ຫຼວງນໍ້າທາ ກຽມຮັບມືໄພພິບັດ
ຫ້ອງວ່າການແຂວງ ແຂວງຫຼວງນໍ້າທາໄດ້ອອກແຈ້ງການໃນວັນທີ 30 ສິງຫາ 2023, ເລື່ອງການກະກຽມຮັບມືໄພພິບັດທີ່ອາດຈະເກີດຂຶ້ນໃນລະຫວ່າງເດືອນສິງຫາ, ເດືອນກັນຍາ ແລະເດືອນຕຸລາ 2023 ເຊິ່ງເນື້ອໃນລາຍລະອຽດມີດັ່ງນີ້:
- ມອບໃຫ້ບັນດາພະແນກການ, ອົງການຈັດຕັ້ງພັກ-ລັດ ສືບຕໍ່ເຜີຍແຜ່ຂໍ້ມູນອຸຕຸນິຍົມ ສະພາບການປ່ຽນແປງດິນຟ້າອາກາດໃຫ້ເປັນປົກກະຕິດ້ວຍຫຼາຍຮູບການ, ພ້ອມທັງແຈ້ງເຕືອນໃຫ້ພໍ່ແມ່ປະຊາຊົນບັນດາເຜົ່າໃນຂອບເຂດທົ່ວແຂວງໃຫ້ມີການເພີ່ມທະວີສະຕິລະວັງຕົວໃນການກຽມຄວາມພ້ອມຮອບດ້ານເພື່ອຮັບມືກັບເຫດການອຸທົກກະໄພທໍາມະຊາດທີ່ອາດເກີດຂຶ້ນໃນຕໍ່ຫນ້າ.
2. ມອບໃຫ້ຄະນະກໍາມະການປ້ອງກັນ ແລະຄວບຄຸມໄພພິບັດຂັ້ນແຂວງເປັນໃຈກາງສົມທົບກັບພະແນກການທີ່ກ່ຽວຂ້ອງ ແລະເມືອງ 5 ເມືອງ ສ້າງສູນບັນຊາການສຸກເສີນ ແລະກໍານົດແຜນການໃນການແກ້ໄຂສະພາບສຸກເສີນຮີບດ່ວນທີ່ເກີດຈາກເຫດການອຸທົກກະໄພທໍາມະຊາດ (ດິນພູເຊາະເຈື່ອນ, ນໍ້າປ່າໄຫລຊຸແຮງ ແລະນໍ້າຖ້ວມ) ຢູ່ບັນດາເມືອງໃນເດືອນກໍລະກົດ ແລະສິງຫາ 2023 ຜ່ານມານີ້ເພື່ອແກ້ໄຂສຸກເສີນຮີບດ່ວນ ບັນດາພື້ນຖານໂຄງລ່າງທີ່ໄດ້ຮັບຜົນເສຍຫາຍຈາກໄພພິບັດໃຫ້ສາມາດນໍາໃຊ້ເບື້ອງຕົ້ນ ແລະຕອບສະຫນອງໃຫ້ການຜະລິດ, ບໍລິການຄົມມະນາຄົມ-ຂົນສົ່ງ ສາມາດດໍາເນີນການເຄື່ອນໄຫວໄດ້ໂດຍສະເພາະຢູ່ພາກເຫນືອ 2 ຈຸດ ພາກກາງ ແລະ ພາກໃຕ້ບ່ອນລະ 1 ຈຸດ; ໃນໄລຍະລໍຖ້າການສ້ອມແປງຟື້ນຟູສູ່ສະພາບປົກກະຕິໃຫ້ນໍາໃຊ້ 2 ລັກສະນະເປົ້າຫນາຍໂຄງການຄື: ຟື້ນຟູສ້ອມແປງໂຄງການທີ່ໄດ້ຮັບການແກ້ໄຂສຸກເສີນໄປແລ້ວ ແລະ ຟື້ນຟູສ້ອມແປງໂຄງການທີ່ໄດ້ຮັບຜົນກະທົບໃນລະດັບບໍ່ຮຸນແຮງ ( ແຕ່ບໍ່ໄດ້ແກ້ໄຂສຸກເສີນ) ແມ່ນໃຫ້ດໍາເນີນການສໍາຫຼວດອອກແບບ ແລະປະກອບເອກະສານຄົບຊຸດພ້ອມທັງປະເມີນຜົນໂຄງການແລ້ວຈັດບຸລິມະສິດສະເຫນີລັດລັດຖະບານແລະສະພາແຫ່ງຊາດພິຈາລະນາຮັບຮອງ.
ບ່ອນສົ່ງ.
3. ມອບໃຫ້ພະແນກແຮງງານ ແລະສະຫວັດດີການສັງຄົມແຂວງໃນນາມກອງເລຂາຄະນະກໍາມະການປ້ອງກັນ ແລະຄວບຄຸມໄພພິບັດຂັ້ນແຂວງສືບຕໍ່ຈັດສົ່ງເຄື່ອງອຸປະໂພກ-ບໍລິໂພກ ເພື່ອນໍາສົ່ງຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມ; ສືບຕໍ່ສັງລວມຕິດຕາມຂໍ້ມູນຜົນເສຍຫາຍຈາກໄພພິບັດເພື່ອຈັດສັນງົບປະມານ ໃຫ້ບັນດາແຂວງແກ້ໄຂຜົນເສຍຫາຍຈາກໄພພິບັດຕາມສະພາບຄວາມເປັນຈິງ ແລະຄວາມຕ້ອງການຄວາມຊ່ວຍເຫຼືອຈາກບັນດາແຂວງເພື່ອຄົ້ນຄວ້າ ແລະຈັດສົ່ງເຄື່ອງຊ່ວຍເຫຼືອບັນເທົາທຸກໃຫ້ບັນດາແຂວງ.
