ສຄຄຊ ເຜີຍແຜ່ກົດໝາຍວ່າດ້ວຍຫຼັກຊັບ ສະບັບປັບປຸງ

ສຳນັກງານຄະນະກຳມະການຄຸ້ມຄອງຫຼັກຊັບ (ສຄຄຊ) ໄດ້ຈັດກອງປະຊຸມເຜີຍແຜ່ກົດໝາຍວ່າດ້ວຍຫຼັກຊັບ (ສະບັບປັບປຸງ) ຢູ່ທີ່ຕະຫຼາດຫຼັກຊັບລາວ ໃນວັນທີ 28 ສິງຫາ 2023 ນີ້ ໂດຍການເປັນປະທານຂອງທ່ານ ສຽວສະຫວາດ ທິລະກຸນ ຮອງຫົວໜ້າສໍານັກງານຄະນະກໍາມະການຄຸ້ມຄອງຫຼັກຊັບ, ມີບັນດາທະນາຄານທຸລະກິດ, ຕະຫຼາດຫຼັກຊັບ, ບໍລິສັດຫຼັກຊັບ, ບໍລິສັດຈົດທະບຽນ ແລະສະຖາບັນສື່ກາງດ້ານຫຼັກຊັບເຂົ້າຮ່ວມທັງຫມົດ 200 ກວ່າທ່ານ.
 
ຈຸດປະສົງໃນການຈັດປະຊຸມໃນຄັ້ງນີ້ແມ່ນເພື່ອເຜີຍແຜ່ກົດໝາຍວ່າດ້ວຍຫຼັກຊັບ (ສະບັບປັບປຸງ) ກໍານົດຫຼັກຊັບລະບຽບການ ແລະມາດຕະການກ່ຽວກັບການຄຸ້ມຄອງ, ຕິດຕາມກວດກາວຽກງານຫຼັກຊັບເພື່ອເຮັດໃຫ້ວຽກງານດັ່ງກ່າວມີປະສິດທິພາບ, ໂປ່ງໃສ, ຍຸດຕິທໍາຫຼຸດຜ່ອນຄວາມສ່ຽງຕໍ່ລະບົບການເງີນ ເຊິ່ງລວມມີ 15 ພາກ 16 ໝວດ ແລະ 204 ມາດຕາ, ພ້ອມທັງ ໄດ້ເຜີຍແຜ່ແຜນຍຸດທະສາດພັດທະນາຕະຫຼາດທຶນລາວ 10 ປີ (2021-2030). ໃນກອງປະຊຸມບັນດາທ່ານ ໄດ້ພັດປ່ຽນກັນມີຄໍາຖາມ ປະກອບຄໍາຄິດຄໍາເຫັນ ຢ່າງຟົດຟື້ນເພື່ອເຮັດໃຫ້ການຈັດຕັ້ງປະຕິບັດຕົວຈິງມີຄວາມຖືກຕ້ອງສອດຄ່ອງຕາມລະບຽບກົດໝາຍ.
 
ໃນໂອກາດນີ້, ທ່ານ ສຽວສະຫວາດ ທິລະກຸນ ຮອງຫົວໜ້າສໍານັກງານຄະນະກໍາມະການຄຸ້ມຄອງຫຼັກຊັບໄດ້ເນັ້ນໜັກໃຫ້ບັນດາທ່ານຜູ້ເຂົ້າຮ່ວມກອງປະຊຸມນຳເອົາກົດໝາຍວ່າດ້ວຍຫຼັກຊັບທີ່ເຜີຍແຜ່ໃນຄັ້ງນີ້ ແລະຕາງໜ້າຈາກທຸກພາກສ່ວນຈົ່ງນໍາເອົາເນື້ອໃນກົດໝາຍສະບັບນີ້ໄປເຜີຍແຜ່ ແລະຈັດຕັ້ງປະຕິບັດໃຫ້ຖືກຕ້ອງ.
 

แชร์