JDB ສາຂາແຂວງຈໍາປາສັກເປີດສໍານັກງານໃໝ່ພ້ອມຮັບໃຊ້ສັງຄົມເຕັມຮູບແບບ

ທະນາຄານຮ່ວມພັດທະນາ (JDB) ສາຂາແຂວງຈໍາປາສັກ ໄດ້ເປີດສໍານັກງານໃໝ່ຂື້ນທີ່ນະຄອນປາກເຊ ຫວັງສ້າງສີ່ງອໍານວຍຄວາມສະດວກຫລາຍດ້ານໃຫ້ກັບລູກຄ້າ ທັງສະຖານທີ່ຕັ້ງອາຄານເໝາະສົມ ແລະຂອດການບໍລິການແມ່ນມີຄວາມວ່ອງໄວທັນໃຈຕອບສະໜອງຕາມຕ້ອງການຂອງລູກຄ້າ.

ທ່ານ ແສງພະຈັນ ສຸເທບມະນີ ຫົວໜ້າ ທະນາຄານຮ່ວມພັດທະນາສາຂາແຂວງຈໍາປາສັກ ໄດ້ໃຫ້ຮູ້ວ່າ: ຕະຫລອດໄລຍະເວລາ 10 ປີ ທີ່ທະນາຄານຮ່ວມພັດທະນາ ສາຂາແຂວງຈໍາປາສັກ ໄດ້ມາເປີດໃຫ້ບໍລິການສັງຄົມ ພວກເຮົາໄດ້ມີຄວາມພະຍາຍາມຢ່າງບໍ່ຢຸດຢັ້ງໃນການພັດທະນາຜະລິດຕະພັນຂອງຕົນໃຫ້ມີຄວາມກ້າວໜ້າ ແລະທັນສະໄໝແທດເໝາະກັບສະພາບຄວາມຮຽກຮ້ອງຕ້ອງການຂອງສັງຄົມເຮັດໃຫ້ລູກຄ້າສາມາດເຂົ້າເຖີງແຫລ່ງທຶນທີ່ງ່າຍຂື້ນ ແລະຮັບປະກັນຄວາມວ່ອງໄວ ທັນໃຈ ໂປ່ງໃສ ແລະ ໝັ້ນຄົນ, ການເປີດນໍາໃຊ້ອາຄານຫຼັງໃໝ່ນີ້ແມ່ນເພື່ອຕອບສະໜອງຄວາມຮຽກຮ້ອງຕ້ອງການຂອງລູກຄ້າໃນການບໍລິການທາງດ້ານການເງິນທີ່ທັນສະໄໝແບບຄົບວົງຈອນເພີ່ມທາງເລືອກໃໝ່ໃຫ້ກັບລູກຄ້າຢູ່ພາຍໃນນະຄອນປາກເຊ ກໍ່ຄືຢູ່ພາຍໃນແຂວງຈຳປາສັກ ໃຫ້ມີຄວາມສະດວກສະບາຍ, ສາມາດເລືອກໃຊ້ຜະລິດຕະພັນທີ່ທັນສະໄໝຂອງທະນາຄານຮ່ວມພັດທະນາ, ຕຶກອາຄານຫລັງໃໝ່ດັ່ງກ່າວແມ່ນຕັ້ງຢູ່ບ້ານໂພນສະຫວັນ ນະຄອນປາກເຊ ແຂວງຈໍາປາສັກ ກົງກັນຂ້າມກັບສູນຄ້າຄ້າແຟຣນຊິບມໍ.