4. ມອບໃຫ້ພະແນກໂຍທາທິການ ແລະຂົນສົ່ງເເຂວງຮິບຮ້ອນປະສານສົມທົບກັບຂະແຫນງການກ່ຽວຂ້ອງໃນການລົງຕິດຕາມຊຸກຍູ້ບໍລິສັດຜູ້ຮັບເຫນົາກໍາລັງແກ້ໄຂສຸກເສີນໂດຍສະເພາະດິນເຈື່ອນຖົມທາງ ແລະຮອງລະບາຍນໍ້າເພື່ອເຮັດໃຫ້ການສັນຈອນສາມາດນໍາໃຊ້ໄດ້ເປັນປົກກະຕິ.
5. ມອບໃຫ້ພະແນກກະສິກໍາ ແລະປ່າໄມ້ແຂວງເປັນເຈົ້າການສົມທົບກັບພາກສ່ວນກ່ຽວຂ້ອງ ລົງເກັບກໍາຂໍ້ມູນ ແລະ ສັງລວມຜົນເສຍຫາຍຈາກໄພພິບັດທາງທໍາມະຊາດແລ້ວຂຶ້ນແຜນຟື້ນຟູການຜະລິດກະສິກໍາ ແລະ ຮັບປະກັນສະບຽງອາຫານໃນທົ່ວສັງຄົມ; ໂດຍການແນະນໍາການນໍາໃຊ້ເຕັກນິກເຂົ້າໃນການຜະລິດ, ສະຫນອງ ແນວພັນການຜະລິດກະສິກໍາ (ເເນວພັນພຶດ ເເລະສັດ ) ຢາປ້ອງກັນ ເເລະປິ່ນປົວພະຍາດສັດໃຫ້ພຽງພໍ ແລະສອດຄ່ອງກັບສະພາບຄວາມເປັນຈິງ.
- 6. ມອບໃຫ້ພະແນກສາທາລະນະສຸກແຂວງສືບຕໍ່ສັງລວມຄໍາສະເຫນີ, ຕິດຕາມເຝົ້າລະວັງ ເເລະກຽມພ້ອມທີມເຝົ້າລະວັງສຸຂະນາໄມ, ແຟດປິ່ນປົວ, ຢາປົວພະຍາດຕາມລະດູການທີ່ສາມາດເກີດຂຶ້ນນໍາທ້ອງຖິ່ນໃນທົ່ວແຂວງ ແລະສະຫນອງໃຫ້ແຕ່ລະຂະແຫນງການຕາມການສະເຫນີ; ສືບຕໍ່ເຝົ້າລະວັງພະຍາດຕາມລະດູການເປັນຕົ້ນ: ໄຂ້ຍຸງລາຍ ແລະອື່ນໆຕ້ອງໄດ້ໂຄສະນາເຜີຍແຜ່ທາງວິທະຍຸ, ໂທລະພາບ ແລະສື່ສັງຄົມອອນລາຍຕ່າງໆ ເພື່ອໃຫ້ປະຊາຊົນຮັບຮູ້ຢ່າງເປັນປົກກະຕິເພື່ອຕອບໂຕໄດ້ຢ່າງທັນການ.
- 7. ມອບໃຫ້ພະແນກການເງິນແຂວງປະສານສົມທົບກັບກະຊວງການເງິນເພື່ອດໍາເນີນການສະເຫນີຂໍອະນຸມັດນໍາໃຊ້ເງິນບ້ວງປະກັນໄພພິບັດຂະຫນາດນ້ອຍໃນມູນຄ່າລວມ 1,5 ລ້ານໂດລາສະຫະລັດ ຕາມຂັ້ນຕອນ ແລະນິຕິກໍາທີກ່ຽວຂ້ອງ.
8. ມອບໃຫ້ພະແນກພະລັງງານ ແລະບໍ່ແຮ່ແຂວງເປັນໃຈກາງປະສານສົມທົບກັບລັດວິສາຫະກິດໄຟຟ້າລາວ ແລະຂະແຫນງການກ່ຽວຂ້ອງຄົ້ນຄວ້າຂຶ້ນແຜນຕິດຕັ້ງຫມໍ້ໄຟສໍາຮອງຢູ່ບັນດາເມືອງແລ້ວລາຍງານຂັ້ນເທິງພິຈາລະນາຕາມລະບຽບການ. ສືບຕໍ່ປະສານສົມທົບກັບບັນດາເຂື່ອນໄຟຟ້າ ແລະພາກສ່ວນກ່ຽວຂ້ອງຕິດຕາມເກັບກໍາຂໍ້ມູນລະດັບນໍ້າຢ່າງໃກ້ຊິດ ເເລະເປັນປົກກະຕິ.
