ກົມສ່ວຍສາອາກອນສືບຕໍ່ຝຶກອົບຮົມນໍາໃຊ້ລະບົບຄຸ້ມຄອງຈັດເກັບລາຍຮັບຄ່າທຳນຽມທາງ ແລະພາສີທີ່ດິນ ແບບເອເລັກໂຕຣນິກ

ກົມສ່ວຍສາອາກອນ ກະຊວງການເງິນ ສືບຕໍ່ຈັດຝຶກອົບຮົມການນໍາໃຊ້ລະບົບຄຸ້ມຄອງການຈັດເກັບລາຍຮັບຄ່າທຳນຽມທາງແບບເອເລັກໂຕຣນິກ (RTMS) ແລະ ການນໍາໃຊ້ລະບົບຄຸ້ມຄອງເກັບລາຍຮັບພາສີທີ່ດິນແບບເອເລັກໂຕຣນິກ (LTMS) ໃນຂອບເຂດທົ່ວປະເທດ ຊຸດທີ V ໃນວັນທີ 28 ສິງຫາ-ວັນທີ 1 ກັນຍາ 2023 ໂດຍການເປັນປະທານຂອງ ທ່ານ ໄພທູນ ທ່ຽງລະໄມ ຮອງຫົວໜ້າກົມສ່ວຍສາອາກອນ ກະຊວງການເງິນ, ມີຄະນະຮັບຜິດຊອບການຝຶກອົບຮົມ, ສໍາມະນາກອນຈາກສ່ວຍສາອາກອນ ປະຈໍາເມືອງຂອງແຂວງສະຫວັນນະເຂດ, ຈຳປາສັກ, ຜົ້ງສາລີ, ໄຊສົມບູນ ແລະຫລວງນໍ້າທາ ເຂົ້າຮ່ວມ.

ຊຶ່ງຊຸດຝຶກອົບຮົມໃນຄັ້ງນີ້,ກໍເພື່ອເປັນການຍົກສູງທັກສະ,ຄວາມຮູ້,ຄວາມສາມາດການເປັນຄູຝຶກ, ການນໍາໃຊ້ລະບົບ TaxRis ລະບົບ RTMS ແລະລະບົບ LTMS, ສ້າງຄູຝຶກເພີ່ມໃນການຄຸ້ມຄອງ, ຈັດຕັ້ງປະຕິບັດວຽກງານຫັນເປັນທັນສະໄໝແຕ່ສູນກາງຮອດທ້ອງຖິ່ນ, ສາມາດສ້າງຄວາມເຂັ້ມແຂງດ້ວຍຕົນເອງໃນການຝຶກພະນັກງານພາຍໃນກົມກອງ, ທ້ອງຖິ່ນຂອງຕົນເອງໃນການຄຸ້ມຄອງ, ຕິດຕາມ, ກວດກາການຈັດເກັບລາຍຮັບຈາກລະບົບທັນສະໄໝໄດ້ຢ່າງມີປະສິດທິພາບ. ເພື່ອເຮັດໃຫ້ການຈັດຕັ້ງຜັນຂະຫຍາຍລະບົບ RTMS ແລະລະບົບ LTMS ຂອງຂະແໜງສ່ວຍສາອາກອນສໍາເລັດຕາມແຜນການ, ທັງເປັນການປະຕິບັດຕາມແຜນພັດ ທະນາຂອງຂະແໜງສ່ວຍສາອາກອນ ໃນໄລຍະປີ 2021-2025 ຕາມ 5 ເປົ້າໝາຍພັດທະນາຕົ້ນຕໍ ແລະ 17 ແຜນວຽກຈຸດສຸມຍ່ອຍ, ວຽກງານການຫັນເປັນທັນສະໄໝແມ່ນນອນຢູ່ໃນແຜນພັດທະນາທີ 3 ຂອງການພັດທະນາປັບປຸງນໍາໃຊ້ເຕັກໂນໂລຊີຂະແໜງສ່ວຍສາອາກອນ.
ທີ່ມາ: ກະຊວງການເງິນ

แชร์