ເມືອງ​ແອດ​ ​ແຈ້ງຫ້າມຜະລິດແປຮູບໜໍ່ໄມ້, ການເກັບຊື້-ຂາຍໝໍ່ໄມ້

ເນື່ອງຈາກວ່າການປົກຫຸ້ມຂອງປ່າໄມ້ມີການຫຼຸດໜ້ອຍຖອຍລົງເພື່ອເຮັດໃຫ້ການຈັດຕັ້ງປະຕິບັດລະບຽບກົດໝາຍ ແລະນິຕິກໍາທີ່ກ່ຽວຂ້ອງກັບວຽກງານຄຸ້ມຄອງປ່າໄມ້ໃຫ້ມີຄວາມເຂັ້ມງວດ ແລະຮັດກຸມ ແລະໃຫ້ພະແນກການ, ຫ້ອງການທີ່ກ່ຽວຂ້ອງຂອງລັດ ແລະອໍານາດການປົກຄອງທ້ອງຖິ່ນຂັ້ນຕ່າງໆໄດ້ເສີມຂະຫຍາຍຄວາມເປັນເຈົ້າການ ໃນການປະຕິບັດພາລະບົດບາດ ສິດ ແລະ ໜ້າທີ່ຂອງຕົນກ່ຽວກັບການຄຸ້ມຄອງປ່າໄມ້ ແລະ ທຸລະກິດໄມ້ໃຫ້ມີປະສິດທິຜົນ ແລະ ເພື່ອສະກັດກັ້ນປະກົດການຫຍໍ້ທໍ້ໃນການລະເມີດກົດໝາຍປ່າໄມ້ດັ່ງນັ້ນ: ຫ້ອງການກະສິກຳ ແລະ​ປ່າໄມ້ເມືອງແອດ ແຂວງຫົວພັນ ຈຶ່ງໄດ້ແຈ້ງມາຍັງຄະນະພັກອຳນາດການປົກຄອງ 77 ບ້ານ ທົ່ວເມືອງແອດເພື່ອຮັບຊາບດັ່ງນີ້:

1. ຫ້າມບໍ່ໃຫ້ພະນັກງານ, ທະຫານ, ຕຳຫຼວດ ປະຊາຊົນຊາວເມືອງແອດ ເກັບໜໍ່ໄມ້ປ່ອງ,​ ມາເຮັດເປັນໜໍ່ໄມ້ແຫ້ງ ເພື່ອເປັນທຸລະກິດຊື້-ຂາຍ ຮັບໃຊ້ໃນຄອບຄົວມີພຽງແຕ່ອະນຸຍາດໃຫ້ເຮັດເປັນແຕ່ອາຫານຕາມປະເພນີຮັບໃຊ້ໃນຄອບຄົວເທົ່ານັ້ນ.

2. ຫ້າມບໍ່ໃຫ້ບັນດາບຸກຄົນ, ນິຕິບຸກຄົນ, ນັກທຸລະກິດ, ທັງພາຍໃນ ແລະຕ່າງປະເທດ ເກັບຊື້-ຂາຍໝໍ່ໄມ້ແຫ້ງສົ່ງອອກທີ່ບໍ່ມີເອກະສານຖືກຕ້ອງຖ້າພົບເຫັນຈະຕ້ອງໄດ້ປະຕິບັດຕາມລະບຽບກົດໝາຍຢ່າງເຂັ້ມງວດ.​

3. ຖ້າບຸກຄົນໃດຫາກມີຈຸດປະສົງເພື່ອຢາກເກັບຊື້-ຂາຍໜໍ່ໄມ້ແຫ້ງໃຫ້ມາພົວພັນປະກອບເອກະສານອະນຸຍາດການເກັບຊື້-ຂາຍນຳຫ້ອງການກະສິກຳ ແລະປ່າໄມ້ເມືອງ ໃຫ້ຖືກຕ້ອງຕາມລະບຽບຫຼັກການ
ຈື່ງສາມາດເກັບຊື້-ຂາຍໄດ້.

4. ມອບໃຫ້ຄະນະພັກອຳນາດການປົກຄອງຂອງບ້ານເປັນຜູ້ແຈ້ງໃຫ້ພໍ່ແມ່ປະຊາຊົນ, ພໍ່ຄ້າຊາວຂາຍທີ່ລັກລອບເກັບຊື້ໜໍ່ໄມ້ແຫ້ງຢູ່ພາຍໃນບ້ານຂອງຕົນໃຫ້ຢຸດເຊົາເກັບຊື້.

ດັ່ງນັ້ນ, ຫ້ອງການກະສິກຳ ແລະປ່າໄມ້ເມືອງແອດຈິ່ງແຈ້ງມາຍັງຄະນະພັກອຳນາດການປົກຄອງ 77 ບ້ານ ໃນທົ່ວເມືອງແອດ ຮັບຊາບ ແລະພ້ອມກັນຈັດຕັ້ງປະຕິບັດໃຫ້ເຂັ້ມງວດ.

แชร์