2 ປີເຄິ່ງຜ່ານມາ, ການຜະລິດສິນຄ້າສົ່ງອອກ ແລະນໍາເຂົ້າແຂວງເຊກອງ ບາງລາຍການລື່ນແຜນການ

ໃນບົດລາຍງານການສະຫລຸບຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ກາງສະໄຫມ 2 ປີເຄິ່ງ ແລະທິດທາງແຜນວຽກຈຸດສຸມ 2 ປີ ເຄິ່ງທ້າຍສະໄໝ ຂອງແຜນ 5 ປີຄັ້ງທີ IX (2021-2025) (ຕໍ່ກອງປະຊຸມສະພາປະຊາຊົນແຂວງສະໄໝສາມັນເທື່ອທີ 5 ຂອງສະພາປະຊາຊົນແຂວງຊຸດທີ 2) ສະເຫນີໂດຍ ສະຫາຍ ເຫຼັກໄຫຼ ສີວິໄລ,ກໍາມະການສູນກາງພັກ ເລຂາພັກແຂວງ ເຈົ້າແຂວງໆເຊກອງໃນວັນທີ 22-24 ສິງຫາ 2023)ໄດ້ຍົກໃຫ້ເຫັນເຖິງການນໍາພາ-ຊີ້ນໍາຂອງອົງຄະນະພັກແຂວງກໍ່ຄືອົງການປົກຄອງທ້ອງຖິ່ນ,ເຖິງ່ວາໃນໄລຍະຜ່ານມາ, ຈະພົບຄວາມຫຍຸ້ງຍາກຕ່າງໆນາໆປະການກໍຕາມ ແຕ່ກໍສາມາດຜ່ານຜ່າບັນຫາອຸປະສັກດັ່ງກ່າວ ແລະສາມາດຍາດໄດ້ຜົນງານທີ່ພົ້ນເດັ່ນຫຼາຍດ້ານໂດຍສະເພາະການຜະລິດສິນຄ້າສົ່ງອອກ ແລະນໍາເຂົ້າບາງລາຍການລື່ນແຜນການທີ່ກໍານົດໄວ້.

ສະຫາຍ ເຫຼັກໄຫຼ ສີວິໄລ ກ່າວວ່າ: ການສົ່ງອອກສິນຄ້າສາມາດບັນລຸໄດ້ 274,34 ລ້ານໂດລາ, ທຽບໃສ່ແຜນການ 5 ປີ ປະຕິບັດໄດ້ 140,14% ເກີນແຜນ 40,14%; ສິນຄ້າສົ່ງອອກສ່ວນໃຫຍ່ ແມ່ນກະແສໄຟຟ້າ,ຖ່ານຫີນ,ມັນຕົ້ນແຫ້ງ,ແປ້ງມັນຕົ້ນ,ກາເຟ,ຢາງພາລາ,ພຶດຜັກ,ໂສມດິບ ແລະ ສັດລ້ຽງຈໍານວນໜຶ່ງ,

ການນໍາເຂົ້າຢູ່ໃນລະດັບ 146,91 ລ້ານໂດລາ, ທຽບໃສ່ແຜນ 5 ປີ ປະຕິບັດໄດ້ 97,86% ການນໍາເຂົ້າສ່ວນໃຫຍ່ແມ່ນວັດສະດູການກໍ່ສ້າງ;ນໍ້າມັນເຊື້ອໄຟ ແລະ ເຄື່ອງອຸປະໂພກ-ບໍລິໂພກຈໍານວນໜຶ່ງ. ໄລຍະ 2 ປີເຄີ່ງ ແຂວງເກີນດຸ່ນ 127,43 ລ້ານໂດລາສະຫະລັດ. 

ສໍາລັບການຜະລິດກະສິກໍາ: ໃນໄລຍະ 2 ປີເຄິ່ງຜ່ານມາແຂວງເຊກອງສາມາດສ້າງຜະລິດຕະພັນໃນຂະແຫນງກະສິກໍາໄດ້ເພີ່ມຂື້ນໃນແຕ່ລະປີ ເປັນຕົ້ນ: ສາມາດຜະລິດເຂົ້າໄດ້ທັງຫມົດ ຈໍານວນ 89.721 ໂຕນ, ມັນຕົ້ນດີບ 516.869 ໂຕນ; ແປ້ງມັນຕົ້ນ 60 ພັນກ່ວາໂຕນ,ຢາງພາລາ 13.420 ກ່ວາໂຕນ; ກາເຟ 64.411 ໂຕນ; ປູກໂສມໄດ້ຫລາຍຮ້ອຍໂຕນ; ປູກພືດເປັນສິນຄ້າໄດ້ 728.923 ໂຕນ (ລວມມີຜັກກະລໍ່າປີ ; ຜັກກາດຫໍ່,ພືດຜັກອື່ນ) ແລະປູກພືດສະບຽບອາຫານ 77.384 ໂຕນ.ການລ້ຽງສັດ ແລະ ການປະມົງ: ສາມາດສະຫນອງຊີ້ນ, ປາ ແລະ ໄຂ່ໄດ້ທັງຫມົດ 14.911,64 ໂຕນ. ອັນທີ່ພົ້ນເດັ່ນ: ໄດ້ຊຸກຍູ້ສົ່ງເສີມການລ້ຽງສັດເປັນຟາມເຊັ່ນ: ຟາມລ້ຽງເປັດ,ໄກ່,ຫມູ,ພິເສດມີຟາມລ້ຽງງົວພັນນົມ,ງົວພັນຊີ້ນຢູ່ເມືອງດາກຈຶງ ກໍາລັງລິເລີ່ມຈັດຕັ້ງປະຕິບັດ. ສາມາດຕອບສະຫນອງແກ່ຜູ້ບໍລິໂພກ ພາຍໃນໄດ້ 60%,ໃນ 2 ປີເຄິ່ງ ແລະສົ່ງອອກຕ່າງແຂວງ,ຕ່າງປະເທດຈໍານວນໜຶ່ງ.

