ຈໍາປາສັກຍັງພົບເຫັນການເຄື່ອນໄຫວທຸລະກິດ ແລະໂອນເງິນຕາທີ່ບໍ່ໄດ້ຮັບອະນຸຍາດ

ອິງຕາມການລາຍງານຂອງທ່ານ ສົມປະດິດ ວໍລະຈິດ ຮອງຫົວໜ້າສາຂາ ທະນາຄານແຫ່ງ ສປປ ລາວ ພາກໃຕ້ ຕໍ່ກອງປະຊຸມສະໄໝມັນເທື່ອທີ 5 ຊຸດທີ 2 ຂອງສະພາປະຊາຊົນແຂວງຈໍາປາສັກ ທີ່ຫາກໍາປິດລົງເມື່ອວັນທີເມື່ອວັນທີ 23 ສິງຫາ 2023 ຜ່ານມານີ້ໂດຍທ່ານໃຫ້ຮູ້ວ່າ: ນັບແຕ່ເດືອນມັງກອນ 2023 ໂດຍປະຕິບັດຕາມແຈ້ງການຂອງທະນາຄານແຫ່ງ ສປປ ລາວ, ໄດ້ອອກໜັງສືແຈ້ງການຖອນໃບອະນຸຍາດຮ້ານແລກປ່ຽນເງິນຕາ ໃນທົ່ວແຂວງຈໍາປາສັກ ແລະໄດ້ປະສານສົມທົບກັບກອງບັນຊາການປ້ອງກັນຄວາມສະຫງົບສຸກແຂວງຈໍາປາສັກ ແລະທະນາຄານທຸລະກິດລົງແຈ້ງຖອນໃບອະນຸຍາດຮ້ານແລກປ່ຽນເງິນຕາຕົວແທນຂອງທະນາ ພ້ອມທັງໃຫ້ປົດປ້າຍຮ້ານ ແລະຖອນຄືນໃບອະນຸຍາດດໍາເນີນທຸລະກິດແລກປ່ຽນເງິນຕາໃນທົ່ວແຂວງ ຈໍານວນ 08 ຮ້ານ, ເຊີ່ງມາຮອດປະຈຸບັນຢູ່ແຂວງຈໍາປາສັກ ແມ່ນບໍ່ມີຮ້ານແລກປ່ຽນເງິນຕາ ທີ່ໄດ້ຮັບອະນຸຍາດຈາກທະນາຄານແຫ່ງ ສປປ ລາວ.

ພາຍຫລັງສໍາເລັດການຖອດຖອນໃບອະນຸຍາດດໍາເນີນທຸລະກິດແລກປ່ຽນເງິນຕາ ຂອງບັນດາຮ້ານແລກປ່ຽນເງິນຕາແລ້ວ, ໃນເດືອນ ມີນາ 2023 ໂດຍອິງຕາມແຜນການຮ່ວມມື ແລະຫວ່າງ ທຫລ.ພຕ ແລະ ປກສ. ຈປ, ທັງສອງຝ່າຍໄດ້ລົງຕິດຕາມກວດກາຄືນ ບັນດາຮ້ານແລກປ່ຽນເງິນຕາ ທີ່ຖືກຖອນໃບອະນຸຍາດແລ້ວນັ້ນພ້ອມທັງສະພາບການເຄື່ອນໄຫວທຸລະກິດແລກປ່ຽນເງິນຕາ ແລະບໍລິການໂອນເງິນ ທີ່ບໍ່ໄດ້ຮັບອະນຸຍາດຢູ່ 4 ຕົວເມືອງເປົ້າໝາຍຄື: ນະຄອນປາກເຊ, ເມືອງໂພນທອງ, ເມືອງສຸຂຸມາ ແລະເມືອງໂຂງ, ໃນການລົງເຄື່ອນໄຫວໄດ້ກວດພົບເຫັນ 6 ເປົ້າໝາຍທີ່ເຄື່ອນໄຫວທຸລະກິດເງິນຕາ ແລະໂອນເງິນທີ່ບໍ່ໄດ້ຮັບອະນຸຍາດ, ໃນນັ້ນເມືອງສຸຂຸມາມີ 3, ເມືອງໂຂງມີ 2 ເປົ້າໝາຍ ແລະເມືອງໂພນທອງ 1 ເປົ້າໝາຍ, ເຊີ່ງຄະນະກວດກາໄດ້ດໍາເນີນການສຶກສາອົບຮົມພ້ອມທັງເຮັດບົດບັນທຶກກ່າວເຕືອນຕໍ່ກັບເປົ້າໝາຍດັ່ງກ່າວ.

ພ້ອມກັນນັ້ນ, ທຫລ.ພຕ ແລະ ປກສ. ຈສ ໄດ້ຮ່ວມກັນຈັດກອງປະຊຸມເພື່ອປະເມີນຄືນ ການຈັດຕັ້ງປະຕິບັດວຽກງານຄຸ້ມຄອງເງິນຕາຕ່າງປະເທດ ໃນໄລຍະຜ່ານມາ ແລະທົບທວນການຈັດຕັ້ງປະຕິບັດ ບົດບັນທຶກຄວາມເຂົ້າໃຈ ( MOU) ທີ່ໄດ້ເຊັນກັນສະບັບປີ 2022 ພ້ອມນໍາສະເໜີ MOU ສະບັບປັບປຸງໄໝ່ ໃຫ້ສອດຄ່ອງກັບການປັບປຸງເນື້ອໃນ MOU ລະຫວ່າງກະຊວງປ້ອງກັນຄວາມສະຫງົບ ແລະ ທຫລ ທັງກໍານົດກົນໄກການຮ່ວມມືລະຫວ່າງສອງຝ່າຍໃຫ້ມີຄວາມຮັດກຸມຍິ່ງຂື້ນ ແລະສອດຄ່ອງກັບສະພາບຕົວຈິງຂອງທ້ອງຖີ່ນ, ເຊີ່ງມາຮອດເດືອນມີຖຸນາ 2023 ໄດ້ສໍາເລັດການເຊັນ MOU ສະບັບປັບປຸງໃໝ່ ລະຫວ່າງ ທຫລ.ພຕ ແລະ ປກສ . ຈສ.

ໂດຍ: ໂພທິລາດ

แชร์