ໂຮງຮຽນສີຫາວົງ ວິທະຍາ ຮ່ວມກັບສູນສຶກສາສາກົນ ລາວ-ຈີນ ພັດທະນາຊັບພະຍາກອນມະນຸດ

ໃນວັນທີ 25 ສິງຫາ 2023 ທີ່ຜ່ານມາໂຮງຮຽນ ສີຫາວົງ ວິທະຍາ ໄດ້ຈັດພິທີເຊັນບົດບັນທຶກຄວາມເຂົ້າໃຈ MOU ຮ່ວມມືກັນທາງດ້ານວິຊາການ ແລະ ພັດທະນາຊັບພະຍາກອນມະນຸດແບບຍືນຍົງ ລະຫວ່າງ ໂຮງຮຽນ ສີຫາວົງ ວິທະຍາ ແລະ ສູນສຶກສາສາກົນ ລາວ-ຈີນ ວິທະຍາໄລເຕັກນິກປາກປ່າສັກ ທີ່, ຫ້ອງປະຊຸມໂຮງຮຽນສີຫາວົງ ວິທະຍາ.

ໂດຍການເປັນກຽດເຂົ້າຮ່ວມຂອງ ທ່ານ ສາຍຄຳ ພັນທະວົງ ຮອງຫົວໜ້າກົມອາຊີວະສຶກສາ , ທ່ານ ພົມມີ ໄຊຍະສານ ຫົວໜ້າຫ້ອງການສຶກສາທິການ ແລະກິລາ ເມືອງ ໄຊເສດຖາ , ທ່ານ ປ.ອ ສາຍສະໝອນ ງາມສີ ຜູ້ອຳນວຍການວິທະຍາໄລ ເຕັກນິກປາກປ່າສັກ ພ້ອມດ້ວຍຄະນະ, ທ່ານ ສົມໝາຍ ສີຫາວົງ ທີ່ປຶກສາ ໂຮງຮຽນ ສີຫາວົງ ວິທະຍາ.

ໃນພິທີດັ່ງກ່າວ ທ່ານ ນາງ ບົວລຸນ ລິນທະວົງ ຜູ້ອຳນວຍການໂຮງຮຽນ ສີຫາວົງ ວິທະຍາ ແລະທ່ານ ໂຢວເວີ້ຍ ຜູ້ອຳນວຍການສູນສຶກສາສາກົນ ລາວ-ຈີນ ວິທະຍາໄລ ເຕັກນິກປາກປ່າສັກ ໄດ້ກ່າວເຖິງຈຸດປະສົງ ແລະ ຄວາມເປັນມາຂອງການຮ່ວມມືຄັ້ງນີ້ວ່າ: ໂດຍອີງຕາມແນວທາງນະໂຍບາຍຂອງພັກ-ລັດຖະບານ ໄດ້ຖືເອົາວຽກງານການສຶກສາເປັນສິ່ງສຳຄັນ ທັງເອົາການສຶກສາໄປອີກບາດກ້າວໜຶ່ງກ່ອນຂະແໜງການອື່ນ ສະນັ້ນແລ້ວທັງສອງຝ່າຍແມ່ນໄດ້ເຫັນດີເຫັນພ້ອມຕໍ່ກັບແນວທາງດັ່ງກ່າວ ແລະ ພ້ອມທີ່ຈະຊ່ວຍພັດທະນາຊັບພະຍາກອນມະນຸດໃຫ້ກາຍເປັນບຸກຄົນທີ່ມີຄວາມຮູ້-ຄວາມສາມາດໃຫ້ທຽບເທົ່າກັບພາກພື້ນ ແລະ ກ້າວໄປສູ່ສາກົນ, ໂດຍສະເພາະການຮ່ວມມືກັບສາກົນ ກໍແມ່ນວຽກໜຶ່ງທີ່ສຳຄັນ ໂຮງຮຽນຂອງພວກເຮົາຈຶ່ງຈະໄດ້ເອົາພາສາຈີນເພີ່ມເຂົ້າໃນຫຼັກສູດການຮຽນ-ການສອນ ແລະ ຮ່ວມມືກັບສູນສຶກສາ ສາກົນລາວ-ຈີນ ສາຂາປະຈຳໂຮງຮຽນສີຫາວົງ ວິທະຍາ ຂຶ້ນເພື່ອສົ່ງເສີມການຮ່ວມມືສານສຳພັນລະຫວ່າງສອງຊາດ ລາວ-ຈີນ.

ໃນໂອກາດດັ່ງກ່າວນີ້ທ່ານ ສາຍຄຳ ພັນທະວົງ ຮອງຫົວໜ້າກົມອະຊີວະສຶກສາກໍໄດ້ມີຄຳເຫັນຕໍ່ກອງປະຊຸມວ່າ: ການຮ່ວມມືທາງດ້ານວິຊາການ ແລະ ພັດທະນາຊັບພະຍາກອນມະນຸດແບບຍືນຍົງໃນຄັ້ງນີ້ຍ່ອມເປັນສິ່ງທີ່ດີເພາະຈະໄດ້ພັດທະນາລູກຫຼານຜູ້ເປັນໜໍ່ແໜງຂອງປະເທດຊາດໃຫ້ກາຍເປັນຄົນທີ່ມີຄວາມຮູ້ຄວາມສາມາດ ນອກຈາກພາສາອັງກິດແລ້ວພາສາຈີນ ກໍນັບວ່າເປັນອີກພາສາໜຶ່ງທີ່ສຳຄັນໃນຂະບວນການສື່ສານກັນໃນສັງຄົມປັດຈຸບັນນີ້ອີກດ້ວຍ.

• 30/08/2023