ອາຊຽນ-ອາເມລິກາ ສຸມໃສ່ 4 ຂົງເຂດ ດ້ານສິ່ງແວດລ້ອມ ແລະສະພາບອາກາດ

ກອງປະຊຸມລັດຖະມົນຕີສິ່ງແວດລ້ອມອາຊຽນ-ສ.ອາເມລິກາ ຄັ້ງທີ 1 ຈັດຂຶ້ນໃນຕອນບ່າຍວັນທີ 24 ສິງຫາ 2023 ທີ່ຫໍປະຊຸມແຫ່ງຊາດເພື່ອແລກປ່ຽນຄວາມຄວາມຄິດຄວາມເຫັນຮ່ວມກັນແນໃສ່ເພີ່ມທະວີການຮ່ວມມືລະຫວ່າງອາຊຽນ-ສ.ອາເມລິກາ ເພື່ອບັນລຸເປົ້າໝາຍຮ່ວມໃນການຮັບມືກັບການປ່ຽນແປງຂອງດິນຟ້າອາກາດ ແລະກ້າວໄປສູ່ການປ່ອຍອາຍພິດເຮືອນແກ້ວເປັນສູນ.

ທ່ານນາງ ບຸນຄໍາ ວໍລະຈິດ ລັດຖະມົນຕີກະຊວງຊັບພະຍາກອນທໍາມະຊາດ ແລະສິ່ງແວດລ້ອມ ແຫ່ງ ສປປ ລາວ ທັງເປັນປະທານກອງປະຊຸມໄດ້ກ່າວວ່າ: ອາຊຽນ ແລະ ສ.ອາເມລິກາ ຖືສຳຄັນການເພີ່ມທະວີການຮ່ວມມືໃນ 4 ຂົງເຂດທີ່ລະບຸໄວ້ໃນທັດສະນະຂອງອາຊຽນກ່ຽວກັບພາກພື້ນອິນໂດ-ປາຊີຟິກ (AOIP) ຄື: ເຕັກໂນໂລຊີການຂົນສົ່ງທີ່ເປັນມິດກັບສະພາບອາກາດ ລວມມີ: ພາຫະນະໄຟຟ້າ, ລະບົບນິເວດ, ນະຄອນອັດສະລິຍະ, ພື້ນຖານໂຄງລ່າງທີ່ຍືນຍົງ ແລະ ການເຊື່ອມຕໍ່, ສະພາບແວດລ້ອມ ແລະ ການປ່ຽນແປງດິນຟ້າອາກາດ. ຊຶ່ງສະພາບໂລກຮ້ອນບໍ່ພຽງແຕ່ສົ່ງຜົນກະທົບຕໍ່ພາກພື້ນອາຊຽນ ເທົ່ານັ້ນ. ສປປ ລາວ ແລະ ປະເທດສະມາຊິກອາຊຽນອື່ນໆ ໄດ້ຮ່ວມມືກັນຢ່າງຕັ້ງໜ້າກັບອົງການຈັດຕັ້ງສາກົນ, ຄູ່ຮ່ວມພັດທະນາ ແລະພາກສ່ວນກ່ຽວຂ້ອງເພື່ອຈັດຕັ້ງປະຕິບັດກ່ຽວກັບໂຄງການການປ່ຽນແປງຂອງດິນຟ້າອາກາດພາຍໃນປະເທດ ແລະພາກພື້ນ.

ທ່ານ ນາງ ບຸນຄໍາ ວໍລະຈິດ ກ່າວຕື່ມວ່າ: ແຜນງານດ້ານສິ່ງແວດລ້ອມ ແລະສະພາບອາກາດລະຫວ່າງອາຊຽນ-ສ.ອາເມລິກາ ສຸມໃສ່ 4 ຂົງເຂດຕົ້ນຕໍ ຄື: ເພີ່ມທະວີຄວາມການຮ່ວມມືກ່ຽວກັບດິນຟ້າອາກາດໃຫ້ຫລາຍຂຶ້ນກວ່າເກົ່າ, ການຫຼຸດຜ່ອນຜົນກະທົບ ແລະ ການປັບຕົວຂອງພາກພື້ນ, ນະວັດຕະກໍາສໍາລັບການຫລຸດຜ່ອນກັກບອນໃນອະນາຄົດ, ການລະດົມທຶນກ່ຽວກັບສະພາບດິນຟ້າອາກາດ, ການສະໜັບສະໜູນການປົກປັກຮັກສາສິ່ງແວດລ້ອມ ແລະ ການອະນຸລັກຊີວະນາໆພັນ.
ພ້ອມນີ້ ທ່ານສະແດງຄວາມເຊື່ອໝັ້ນວ່າ: ກອງປະຊຸມຄັ້ງນີ້ ເປັນເວທີທີ່ມີປະສິດທິຜົນສຳລັບການຮ່ວມມືກັນໃນອະນາຄົດລະຫວ່າງ ອາຊຽນ-ສ.ອາເມລິກາ ໃນການຊຸກຍູ້ສົ່ງເສີມດ້ານນະວັດຕະກໍາເພື່ອສະໜັບສະໜູນການຫຼຸດຜ່ອນຜົນກະທົບ ແລະການປັບຕົວຕໍ່ສະພາບດິນຟ້າອາກາດໃນພາກພື້ນ, ລວມທັງການເພີ່ມທະວີຄຳໝັ້ນສັນຍາ ແລະຄວາມພະຍາຍາມຂອງສອງຝ່າຍເພື່ອບັນລຸເປົ້າໝາຍລວມຂອງການຫຼຸດຜ່ອນການປ່ອຍອາຍພິດເຮືອນແກ້ວ, ພ້ອມທັງປະຕິບັດສັນຍາປາຣີ ວ່າດ້ວຍການປ່ຽນແປງດິນຟ້າອາກາດເພື່ອກ້າວໄປສູ່ການບັນລຸການປ່ອຍອາຍພິດເຮືອນແກ້ວເປັນສູນໃນປີ 2050 ໃຫ້ປະກົດຜົນເປັນຈິງ.

แชร์