ຄະນະນໍາກະຊວງການຕ່າງປະເທດ ອວຍພອນວັນຊາດ ແລະວັນການທູດຫວຽດນາມ ຄົບຮອບ 78 ປີ

ໃນວັນທີ 28 ສິງຫາທີ່ຜ່ານມາ ສະຫາຍ ໂພໄຊ ໄຂຄຳພິທູນ ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນຳພາຄະນະໄປອວຍພອນສະຫາຍ ຫງວຽນ ບ໋າ ຮຸ່ງ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສສ ຫວຽດນາມ ປະຈໍາ ສປປ ລາວ, ເນື່ອງໃນໂອກາດວັນຊາດ ສາທາລະນະລັດ ສັງຄົມນິຍົມ ຫວຽດນາມ ຄົບຮອບ 78 ປີ (2/9/1945-2/9/2023) ແລະວັນການທູດຫວຽດນາມ ຄົບຮອບ 78 ປີ (28/8/1945-28/8/2023) ທີ່ສະຖານເອກອັກຄະລັດຖະທູດ ແຫ່ງ ສສ ຫວຽດນາມ ປະຈຳ ສປປ ລາວ.

ໃນໂອກາດນີ້, ສະຫາຍ ໂພໄຊ ໄຂຄຳພິທູນ ໄດ້ຕາງໜ້າໃຫ້ຄະນະນໍາ ແລະພະນັກງານກະຊວງການຕ່າງປະເທດ ແຫ່ງ ສປປ ລາວ ສະແດງຄວາມຊົມເຊີຍເນື່ອງໃນໂອກາດວັນຊາດ ແລະ ວັນການທູດຫວຽດນາມ ຄົບຮອບ 78 ປີ ມາຍັງ ສະຫາຍ ເອກອັກຄະລັດຖະທູດ, ພ້ອມດ້ວຍພະນັກງານສະຖານທູດທຸກສະຫາຍ ແລະຜ່ານສະຫາຍທູດ ໄປຍັງຄະນະນໍາ ແລະບັນດາອ້າຍນ້ອງພະນັກງານກະຊວງການຕ່າງປະເທດຂອງຫວຽດນາມ, ເຊິ່ງຕະຫຼອດໄລຍະ 78 ປີ ແຫ່ງ ການສ້າງຕັ້ງ ສສ ຫວຽດນາມ, ສະຫາຍຫວຽດນາມ ສາມາດຍາດໄດ້ຜົນສຳເລັດໃຫຍ່ຫຼວງໃນຫຼາຍດ້ານ, ໂດຍສະເພາະແມ່ນໄລຍະ 37 ປີ ແຫ່ງການດໍາເນີນພາລະກິດປ່ຽນແປງໃໝ່, ພ້ອມທັງໄດ້ສະແດງຄວາມເຊື່ອໝັ້ນຢ່າງໜັກແໜ້ນວ່າ ພາຍໃຕ້ການນໍາພາອັນສະຫຼາດສ່ອງໃສຂອງພັກກອມມູນິດຫວຽດນາມ ໂດຍມີສະຫາຍ ຫງວຽນ ຝູ ຈ້ອງ ເປັນຜູ້ນໍາພານັ້ນ, ອ້າຍນ້ອງຫວຽດນາມຈະສືບຕໍ່ຍາດໄດ້ຜົນສໍາເລັດອັນໃໝ່ໃຫຍ່ຫຼວງກວ່າເກົ່າໂດຍສະເພາະໃນການຈັດຕັ້ງ ແລະຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ.

