ເກີດນໍ້າປ່າໄຫຼຊຸ ເຮືອນປະຊາຊົນໃນນະຄອນຫຼວງພະບາງ

ນັບແຕ່ຕອນເຊົ້າຂອງວັນທີ 29 ສິງຫາ 2023 ໄດ້ເກີດມີຝົນຕົກໜັກຕິດຕໍ່ກັນຫຼາຍຊົ່ວໂມງເຮັດໃຫ້ນໍ້າຫ້ວຍຫຼາຍສາຍເກີດມີນໍ້າປ່າໄຫຼຊຸ ແລະ ຍື່ງຖ້ວມເຮືອນຂອງປະຊາຊົນຢູ່ນະຄອນຫຼວງພະບາງ ບາງບ້ານໂດຍສະເພາະເຂດທີ່ມີພື້ນທີ່ຕໍ່າ, ສະເພາະບ້ານກົກງີ້ວໄດ້ມີເຮືອນຫຼາຍຫຼັງເກີດມີນໍ້າຖ້ວມເຂົ້າເຮືອນພາຍຫຼັງທີ່ເກີດເຫດການອົງການປົກຄອງບ້ານໄດ້ລະດົມກຳລັງຊາວໜຸ່ມ-ປ້ອງກັນ-ກອງຫຼອນພາຍໃນບ້ານສຸມໃສ່ຊ່ວຍປະຊາຊົນຍັບຍ້າຍເຄື່ອງຂອງທີ່ສຳຄັນໄວ້ບ່ອນປອດໄພທັງໄດ້ຊ່ວຍອະນາໄມເຮືອນພາຍຫຼັງນໍ້າໄດ້ຫລຸດລົງ. ທ່ານ ບຸນສົງ ຈິນດາລັກ ໄດ້ໃຫ້ສຳພາດໃນຕອນເຊົ້າຂອງວັນທີ 29 ສິງຫານີ້ ວ່າ: ໃນແຕ່ລະປີອົງການປົກຄອງບ້ານໄດ້ປະກາດໃຫ້ປະຊາຊົນ ພ້ອມກັນມີສະຕິເຝົ້າລະວັງສະພາບນໍ້າຖ້ວມທີ່ອາດຈະເກີດຂຶ້ນ, ສຳລັບສະພາບນໍ້າຖ້ວມທີ່ເກີດຂຶ້ນຄັ້ງນີ້ເນື່ອງຈາກເກີດມີຝົນຕົກໜັກຕິດຕໍ່ກັນຫຼາຍຊົ່ວໂມງ ເຮັດໃຫ້ນໍ້າຫ້ວຍສອງສາຍເກີດມີນໍ້າປ່າໄຫຼຊຸ ແລະຍື່ງຖ້ວມເຮືອນຂອງປະຊາຊົນ ທັງເຂົ້າຖ້ວມພື້ນທີ່ທຳການຜະລິດເປັນຕົ້ນແມ່ນນາ, ປັດຈຸບັນສາມາດເກັບກຳຜົນເສຍຫາຍເບື້ອງຕົ້ນສຳເລັດ 50% ສ່ວນປະຊາຊົນທີ່ຖືກຜົນກະທົບໄດ້ອະນາໄມບ້ານເຮືອນຂອງຕົນສຳເລັດແລ້ວ 50%.

ນອກຈາກປະຊາຊົນບ້ານກົກງີ້ວຍັງມີບາງບ້ານພາຍໃນນະຄອນຫຼວງພະບາງ ໄດ້ຮັບຜົນກະທົບເລັກນ້ອຍ ແລະເສັ້ນທາງບາງເສັ້ນລະບາຍນໍ້າບໍ່ທັນເຮັດໃຫ້ເກີດມີນໍ້າຖ້ວມເສັ້ນທາງແຕ່ພາຍຫຼັງຝົນຢຸດຕົກສະພາບນໍ້າຫ້ວຍແຕ່ລະສາຍໄດ້ກັບຄືນບົກແຫ້ງເປັນປົກກະຕິ.

แชร์