ຊຸກຍູ້ການລ້ຽງໄກ່ລາດ ເປັນເອກະລັກປີ້ງໄກ່ນາປົ່ງ

ບໍລິສັດພັດທະນາແຫລ່ງທ່ອງທ່ຽວນໍ້າຕົກຕາດເຍືອງ ເມືອງປາກຊ່ອງ ແຂວງຈຳປາສັກ ຮ່ວມກັບອົງການປົກຄອງເມືອງຄົງເຊໂດນ ແຂວງສາລະວັນ ລົງຊູກຍູ້ພໍ່ແມ່ປະຊາຊົນ 8 ບ້ານເທສະບານຂອງເມືອງ ເພື່ອຟື້ນຟູການຜະລິດປີ້ງໄກ່ນາປົ່ງ ໃຫ້ກ້າວໄປສູ່ຄຸນນະພາບໃໝ່ທີ່ດີ ແລະຮັກສາເອກະລັກສະເພາະຂອງຕົນ, ທັງຫວນຄືນມູນເຊື້ອປີ້ງໄກ່ນາປົ່ງທີ່ມີມາຫລາຍກວ່າ 100 ປີ ທີ່ໄດ້ສູ້ຊົນຈົນກາຍເປັນທ່າແຮງຫລັກ, ກາຍເປັນຜະລິດຕະພັນສິນຄ້າໂອດັອບ ແລະສ້າງວຽກເຮັດງານທຳ, ສ້າງລາຍຮັບທີ່ໝັ້ນຄົງຕິດພັນກັບການປັບປຸງຄຸນນະພາບ, ປັບປຸງຂອດບໍລິການ ແລະ ສ້າງສິ່ງອໍານວຍຄວາມສະດວກໃນດ້ານຕ່າງໆໃຫ້ກັບຜູ້ມາແວ່ຊື້, ແວ່ຮັບປະທານ ຫລື ທ່ອງທ່ຽວໃນຂອບເຂດບ້ານນາປົ່ງ ໄດ້ຮັບມາດຕະຖານ, ມີບັນຍາຄຶກຄື້ນ ແລະກາຍເປັນທີ່ນິຍົມຂອງນັກທ່ອງທ່ຽວທັງພາຍໃນ ແລະຕ່າງປະເທດ.

ທ່ານນາງ ສອນທິດາ ອຸນາພົນ ຜູ້ອຳນວຍການ ບໍລິສັດພັດທະນາແຫລ່ງທ່ອງທ່ຽວນໍ້າຕົກຕາດເຍືອງ ເມືອງປາກຊ່ອງ ໄດ້ໃຫ້ສຳພາດວ່າ: ຍ້ອນໄດ້ຮັບຄວາມໄວ້ວາງໃຈຈາກອົງການປົກຄອງເມືອງຄົງເຊໂດນ, ຍ້ອນເຫັນໄດ້ທ່າແຮງທີ່ສຳຄັນ ແລະກາລະໂອກາດຕ່າງໆ ເພື່ອຊຸກຍູ້, ສົ່ງເສີມພໍ່ແມ່ປະຊາຊົນ, ຜູ້ປະກອບການຟື້ນຟູ, ພັດທະນາການບໍລິການປີ້ງໄກ່ນາປົ່ງ ໃຫ້ກ້າວໄປສູ່ຄຸນນະພາບ ທີ່ໄດ້ຮັບມາດຕະຖານ ໂດຍໄດ້ສະເໜີແນວຄວາມຄິດ ແລະ ເຈດຈຳນົງຂອງຕົນໃນການລົງຊຸກຍູ້ຄັ້ງນີ້ ໃຫ້ມີບາດກ້າວໃໝ່, ມີການຫັນປ່ຽນຢ່າງຈິງຈັງ, ພ້ອມພຽງກັນປັບປຸງໄປຕາມກົນໄກເປັນຕົ້ນປັບປຸງຮ້ານບໍລິການຂາຍປິ້ງໄກ່ໃຫ້ກວ້າງຂວາງ, ເປັນລະບຽບຮຽບຮ້ອຍ, ມີສະຖານທີ່ຈອດລົດ, ເອກະພາບດ້ານອອກແບບຮ້ານທີ່ເປັນເອກະລັກ ເປັນຊົງລາວ ຫລື ຊົນເຜົ່າ, ປັບປຸງການບໍລິການໃນແຕ່ລະຮ້ານໃຫ້ດີຂຶ້ນ ແລະຄົ້ນຄວ້າບ້ານທີ່ຈະລິເລີ່ມລ້ຽງໄກ່ລາດເພື່ອຮັກສາຄ່ານິຍົມເປັນໄກ່ທີ່ລ້ຽງເອງ ແລະ ເອກອ້າງໄດ້ເຊິ່ງເອກະລັກຂອງຕົນ ສະໜອງຕະຫລາດໂດຍການສະໜັບໜູນຂອງບໍລິສັດດັ່ງກ່າວ ເປັນຕົ້ນ ດ້ານບົດຮຽນ, ເຕັກນິກວິທີການ, ການບົວລະບັດຮັກສາ, ການສັກຢາປ້ອງກັນພະຍາດ, ແນວພັນ ແລະການຈັດສັນແບ່ງຄວາມຮັບຜິດຊອບ ເຊັ່ນ: ການລ້ຽງ, ການຈັດຊື້ໄກ່, ຄົວ, ປຸງແຕ່ງ ແລະປີ້ງໄກ່ຂາຍປັນຜົນກຳໄລຢ່າງເໝາະສົມ, ເປັນເອກະພາບກັນ, ພ້ອມຊຸກຍູ້ຜັກດັນວຽກດັ່ງກ່າວໄດ້ເກີດດອກອອກຜົນ ແລະປະກົດຜົນເປັນຈິງ ໃນໄວໆນີ້ ແນໃສ່ຕ້ອນຮັບກອງປະຊຸມລັດຖະມົນຕີທ່ອງທ່ຽວອາຊຽນປີ 2024, ການເປັນປະທານ ກອງປະຊຸມອາຊຽນ 2024 ທີ່ຈະມາເຖິງນີ້.

ໃນວັນທີ 30 ສິງຫາ 2023 ຜ່ານມາ, ບໍລິສັດພັດທະນາແຫລ່ງທ່ອງທ່ຽວ ນໍ້າຕົກຕາດເຍືອງ ຮ່ວມກັບພາກສ່ວນກ່ຽວຂ້ອງຈັດກອງປະຊຸມເພື່ອການຄົ້ນຄວ້າ, ປະກອບຄໍາຄິດຄຳເຫັນກ່ຽວກັບວຽກດັ່ງກ່າວໂດຍຫລາຍພາກສ່ວນ, ອົງການປົກຄອງເມືອງ, ຂະແໜງການທີ່ກ່ຽວຂ້ອງ ແລະອຳນາດການປົກຄອງບ້ານໄດ້ເຫັນດີ, ເປັນເອກະພາບກຳນົດເອົາບ້ານກຸດມີໄຊ ແລະບ້ານໂຮງເລື່ອຍມີໄຊເປັນຈຸດລິເລີ່ມລ້ຽງໄກ່ລາດ. ພ້ອມນີ້, ທັງບັນດາຜູ້ປະກອບການກໍເຫັນດີປັບປຸງຂອດການບໍລິການຕາມກອງປະຊຸມການປຶກສາຫາລືໃນກ່ອນໜ້ານີ້.
ຂ່າວ-ພາບ: ວິໄລວອນ ສິດທິໄຊ

แชร์