ລັດຖະມົນຕີກະຊວງ ຮສສ ຕ້ອນຮັບທູດອາເມລິກາ ເຂົ້າຢ້ຽມອໍາລາ

ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະສະຫວັດດີການສັງຄົມ (ຮສສ) ໄດ້ຕ້ອນຮັບການເຂົ້າຢ້ຽມອໍາລາຂອງ ທ່ານ ປີເຕີ ເຮມອນ (Peter M. Haymond) ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສະຫະລັດອາເມລິກາ ປະຈໍາ ສປປ ລາວ ໃນວັນທີ 29 ສິງຫາ 2023 ໃນໂອກາດທີ່ສໍາເລັດການປະຕິບັດໜ້າທີ່ການທູດຢູ່ ສປປ ລາວ.

ໂອກາດນີ້, ທ່ານນາງ ໃບຄຳ ຂັດທິຍະ ໄດ້ສະແດງຄວາມຊົມເຊີຍ ແລະຕີລາຄາສູງຕໍ່ຜົນສໍາເລັດໃນການປະຕິບັດໜ້າທີ່ການທູດ ຢູ່ ສປປ ລາວ ຕະຫລອດໄລຍະ 3 ປີກວ່າ ເຊິ່ງໄດ້ປະກອບສ່ວນເຂົ້າໃນວຽກງານສົ່ງເສີມພັດທະນາເສດຖະກິດ-ສັງຄົມ ແລະ ຊຸກຍູ້ການພົວພັນຮ່ວມມືໃນຫລາຍດ້ານ ລະຫວ່າງ ສປປ ລາວ ແລະ ສະຫະລັດ ອາເມລິກາ ໂດຍສະເພາະແມ່ນການຮ່ວມມືຂອງ ສ ອາເມລິ ການໃນຂະແໜງ ຮສສ ເປັນຕົ້ນແມ່ນການຮວ່ມມືຊ່ວຍເຫລືອງົບປະມານ, ວິຊາການ, ວຽກທຳລາຍ ແລະ ກວດກູລະເບີດທີ່ຍັງບໍ່ທັນແຕກຕົກຄ້າງຢູ່ ສປປ ລາວ, ຊ່ວຍເຫລືອຜູ້ພິການຈາກລະເບີດບໍ່ທັນແຕກ ແລະພິການຈາກອຸບັດເຫດອື່ນໆ, ພ້ອມທັງຊວ່ຍເຫລືອປົກປ້ອງສິທິມະນຸດ ແລະວຽກກຽມພ້ອມຕອບໂຕໄພພິບັດທາງທຳມະຊາດອື່ນໆ. ພ້ອມນີ້, ທ່ານຍັງສະແດງຄວາມຫວັງວ່າ ລັດຖະບານສະຫາລັດອາເມລິກາ ຈະສືບຕໍ່ການຮ່ວມມື, ສະໜັບສະໜູນຊ່ວຍເຫລືອ ສປປ ລາວ ໂດຍສະເພາະຂະແໜງ ຮສສ ໃຫ້ຫລາຍຍິ່ງຂື້ນ.

ໃນໂອກາດດຽວກັນນີ້, ທ່ານເອກອັກຄະລັດຖະທູດກໍໄດ້ສະແດງຄວາມຂອບໃຈຕໍ່ທ່ານລັດຖະມົນຕີ ທີ່ໄດ້ໃຫ້ການຕ້ອນຮັບອັນອົບອຸ່ນໃນຄັ້ງນີ້ ແລະ ສະແດງຄວາມຂອບໃຈຕໍ່ລັດຖະບານ ສປປ ລາວ ກໍຄືພາກສ່ວນກ່ຽວຂ້ອງທີ່ໄດ້ໃຫ້ການສະໜັບສະໜູນ ແລະການຮ່ວມມືໃນໄລຍະການປະຕິບັດໜ້າທີ່ການທູດຂອງຕົນຢູ່ ສປປ ລາວ ໄດ້ຮັບຜົນສໍາເລັດເປັນຢ່າງດີ.

แชร์