ລະດົມທຶນຜ່ານ ຕລຊລ ເສີມສ້າງທຸລະກິດໃຫ້ເຂັ້ມແຂງ

ຕະຫຼາດຫຼັກຊັບລາວ (ຕລຊລ) ຮ່ວມກັບເຂດພັດທະນາກວມລວມໄຊເສດຖາ (ຂພຊຖ), ນະຄອນຫຼວງວຽງຈັນ ໄດ້ຈັດສຳມະນາ ພາຍໃຕ້ຫົວຂໍ້: “ເສີມສ້າງທຸລະກິດໃຫ້ເຂັ້ມແຂງຈາກການລະດົມທຶນຜ່ານຕະຫຼາດທຶນລາວ” ຫຼື “Reinforce the business from fund raising through Lao capital market” ໃນວັນທີ 30 ສິງຫາ 2023 ທີ່ຫ້ອງວາງສະແດງ ຂພສຖ ພາຍໃຕ້ການເປັນປະທານຮ່ວມຂອງທ່ານ ນາງ ລັດຕະນາ ອິນທະພົນ ຮອງຫົວໜ້າຫ້ອງການສົ່ງເສີມ ແລະຄຸ້ມຄອງເຂດເສດຖະກິດພິເສດ (ຫຂສພ), ກະຊວງ ແຜນການ ແລະການລົງທຶນ ແລະທ່ານ ສຸພັກ ຖິ່ນໄຊພອນ ຜູ້ອຳນວຍການໃຫຍ່ຕະຫຼາດຫຼັກຊັບລາວ; ພ້ອມນີ້, ມີຜູ້ອໍານວຍການໃຫຍ່ບໍລິສັດຫຼັກຊັບ; ບັນດາບໍລິສັດຈາກ ຂພຊຖ ເຂົ້າຮ່ວມ.

ການຈັດສຳມະນາຄັ້ງນີ້ກໍ່ເພື່ອເສີມສ້າງຄວາມຮູ້ ແລະຄວາມເຂົ້າໃຈກ່ຽວກັບການລະດົມທຶນຜ່ານຕະຫຼາດທຶນໃຫ້ກັບບັນດາບໍລິສັດທີ່ລົງທຶນໃນ ຂພສຖ ໂດຍມີຫຼາຍຫົວຂໍ້ເປັນຕົ້ນ “ເງື່ອນໄຂການອອກຈຳໜ່າຍ ແລະຈົດທະບຽນໃນ ຕລຊລ”; ພ້ອມນັ້ນ, ຜູ້ເຂົ້າຮ່ວມກໍ່ໄດ້ຊ່ວຍຕອບແບບສອບຖາມກ່ຽວກັບການລະດົມທຶນດ້ວຍການອອກຈຳໜ່າຍຫຼັກຊັບ ແລະຈົດທະບຽນໃນ ຕລຊລ ເພື່ອເກັບກໍາຂໍ້ມູນເບື້ອງຕົ້ນ ໂດຍສາມາດສະເກນ QR Code ເພື່ອຕອບແບບສອບຖາມທີ່ມີຢູ່ໃນວາລະການສໍາມະນາ. ນອກນີ້ກໍ່ໄດ້ນໍາສະເໜີໃນຫົວຂໍ້ຂັ້ນຕອນໃນການກະກຽມການອອກຈຳໜ່າຍ ແລະຈົດທະບຽນຫຼັກຊັບ ແລະພ້ອມນີ້, ກໍ່ຍັງມີຄໍາເຫັນອື່ນໆ ທີ່ຕິດພັນກັບຕະຫຼາດທຶນລາວ”.