ດ້ານອຸດສາຫະກໍາ, ພະລັງງານ ແລະບໍ່ແຮ່: ທົ່ວແຂວງເຊກອງມີແຫຼ່ງຜະລິດພະລັງງານໄຟຟ້າທີ່ດໍາເນີນການຜະລິດແລ້ວ 3 ແຫ່ງຄື: ເຂື່ອນໄຟຟ້າຫ້ວຍລໍາພັນໃຫຍ່ ກໍາລັງຕິດຕັ້ງ 88 ເມກາວັດ,ເຂື່ອນໄຟຟ້າ ຫ້ວຍລໍາພັນຕອນລຸ່ມ ກໍາລັງຕິດຕັ້ງ15 ເມກາວັດ ແລະ ເຂື່ອນໄຟຟ້າເຊຂະຫມານ3ກໍາລັງຕິດຕັ້ງ 250 ເມກາ ວັດ,ໂຄງການກໍ່ສ້າງເຂື່ອນໄຟຟ້າກໍາລັງກໍ່ສ້າງໃກ້ຈະສໍາເລັດແລ້ວ ມີ 2 ເຂື່ອນຄື: ເຂື່ອນໄຟຟ້ານໍ້າອີມູນກໍາລັງຕິດຕັ້ງ 130 ເມກາວັດ ສໍາເລັດແລ້ວ 98% ແລະ ໂຄງການກໍ່ສ້າງເຂື່ອນໄຟຟ້າຫ້ວຍລະແງ ກໍາລັງຕິດຕັ້ງ 60 ເມກາວັດ ສໍາເລັດແລ້ວ 90 % ສາມາດມອບພັນທະໃຫ້ລັດໄດ້ທັງຫມົດປະມານໄດ້ຫລາຍສິບຕື້ກີບ.

ການຜະລິດແຮ່ທາດເພື່ອສົ່ງອອກມີຄື: ໂຄງການຂຸດຄົ້ນແຮ່ຖ່ານຫີນຂອງ ບໍລິສັດ ພອນສັກ ປະຕິບັດການຂຸດຄົ້ນໄດ້ທັງຫມົດ 4,24 ລ້ານໂຕນ, ຈໍາຫນ່າຍຖ່ານຫີນໄດ້ 3,06 ລ້ານໂຕນ, ມູນຄ່າ 153,33 ລ້ານໂດລາສະຫະລັດ, ມອບພັນທະໃຫ້ແກ່ລັດໄດ້ທັງຫມົດ 10,73 ລ້ານໂດລາສະຫະລັດ, ໂຄງການຂຸດຄົ້ນ ແຮ່ຄໍາລາວກະລຶມ ມີກໍາລັງຂຸດຄົ້ນ 22.652 m3; ມີກໍາລັງການຜະລິດ 16,03 ກຼາມ, ມອບພັນທະແກ່ລັດ 17%, ໂຄງການຂຸດຄົ້ນຫີນພູເພື່ອຮັບໃຊ້ການກໍ່ສ້າງ 28.037m3, ມູນຄ່າ 3,36 ຕື້ກີບ, ມອບພັນທະແກ່ລັດ ມູນຄ່າ 616,81 ລ້ານກີບ. ໂຮງງານການຜະລິດອຸດສາຫະກໍາຂະຫນາດນ້ອຍ ແລະ ຂະຫນາດກາງ ຄື: ໂຮງງານຜະລິດແປ້ງມັນຕົ້ນ , ໂຮງສີເຂົ້າ, ໂຮງງານປຸງແຕ່ງກາເຟ, ໂຮງງານຄົບຫີນ, ໂຮງງານປຸງແຕ່ງໄມ້(ກາງ), ໂຮງງານເຟີນີເຈີ້, ໂຮງງານຖ່ານຂາວ, ໂຮງງານຫັດຖະກໍາແຜ່ນແພ, ຫັດຖະກາຈັກສານ, ໂຮງງານສັງກະສີ, ໂຮງງານຜະລິດເຫລົ້າ, ໂຮງງານຜະລິດດິນຈີ່ ແລະດິນບ໋ອກ, ໂຮງງານຜະລິດນໍ້າດື່ມ, ໂຮງງານຜະລິດນໍ້າກ້ອນອານະໄມ, ໂຮງງານ ຜະລິດເສັ້ນເຂົ້າປຸ້ນ, ໂຮງງານຜະລິດເຂົ້າຫນົມ ແລະອື່ນໆ;ໃນ 2 ປີເຄິ່ງສາມາດຜະລິດ ແລະຈໍາຫນ່າຍໄດ້ທັງຫມົດມູນຄ່າ 660,14 ຕື້ກີບ.

ສະຫາຍ ເຫຼັກໄຫລ ສີວິໄລ ກ່າວຕື່ມວ່າ: ແຕ່ນີ້ ຮອດປີ 2025 ແຂວງເຊກອງຈະສູ້ຊົນຜະລິດສິນຄ້າສົ່ງອອກ ໃຫ້ບັນລຸໄດ້ 125,75 ລ້ານໂດລາ; ຈະຄຸ້ມຄອງການນໍາເຂົ້າ ໃຫ້ຢູ່ໃນລະດັບ 80,18 ລ້ານ ໂດລາ; ເຮັດໃຫ້ເກີນດຸ່ນການຄ້າຢູ່ໃນ ລະດັບ 45,57 ລ້ານໂດລາ;

ໂດຍ:ຕະວິນຍານ

แชร์