ທ່ານ ແສງພະຈັນ ສຸເທບມະນີ ຫົວໜ້າທະນາຄານຮ່ວມພັດທະນາ ສາຂາແຂວງຈໍາປາສັກ ກ່າວຕື່ມວ່າ: ປັດຈຸບັນ, ທະນາຄານຮ່ວມພັດທະນາ ສາຂາແຂວງຈໍາປາສັກພວກເຮົາ ໄດ້ພັດທະນາອົງກອນ ແລະຜະລິດຕະພັນທາງການເງິນໃໝ່ຢ່າງສະໝໍ່າສະເໝີ, ປະສານກັບເຕັກໂນໂລຊີ ແລະ ຜະລິດຕະພັນອີເລັກໂຕຣນິກທີ່ທັນສະໄໝ ເພື່ອຮອງຮັບກັບການບໍລິການລູກຄ້າໃນຍຸກ Digital ເປັນຕົ້ນ ແອັບ JDB Yes Mobile Banking ທຸລະກໍາທາງການເງິນໃນມືຖື ເປັນໜຶ່ງໃນການບໍລິການທີ່ໂດດເດັ່ນຊ່ວຍຕອບສະໜອງການເຮັດທຸລະກໍາທາງດ້ານການເງິນ ແລະ ທຸລະກິດຂອງລູກຄ້າມີຄວາມສະດວກສະບາຍ, ສາມາດບໍລິການໄດ້ທັງພາຍໃນ ແລະ ຕ່າງປະເທດ ໄດ້ຢ່າງວ່ອງໄວ ທັນສະໄໝ ແລະ ມີຄວາມປອດໄພສູງ, ເພື່ອບັນລຸເປົ້າໜາຍທີ່ວາງໄວ້ທະນາຄານຮ່ວມພັດທະນາ ຫຼື JDB ໄດ້ປະກອບສ່ວນເຂົ້າໃນການສ້າງສາພັດທະນາປະເທດຊາດ ໃຫ້ມີຄວາມຈະເລີນຮຸ່ງເຮືອງ ໂດຍໄປຕາມຄໍາຂວັນຂອງທະນາຄານຮ່ວມພັດທະນາທີ່ວ່າ: ເຕີບໃຫຍ່ໄປພ້ອມກັນ,  ຢ່າງໃດກໍ່ດີຜ່ານການດໍາເນີນທຸລະກິດໃນໄລຍະ 6 ເດືອນຕົ້ນປີ 2023 ຜ່ານມາເຫັນວ່າລູກຄ້າທາງເງີນຝາກ ແລະລູກຄ້າສິນເຊື່ອ ແມ່ນຍັງສືບຕໍ່ໃຫ້ຄວາມເຊື່ອໝັ້ນຕໍ່ JDB ພວກເຮົາເຂົ້າມາໃຫ້ບໍລິທີ່ມີລັກສະນະທີ່ເພີ່ມຂື້ນຢ່າງໜ້າເພີ່ງພໍ່ໃຈເຮັດໃຫ້ຜົນປະກອບການກາຍເປົ້າໝາຍທີ່ກໍານົດໄວ ແລະຄາດວ່າໝົດປີນີ້ຜົນປະກອບທຸລະກິດຈະຂະຫຍາຍຕົວເພີ່ມຂື້ນຫລາຍເທົ່າຖ້າທຽບໃສ່ປີຜ່ານມາ.

ສໍາລັບພິທີສະເຫຼີມສະຫຼອງທະນາຄານຮ່ວມພັດທະນາ ສາຂາແຂວງຈໍາປາສັກ 10 ປີ ແລະພິທີເປີດນໍາໃຊ້ອາຄານຫຼັງໃໝ່ຢ່າງເປັນທາງການ ໄດ້ມີຂື້ນເມື່ອບໍ່ດົນມານີ້ທີ່ໂຮງແຮມຈໍາປາສັກແກຣນ, ໂດຍເປັນກຽດເຂົ້າຮ່ວມໃນພິທີຄັ້ງນີ້ໂດຍທ່ານ ວິໄລວົງ ບຸດດາຄຳ ເຈົ້າແຂວງຈໍາປາສັກ, ທ່ານ ບົວລີ ເພັດສົງຄາມ ເຈົ້ານະຄອນປາກເຊ, ທ່ານ ນາງ ສີພະຈັນ ເຂັມມະວົງ ຮອງຫົວໜ້າສາຂາທະນາຄານ ແຫ່ງ ສປປ ລາວ ປະຈຳພາກໃຕ້, ມີທ່ານ ເອກະພັນ ພະພິທັກ ປະທານຜູ້ຖືຮຸ້ນທະນາຄານ ຮ່ວມພັດທະນາ, ທ່ານ ວິໄລ ສີພະພອນ ປະທານສະພາບໍລິຫານທະນາຄານຮ່ວມພັດທະນາ, ທ່ານ ສາຄອນ ຍໍພັນໄຊ ຜູ້ອໍານວຍການໃຫຍ່ທະນາຄານຮ່ວມພັດທະນາ, ມີຜູ້ບໍລິຫານລະດັບສູງຂອງທະນາຄານຮ່ວມພັດທະນາ, ແຂກທີ່ຖືກເຊີນຕະຫຼອດຮອດພະນັກງານວິຊາການທີ່ກ່ຽວຂ້ອງກໍໄດ້ເຂົ້າຮ່ວມຢ່າງພ້ອມພຽງ.

ໂດຍ: ໂພທິລາດ

แชร์