ກະຊວງສຶກສາທິການ ແລະກີລາ ໄຂສົກຮຽນໃໝ່ 2023-2024

ໃນວັນທີ 4 ກັນຍາ 2023 ທີ່ກະຊວງສຶກສາທິການ ແລະກີລາ (ເຂດຊຽງຍືນ) ຈັດພິທີໄຂສົກຮຽນໃໝ່ສົກຮຽນ 2023-2024 ໂດຍການເປັນປະທານກ່າວເປີດຂອງທ່ານ ພຸດ ສິມມາລາວົງ ລັດຖະມົນຕີກະຊວງ ສສກ ມີຄະນະລັດຖະມົນຕີ, ມີບັນດານ້ອງນັກຮຽນ ແລະພາກສ່ວນທີ່ກ່ຽວຂ້ອງເຂົ້າຮ່ວມແບບເຊິ່ງໜ້າ ແລະທາງໄກ.

ໂອກາດນີ້ທ່ານ ພຸດ ສິມມາລາວົງ ກ່າວວ່າ: ມື້ນີ້ເປັນມື້ໄຂສົກຮຽນໃໝ່ໃນທຸກຊັ້ນທຸກສາຍໃນຂອບເຂດທົ່ວປະເທດ ສຳລັບສົກຮຽນ 2023-2024 ຢ່າງເປັນທາງການ ໂດຍອີງຕາມປະຕິທິນການສຶກສາກະຊວງ ສສກ ໄດ້ກຳນົດເອົາວັນທີ 1 ກັນຍາ ຂອງທຸກປີ ເປັນວັນເລີ່ມຕົ້ນສົກຮຽນໃໝ່ບໍ່ວ່າຈະຢູ່ໃນສະພາບປົກກະຕິ ຫຼືຢູ່ໃນສະພາບທີ່ມີຄວາມຫຍຸ້ງຍາກແນວໃດກໍຕາມການຈັດການຮຽນການສອນແມ່ນຈະຕ້ອງໄດ້ພະຍາຍາມໃຫ້ດຳເນີນເປັນປົກກະຕິສໍາລັບການເປີດສົກຮຽນໃໝ່ປີນີ້ແມ່ນເປັນອີກສົກຮຽນໜຶ່ງທີ່ມີຄວາມສຳຄັນຫຼາຍ ແລະຈະດຳເນີນຢູ່ໃນສະພາບທີ່ມີທັງຂໍ້ສະດວກ ແລະສິ່ງທ້າທາຍຫຼາຍຢ່າງແຕ່ເຖິງຢ່າງໃດກໍຕາມຕໍ່ໜ້າສະພາບ ແລະສິ່ງທ້າທາຍດັ່ງກ່າວພັກ ແລະລັດຖະບານ ຍາມໃດກໍໄດ້ເອົາໃຈໃສ່ ແລະເປັນຫ່ວງເປັນໄຍຕໍ່ວຽກງານການສຶກສາວິທະຍາສາດ ແລະກີລາ ສະນັ້ນກະຊວງ ສສກ ຈະໄດ້ສຸມທຸກກຳລັງແຮງນຳໃຊ້ຊັບພະຍາກອນທີ່ມີພ້ອມດ້ວຍຄວາມຮັບຜິດຊອບຂອງບຸກຄະລາກອນ ພາຍໃນຂົງເຂດຂອງຕົນ ແລະຕ້ອງໄດ້ປະສານສົມທົບລະຫວ່າງຂົງເຂດການສຶກສາ ກັບຂະແໜງການ ແລະ ພາກສ່ວນທີ່ກ່ຽວຂ້ອງອື່ນໆ ເພື່ອເຮັດໃຫ້ການດໍາເນີນການຮຽນການສອນໃນສົກຮຽນນີ້ເປັນຂະບວນຟົດຟື້ນກວ່າເກົ່າເຮັດໃຫ້ຕົວເລກຄາດໝາຍຂອງຂະແໜງການສຶກສາວິທະຍາສາດ ແລະກີລາ ບັນລຸຕາມຄາດໝາຍໃຫ້ຫຼາຍຂຶ້ນ.

ທ່ານລັດຖະມົນຕີ ສສກ ກ່າວອີກວ່າ: ພິທີໃນຄັ້ງນີ້ພວກເຮົາໄດ້ຮັບຊົມ ແລະຮັບຟັງບົດປາໄສຂອງທ່ານ ນາຍົກລັດຖະມົນຕີ ໃນໂອກາດພິທີໄຂສົກຮຽນໃໝ່ ຮັບຊົມການປະກອບຄໍາເຫັນຂອງນ້ອງນັກຮຽນຕົວແທນຄູອາຈານ ແລະ ຄະນະພັດທະນາການສຶກສາຂັ້ນບ້ານເຊິ່ງເປັນຕົວແທນໃຫ້ແກ່ນ້ອງນັກຮຽນຄູອາຈານ ແລະ ຄະນະພັດທະນາການສຶກສາໃນແຕ່ລະຂັ້ນໃນຂອບເຂດທົ່ວປະເທດໃນໂອກາດທີ່ມີຄວາມໝາຍສຳຄັນນີ້ຂໍຕາງໜ້າຄະນະພັກຄະນະນຳກະຊວງ ສສກ ແລະໃນນາມສ່ວນຕົວຂໍນໍາເອົາຄວາມເປັນຫ່ວງເປັນໄຍຄວາມສາມັກຄີຮັກແພງອັນອົບອຸ່ນມາຍັງຜູ້ບໍລິຫານການສຶກສາຄູອາຈານ ແລະນັກຮຽນນັກສຶກສາຂໍຮຽກຮ້ອງໃຫ້ຈົ່ງພ້ອມຈິດພ້ອມໃຈກັນຈັດຕັ້ງປະຕິບັດແຜນການຮຽນການສອນສົກຮຽນ 2023-2024 ດ້ວຍຄວາມເປັນເຈົ້າການ ແລະມີຄວາມຮັບຜິດຊອບສູງພ້ອມກັນຜ່ານຜ່າຄວາມຫຍຸ້ງຍາກນາໆປະການທີ່ພວກເຮົາກໍາລັງປະເຊີນຢູ່ນຳເອົາແສງສະຫວ່າງຄວາມຮູ້ຄວາມສາມາດຄຸນສົມບັດ ແລະທັກສະດ້ານຕ່າງໆໃຫ້ແກ່ລູກຫຼານຂອງພວກເຮົາເພື່ອສ້າງການຫັນປ່ຽນຢ່າງຕັ້ງໜ້າໃນວຽກງານສຶກສາວິທະຍາສາດ ແລະກີລາ-ກາຍະກຳໃຫ້ມີຜົນສຳເລັດໃໝ່ໃຫຍ່ຫຼວງກວ່າເກົ່າ.
ທີ່ມາ: ວຽງຈັນໃໝ່

แชร์