ສະຫາຍ ໂພໄຊ ໄຂຄຳພິທູນ ໄດ້ສະແດງຄວາມຊົມເຊີຍຕໍ່ຜົນສຳເລັດທີ່ຂະແໜງການຕ່າງປະເທດຫວຽດນາມ ຍາດມາໄດ້ຕະຫຼອດໄລຍະ 78 ປີ ຜ່ານມາ, ເຊິ່ງເປັນຂະແໜງການນໍາໜ້າພາທາງທີ່ເຂັ້ມແຂງ, ເຮັດໃຫ້ບົດບາດຊື່ສຽງ ແລະອິດທິພົນຂອງຫວຽດນາມ ນັບມື້ນັບສູງເດັ່ນຂຶ້ນໃນເວທີພາກພື້ນ ແລະສາກົນ, ປະກອບສ່ວນອັນສໍາຄັນໃຫ້ແກ່ການພັດທະນາເສດຖະກິດ-ສັງຄົມ ຂອງ ສສ ຫວຽດນາມ; ສະແດງຄວາມຊົມເຊີຍ ແລະຕີລາຄາສູງ ຕໍ່ການຊ່ວຍເຫຼືອຢ່າງທັນການ ແລະ ມີຄຸນຄ່າຂອງສະຫາຍຫວຽດນາມຕໍ່ ສປປ ລາວ ໃນໄລຍະຜ່ານມາ; ພ້ອມທັງໄດ້ສະແດງຄວາມຊົມເຊີຍ ຕໍ່ການຮ່ວມມື ແລະ ປະກອບສ່ວນ ຂອງ ສະຖານທູດ ໂດຍສະເພາະສະຫາຍທູດເອງໃນການປະສານ ແລະອຳນວຍຄວາມສະດວກໃນໄລຍະຜ່ານມາອັນເຮັດໃຫ້ການຢ້ຽມຢາມເຄື່ອນໄຫວຮ່ວມມືສອງຝ່າຍ ລາວ-ຫວຽດນາມ ໄດ້ຮັບຜົນສຳເລັດຢ່າງຈົບງາມ, ລວມທັງໄດ້ຊຸກຍູ້ໃຫ້ຫຼາຍໂຄງການຮ່ວມມືສອງຝ່າຍມີຄວາມຄືບໜ້າ ແລະ ສໍາເລັດຜົນເປັນກ້າວໆມາ, ເຊິ່ງປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່ຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ແລະປະຊາຊົນສອງຊາດ ຫວຽດນາມ-ລາວ.

ໃນໂອກາດດຽວກັນນີ້, ສະຫາຍ ຫງວຽນ ບ໋າ ຮຸ່ງ ກໍໄດ້ສະແດງຄວາມຂອບໃຈຢ່າງຈິງໃຈ ຕໍ່ຄໍາອວຍພອນອັນປະເສີດ, ຄໍາຊົມເຊີຍ ແລະຄໍາເວົ້າອັນຈົບງາມຈາກ ສະຫາຍ ຮອງລັດຖະມົນຕີ ໂພໄຊ ໄຂຄຳພິທູນ ແລະ ຄະນະຈາກກະຊວງການຕ່າງປະເທດລາວ ທີ່ມາອວຍພອນໃນຄັ້ງນີ້, ພ້ອມທັງສະແດງຄວາມເຊື່ອໝັ້ນວ່າ ສະຖານທູດ ກໍ່ຄືກະຊວງການຕ່າງປະເທດຫວຽດນາມຈະສືບຕໍ່ຮັກສາມູນເຊື້ອການພົວພັນອັນສະໜິດແໜ້ນກັບກະຊວງການຕ່າງປະເທດລາວເພື່ອຮ່ວມກັນຈັດຕັ້ງຜັນຂະຫຍາຍບັນດາວຽກງານທີ່ຂັ້ນເທິງໄດ້ຕົກລົງຮ່ວມກັນແລ້ວນັ້ນໃຫ້ປະກົດຜົນເປັນຈິງ, ມີປະສິດທິພາບ ແລະປະສິດທິຜົນສູງສຸດເພື່ອນໍາເອົາຜົນປະໂຫຍດມາສູ່ປະຊາຊົນສອງຊາດ ລາວ-ຫວຽດນາມ.
ທີ່ມາ: ກະຊວງການຕ່າງປະເທດ

แชร์