ທ່ານຮອງ ຫຂສພ ໄດ້ໃຫ້ຂໍ້ຄິດເຫັນ ວ່າ: ນັບແຕ່ປີ 2003 ເຖິງປັດຈຸບັນມີເຂດເສດຖະກິດພິເສດທັງໝົດ 21 ເຂດຢູ່ 8 ແຂວງ, ມີເນື້ອທີ່ຕາມສັນຍາ 34 ພັນກວ່າເຮັກຕາ ແຕ່ເນື້ອທີ່ໄດ້ຮັບການພັດທະນາຕົວຈິງແລ້ວ 13 ພັນກວ່າເຮັກຕາ ຊຶ່ງຫຼາຍເຂດກໍ່ສຸມໃສ່ພັດທະນາພື້ນຖານໂຄງລ່າງ ແລະດຶງດູດການລົງທຶນຈາກນັກລົງທຶນພາຍໃນ ແລະ ຕ່າງປະເທດ. ປັດຈຸບັນໄດ້ມີບໍລິສັດເຂົ້າມາລົງທຶນ ແລະ ຈົດທະບຽນທັງໝົດ 1.235 ບໍລິສັດ ແລະ ໃນວັນທີ 12.01.2023 ຕລຊລ ແລະ ຫຂສພ ໄດ້ບັນລຸການເຊັນບົດບັນທຶກການຮ່ວມມືກັນສ້າງກົນໄກ ແລະຊຸກຍູ້ບໍລິສັດທີ່ຢູ່ໃນເຂດເສດຖະກິດພິເສດເຂົ້າມາລະດົມທຶນຜ່ານຕະຫຼາດທຶນ ແລະຈົດທະບຽນໃນ ຕລຊລ ໂດຍ 2 ຝ່າຍ ຈະຮ່ວມມືກັນໃນການຈັດຕັ້ງເຄື່ອນໄຫວແລກປ່ຽນຂໍ້ມູນ-ຂ່າວສານ ກ່ຽວກັບບັນດາບໍລິສັດເປົ້າໝາຍຈົດທະບຽນໃນ ຕລຊລ; ຈັດກອງປະຊຸມສໍາມະນາ ແລະ ແລກປ່ຽນບົດຮຽນໃນວຽກງານຕະຫຼາດຫຼັກຊັບ, ການຄຸ້ມຄອງບໍລິຫານທີ່ດີ, ບັນຊີ ແລະ ອື່ນໆ ທີ່ເຫັນວ່າຄັນ ແລະ ຈັດງານສົ່ງເສີມທຸລະກິດເພື່ອເຂົ້າຮ່ວມຈົດທະບຽນໃນ ຕລຊລ.

ທ່ານຜູ້ອຳນວຍການໃຫຍ່ ຕລຊລ ມີຄຳເຫັນ ວ່າ: ການພັດທະນາເສດຖະກິດ-ສັງຄົມ ໃນໄລຍະໃໝ່, ການສະໜອງແຫຼ່ງທຶນຈາກທະນາຄານທຸລະກິດພຽງຢ່າງດຽວ ບໍ່ສາມາດຕອບສະໜອງໄດ້ກັບຄວາມຮຽກຮ້ອງຕ້ອງການ ແລະຄຸນລັກສະນະຂອງທຸລະກິດໃນເງື່ອນໄຂໃໝ່. ປັດຈຸບັນ, ຕລຊລ ມີບັນດາວິສາຫະກິດທັງພາກລັດ ແລະ ເອກະຊົນຈົດທະບຽນ 10 ບໍລິສັດ ຊຶ່ງມີມູນຄ່າຈົດທະບຽນທັງໝົດ 9.427 ຕື້ກີບ ແລະຕາມແຜນຍຸດທະສາດປີ 2020-2025 ໄດ້ກໍານົດຄາດໝາຍສູ້ຊົນໃນການພັດທະນາຕະຫຼາດທຶນຂອງ ສປປ ລາວ ທີ່ຕິດພັນກັບການຊຸກຍູ້ສົ່ງເສີມວິສາຫະກິດລະດົມທຶນ ແລະຈົດທະບຽນໃນ ຕລຊລ ໃຫ້ໄດ້ຢ່າງໜ້ອຍ 15-18% ຂອງ GDP ເຮັດໃຫ້ຕະຫຼາດທຶນມີການເຕີບໂຕ ແລະເຂັ້ມແຂງຄຽງຄູ່ກັບການພັດທະນາເສດຖະກິດຂອງຊາດ; ຕລຊລ ໄດ້ສຸມໃສ່ຊຸກຍູ້ສົ່ງເສີມບັນດາຫົວໜ່ວຍທຸລະກິດ ທີ່ມີທ່າແຮງເຂົ້າມາລະດົມທຶນເພື່ອນຳໄປໃຊ້ໃນການຂະຫຍາຍທຸລະກິດ. ສະນັ້ນ, ການສໍາມະນາຄັ້ງນີ້ກໍ່ເພື່ອເປັນຈຸດເລີ່ມຕົ້ນທີ່ດີໃຫ້ກັບບັນດາບໍລິສັດທີ່ລົງທຶນໃນ ຂພຊຖ ໃຫ້ມີຄວາມຮັບຮູ້ກ່ຽວກັບການເຂົ້າຫາແຫຼ່ງທຶນຜ່ານຕະຫຼາດທຶນ.

ຂ່າວ: ຣັດສະໝີ ດວງສັດຈະ

แชร์