ເປີດບໍລິສັດລັດ ບໍລິຫານໜີ້ ແລະຊັບສິນ ຈໍາກັດຜູ້ດຽວ

ວັນທີ 29 ສິງຫາ 202 ໄດ້ຈັດພິທີເປີດໂຕ ບໍລິສັດລັດ ບໍລິຫານໜີ້ ແລະຊັບສິນ ຈໍາກັດຜູ້ດຽວຂຶ້ນ, ໂດຍການໃຫ້ກຽດເຂົ້າຮ່ວມຂອງທ່ານ ບຸນເຫຼືອ ສິນໄຊວໍຣະວົງ ຜູ້ວ່າການ ທະນາຄານແຫ່ງ ສປປ ລາວ ພ້ອມດ້ວຍພາກສ່ວນທີ່ກ່ຽວຂ້ອງ.

ທ່ານ ນາງ ຄໍາຫຼ້າ ເຮືອນມະນີວົງ ຮອງຫົວໜ້າກົມຄຸ້ມຄອງທະນາຄານທຸລະກິດ, ທຫລ ໄດ້ລາຍງານວ່າ: ການກະກຽມຫັນສູນບໍລິການເກັບຊື້ໜີ້ ແລະຮັບຝາກເກັບໜີ້ມາເປັນນິຕິບຸກຄົນແມ່ນທະນາຄານແຫ່ງ ສປປ ລາວ ໄດ້ມີການແຕ່ງຕັ້ງຄະນະຮັບຜິດຊອບເພື່ອຄົ້ນຄວ້າສ້າງບົດວິພາກເສດຖະກິດ-ເຕັກນິກໃນການສ້າງຕັ້ງບໍລິສັດລັດ ບໍລິຫານໜີ້ ແລະຊັບສິນ ຈໍາກັດຜູ້ດຽວ ພ້ອມທັງສ້າງນິຕິກໍາເພື່ອຮອງຮັບການເຄື່ອນໄຫວວຽກງານຂອງບໍລິສັດດັ່ງກ່າວ. ໂດຍໄດ້ມີການສຶກສາຄົ້ນຄວ້າອີງຕາມບົດຮຽນສາກົນ ແລະພາກພື້ນ ໂດຍສະເພາະບົດຮຽນຂອງປະເທດ ສສ. ຫວຽດນາມ ແລະປະເທດໄທ ເຫັນວ່າມີຄວາມຈໍາເປັນທີ່ຈະຕ້ອງໄດ້ສ້າງຕັ້ງເປັນລັດວິສາຫະກິດເພື່ອເປັນການບໍລິຫານໜີ້ເສຍ ແລະຊັບສິນລໍຖ້າຂາຍຂອງສະຖາບັນການເງິນ.

ການສ້າງຕັ້ງບໍລິສັດດັ່ງກ່າວຂຶ້ນມາແມ່ນຈະເຮັດໃຫ້ທະນາຄານທຸລະກິດ ແລະສະຖາບັນການເງິນໄດ້ຮັບການຊ່ວຍເຫຼືອໃນການແກ້ໄຂໜີ້ບໍ່ເກີດດອກອອກຜົນ ແລະ ຊັບສິນລໍຖ້າຂາຍ, ມີບ່ອນແກ້ໄຂໜີ້ສະເພາະ, ພ້ອມທັງເຮັດໃຫ້ທະນາຄານທຸລະກິດ ແລະສະຖາບັນການເງິນມີສະພາບຄ່ອງດີຂຶ້ນເມື່ອມີການຂາຍຊັບສິນ ແລະ ໜີ້ເສຍອອກໃຫ້ບໍລິສັດດັ່ງກ່າວ. ພ້ອມນີ້, ເມື່ອໄດ້ປ່ຽນເຈົ້າໜີ້ຈາກທະນາຄານທຸລະກິດມາຢູ່ກັບບໍລິສັດດັ່ງກ່າວສັງຄົມ ແລະ ລູກໜີ້ກໍຈະໄດ້ຮັບນະໂຍບາຍຕ່າງໆຢ່າງສົມເຫດສົມຜົນ ເປັນຕົ້ນແມ່ນ ການຢືດເວລາຊໍາລະໜີ້, ການປັບປຸງໂຄງສ້າງໜີ້, ນະໂຍບາຍປັບຫຼຸດອັດຕາດອກເບ້ຍປົກກະຕິ ແລະ ປັບໄໝ ຫຼືຫຼຸດມູນຄ່າໜີ້ສ່ວນໃດສ່ວນໜຶ່ງ ແລະ ນະໂຍບາຍດ້ານອື່ນໆ ຊຶ່ງຈະສາມາດຟື້ນຟູທຸລະກິດຂອງລູກໜີ້ໃຫ້ສາມາດກັບຄືນມາເຄື່ອນໄຫວໄດ້ປົກກະຕິ, ສ້າງວຽກເຮັດງານທໍາ ແລະສ້າງລາຍຮັບໃຫ້ແກ່ຊຸມຊົນ, ຊ່ວຍຊຸກຍູ້ການຜະລິດພາຍໃນ, ສ້າງຄວາມເຂັ້ມແຂງໃຫ້ແກ່ເສດຖະກິດຂອງ ສປປ ລາວ.

ຫ້ອງວ່າການສໍານັກງານນາຍົກລັດຖະມົນ ແລະກະຊວງການເງິນໄດ້ອອກຂໍ້ຕົກລົງອະນຸມັດໃຫ້ສ້າງຕັ້ງບໍລິສັດດັ່ງກ່າວ ແລະໄດ້ຂຶ້ນທະບຽນວິສາຫະກິດຢ່າງຖືກຕ້ອງຕາມກົດໝາຍເພື່ອສ້າງຕັ້ງເປັນ ບໍລິສັດລັດບໍລິຫານໜີ້ ແລະຊັບສິນຈໍາກັດຜູ້ດຽວ ຊຶ່ງເປັນວິສາຫະກິດຂອງລັດ, ໃນຮູບແບບສະຖາບັນການເງິນ, ມີທຶນຈົດທະບຽນ 300.000.000.000 (ສາມຮ້ອຍຕື້ກີບ)ແລະ ເຄື່ອນໄຫວດໍາເນີນທຸລະກິດບໍລິຫານໜີ້ ແລະຊັບສິນພາຍໃຕ້ກົດໝາຍວ່າດ້ວຍວິສາຫະກິດ ແລະກົດໝາຍອື່ນໆທີ່ກ່ຽວຂ້ອງຂອງ ສປປ ລາວ.

ທີ່ມາ: ທະນາຄານແຫ່ງ ສປປ ລາວ

แชร์