ຄວາມຄືບຫນ້າການແກ້ໄຂດິນເຈື່ອນຖົມທາງເຂດພູໄຮ ແລະຍັງມີລົດຕິດຄ້າງ 7 ຄັນ ຈາກລົດທັງຫມົດ 94 ຄັນ

ຕາມການລາຍງານຂອງພະແນກ ໂຍທາທິການ ແລະຂົນສົ່ງ ແຂວງບໍລິຄໍາໄຊ ໃນວັນທີ 30 ສິງຫາ 2023 ຜ່ານມານີ້ວ່າ: ຄວາມຄືບໜ້າໃນການແກ້ໄຂດິນເຈື່ອນຖົມສັ້ນທາງ ເລກ 8 (ເຂດພູໄຮ) ແຕ່ກິໂລແມັດ 43+300-53+300 ນັບແຕ່ວັນທີ 4-30 ສິງຫາ 2023 (ລວມ 26 ວັນ) ແມ່ນສາມາດທະລຸເສັ້ນທາງຊອດກັນໄດ້ 100% ແລ້ວ, ສ່ວນພາຫະນະແມ່ນຍັງບໍ່ສາມາດສັນຈອນໄປໄດ້ ເນື່ອງຈາກວ່າ ໜ້າທາງບາງຂຸດຍັງມີຂີ້ຕົມ, ຍັງແຄບ, ທາງຍັງຍຸບໂຕ, ບາງຈຸດໜ້າທາງຖືກກັດເຊາະແຄບເຂົ້າ, ທັງເຫວເລິກ ແລະສ່ຽງທີ່ຈະມີດິນ, ຫີນ ເຈື່ອນລົງມາຖົມທາງຕື່ມ.

ປະຈຸບັນພະແນກໂຍທາທິການ ແລະຂົນສົ່ງ ແຂວງບໍລິຄຳໄຊ ໄດ້ສົມທົບກັບກົມຂົວທາງເພື່ອສືບຕໍ່ແກ້ໄຂສຸກເສີນເພື່ອໃຫ້ລົດສັນຈອນໄປມາໄດ້ໂດຍໄດ້ສຸມໃສ່ແກ້ໄຂເປີດບາງຈຸດທີ່ມີຄວາມເໝາະສົມ ເພື່ອໃຫ້ລົດສາມາດຫລີກກັນໄດ້, ສ່ວນຈຸດທີ່ຍຸບໂຕກໍຈະໄດ້ຖົມຫີນ ແລະ ອື່ນໆ. ຢ່າງໃດກໍຕາມຫ້າມລົດບັນທຸກ, ລົດກະບະ, ລົດເກງ, ລົດຮຸນໄດ,ລົດໂດຍສານຜ່ານເສັ້ນທາງເລກ 8 ຊ່ວງນາຫີນ-ໜອງກອກ ເນື່ອງຈາກວ່າເສັ້ນທາງຍັງບໍ່ຮັບປະກັນຄວາມປອດໄພ ແລະ ຍັງມີດິນເຈື່ອນຢູ່. ກໍລະນີ ປະຊາຊົນເຂດໃກ້ຄຽງຫາກມີຄວາມຈໍາເປັນແມ່ນສາມາດໃຊ້ລົດຂັບເຄື່ອນສີ່ລໍ້, ແຕ່ຕ້ອງລະມັດລະວັງຄວາມປອດໄພ.

ສຳລັບພາຫະນະທີ່ຕົກຄ້າງທັງໝົດມີ 94 ຄັນ (ຕາມຂໍ້ມູນຄວາມເປັນຈິງ) ໃນນັ້ນ, ລົດບັນທຸກ 22 ລໍ້ 82 ຄັນ, ລົດເມ 45 ບ່ອນນັ່ງ 1 ຄັນ, ລົດກະບະ 8 ຄັນ, ປະເພດຕູ້ຈິບ 3 ຄັນ; ມາຮອດວັນທີ 30 ສິງຫາ ສາມາດລະບາຍລົດອອກຈາກຈຸດດິນເຈື່ອນຖົມທາງໄດ້ທັງໝົດ 87 ຄັນ, ຍັງຕິດຄ້າງ 7 ຄັນ. ໃນນັ້ນ, ມີລົດທີ່ດິນເຈື່ອນຊຸຕົກເຫວ 2 ຄັນ, ລົດທີ່ຖືກດິນຖົມ 2 ຄັນ, ລົດສູນຫາຍ 2 ຄັນ (ຕາມຂໍ້ມູນຈາກຜູ້ຂັບຂີ່ລົດແຕ່ບໍ່ເຫັນລົດຕົວຈິງ ແລະອີກ 1 ຄັນ ເຈົ້າຂອງລົດຍັງບໍ່ທັນເຄື່ອນຍ້າຍອອກໄປ ຍ້ອນເປັນລົດໜັກແກ່ຕູ້ຄອນເທັນເນີ ອວ່າຍຫົວໄປທາງນາຫີນ ເສັ້ນທາງບໍ່ຮັບປະກັນໄດ້ ແລະບໍ່ສາມາດອ່ວາຍກັບໄດ້.

ສຳລັບຄວາມຫຍຸ້ງຍາກໃນການແກ້ໄຂດິນເຈື່ອນຖົມສັ້ນທາງ ເລກ 8 (ເຂດພູໄຮ) ຍ້ອນຍັງມີຝົນຕົກໜັກໃນຕອນກາງຄືນເຮັດໃຫ້ປະລິມານນໍ້າຝົນໃນຕອນເຊົ້າຍັງມີຫລາຍ ແລະຍັງມີດິນເຈື່ອນລົງມາຕື່ມຈໍານວນຫລາຍ ແລະມີຕົ້ນໄມ້ທັບຖົມປົນກັນ, ມີຫີນກ້ອນໃຫຍ່ເຂື່ອນທັບຕາມແລວທາງຄວາມສູງຂອງດິນທີ່ເຈື່ອນລົງມາທັບຖົມໃສ່ທາງຄວາມສູງສະເລ່ຍປະມານ 3-12 ແມັດ.
ທີ່ມາ ຂປລ

แชร์