຍໃນ 5 ສາຍທາງ ແລະ ສາຍທາງການຂົນສົ່ງລະຫວ່າງປະເທດ 2 ສາຍທາງ, ບໍລິມາດການຂົນສົ່ງໂດຍສານປະຕິບັດໄດ້ 29.796 ຄົນ ແລະບໍລິມາດການຂົນສົ່ງສິນຄ້າປະຕິບັດໄດ້ 149.757 ໂຕນ.

ທ່ານ ສາກົນ ພອນປະເສີດ ໃຫ້ຮູ້ຕື່ມວ່າ: ສໍາລັບທິດທາງແຜນການ 2 ປີເຄິ່ງ ທ້າຍສະໄໝສືບຕໍ່ກໍ່ສ້າງ, ຍົກລະດັບ ແລະຂະຫຍາຍເສັ້ນທາງໃຫ້ເຂົ້າເຖິງທຸກບ້ານຂອງແຂວງ, ສືບຕໍ່ປັບປຸງ ແລະ ຍົກລະດັບເສັ້ນທາງທີ່ມີແລ້ວໃຫ້ສາມາດທຽວໄດ້ສອງລະດູ, ສືບຕໍ່ປັບປຸງ-ຍົກລະດັບບໍລິການຂົນສົ່ງພາຍໃນ ແລະຂະຫຍາຍສາຍທາງການຂົນສົ່ງລະຫວ່າງປະເທດ, ສູ້ຊົນເຮັດໃຫ້ສາມາດຂົນສົ່ງສິນຄ້າໄດ້ 305.318 ໂຕນ, ຂົນສົ່ງໂດຍສານໃຫ້ໄດ້ 36.247 ຄົນ ແລະພັດທະນາການຂົນສົ່ງທາງບົກມີລະບົບການຂົນສົ່ງທີ່ສົ່ງເສີມການຄ້າ, ການຜະລິດ, ການລົງທຶນ, ການທ່ອງທ່ຽວ ແລະ ອື່ນໆໃຫ້ມີຄວາມປອດໄພ, ສະດວກ ແລະ ທັນສະໄໝຂຶ້ນເທື່ອລະກ້າວ.
ທີ່ມາ: ປະເທດລາວ

แชร์