ອາຊຽນ-ຍີ່ປຸ່ນ ທົບທວນຄວາມຄືບໜ້າຂໍ້ລິເລີ່ມການຮ່ວມມືດ້ານສິ່ງແວດລ້ອມ

ກອງປະຊຸມລັດຖະມົນຕີສິ່ງແວດລອ້ມອາຊຽນ-ຍີ່ປຸ່ນຄັ້ງທີ 18 ກ່ຽວກັບສິ່ງແວດລອ້ມ ແລະການປ່ຽນແປງດິນຟ້າອາກາດ ໄດ້ຈັດຂຶ້ນວັນທີ 24 ສິງຫາ 2023 ທີ່ຫໍປະຊຸມແຫ່ງຊາດ ໂດຍການເປັນປະທານຂອງທ່ານນາງ ບຸນຄໍາ ວໍລະຈິດ ລັດຖະມົນຕີ ກະຊວງຊັບພະຍາກອນທໍາມະຊາດ ແລະສິ່ງແວດລອ້ມ ແຫ່ງ ສປປ ລາວ ມີລັດຖະມົນຕີວ່າສິ່ງແວດລອ້ມອາຊຽນ, ລັດຖະມົນຕີວ່າການກະຊວງສິ່ງແວດລອ້ມຍີ່ປຸ່ນ, ມີຮອງເລຂາອາຊຽນ.

ທ່ານນາງ ບຸນຄໍາ ວໍລະຈິດ ກ່າວຄໍາເຫັນຕໍ່ກອງປະຊຸມວ່າ: ໃນການຮ່ວມມືດ້ານສິ່ງແວດລ້ອມປີນີ້ເປັນປີພິເສດເພາະພວກເຮົາສະເຫຼີມສະຫຼອງ 50 ປີແຫ່ງວັນສ້າງຕັ້ງສາຍພົວພັນມິດຕະພາບ ແລະ ການຮ່ວມມື ອາຊຽນ-ຍີ່ປຸ່ນ ນັບຕັ້ງແຕ່ການສ້າງການພົວພັນຄູ່ເຈລະຈາອາຊຽນ ແລະ ຍີ່ປຸ່ນ ໄດ້ສົມທົບກັນໃນຫຼາຍຂົງເຂດຮ່ວມມື ແລະ ຂໍ້ລິເລີ່ມການຮ່ວມມືດ້ານສິ່ງແວດລ້ອມໄດ້ປະກອບສ່ວນສຳຄັນເຂົ້າໃນການແກ້ໄຂສິ່ງທ້າທາຍຂອງບັນດາປະເທດສະມາຊິກອາຊຽນໃນການປ່ຽນແປງຂອງດິນຟ້າອາກາດການຄຸ້ມຄອງສິ່ງເສດເຫຼືອ ພວກເຮົາມີຄວາມພະຍານຢ່າງຈະແຈ້ງວ່າທຸກປະເທດໃນທົ່ວໂລກລວມທັງປະເທດສະມາຊິກອາຊຽນກຳລັງປະເຊີນໜ້າກັບຄວາມເປັນຫ່ວງດ້ານສິ່ງ ແວດລ້ອມລວມທັງໄພທຳມະຊາດ ແລະການປ່ຽນແປງຂອງດິນຟ້າອາກາດສະນັ້ນເຊື່ອໝັ້ນວ່າການລົງເລິກການພົວພັນ ແລະການຮ່ວມມືກັບຍີ່ປຸ່ນໃນບັນດາຂົງເຂດດັ່ງກ່າວ.

ກອງປະຊຸມຄັ້ງນີ້ໄດ້ທົບທວນຄືນຄວາມຄືບໜ້າຂອງຂໍ້ລິເລີ່ມການຮ່ວມມືດ້ານສິ່ງແວດລ້ອມ ອາຊຽນ-ຍີ່ປຸ່ນ ແລະແຜນປະຕິບັດງານການປ່ຽນແປງດິນຟ້າອາກາດອາຊຽນ; ໄດ້ພິຈາລະນາຂໍ້ລິເລີ່ມໃໝ່ “ໂຄງການຍຸດທະສາດສຳລັບດິນຟ້າ ອາກາດ ແລະສິ່ງແວດລ້ອມອາຊຽນ” (SPACE) ທີ່ຈະນໍາໃຊ້ໂດຍຄູ່ຮ່ວມມືຂອງອາຊຽນ-ຍີ່ປຸ່ນ. ໂອກາດດັ່ງກ່າວທ່ານນາງ ບຸນຄໍາ ວໍລະຈິດ ໄດ້ສະແດງຄວາມຂອບໃຈມາຍັງລັດຖະບານຍີ່ປຸ່ນບັນດາປະເທດສະມາຊິກອາຊຽນ ແລະບັນດາຄູ່ຮ່ວມມືທີ່ໃຫ້ການສະໜັບສະໜູນ ແລະການຮ່ວມມືທັງເຊື່ອໝັ້ນວ່າກອງປະຊຸມຄັ້ງນີ້ຈະເປັນເວທີປາໄສທີ່ດີເພື່ອໃຫ້ບັນດາຜູ້ເຂົ້າຮ່ວມຈາກບັນດາປະເທດສະມາຊິກອາຊຽນຍີ່ປຸ່ນຄູ່ຮ່ວມມືແລກປ່ຽນຄວາມຮູ້ ແລະປະສົບການເພື່ອແນໃສ່ເພີ່ມທະວີການຮ່ວມມືດ້ານສິ່ງແວດລ້ອມ ແລະການປ່ຽນແປງຂອງດິນຟ້າອາກາດໃນພາກພື້ນ.

แชร์