ລະດົມສະຕິປັນຍາ ປະກອບຄໍາຄິດເຫັນໃສ່ກົດໝາຍ 4 ສະບັບ

ໃນລະຫວ່າງວັນທີ 24-25 ສິງຫາ 2023 ທີ່ຫ້ອງວ່າການປົກຄອງແຂວງວຽງຈັນ ຈັດກອງປະຊຸມຄະນະນຳພາ-ຊີ້ນຳການປັບປຸງກົດໝາຍ 4 ສະບັບ ໃນຂົງເຂດສະພາແຫ່ງຊາດ, ສະພາປະຊາຊົນແຂວງ ໂດຍການເປັນປະທານຂອງ ທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດ, ເຂົ້າຮ່ວມມີທ່ານ ຄຳພັນ ສິດທິດຳພາ ເຈົ້າແຂວງວຽງຈັນ, ມີປະທານສະພາປະຊາຊົນແຂວງວຽງຈັນ, ບັນດາສະມາຊິກສະພາແຫ່ງຊາດ ປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້, ເພື່ອເປັນບ່ອນອີງໃຫ້ການປະເມີນການຈັດຕັ້ງປະຕິບັດ ແລະ ການທາບທາມຮ່າງກົດໝາຍ 4 ສະບັບ ມີຄວາມເໝາະສົມກັບສະພາບຕົວຈິງ, ສອດຄ່ອງກັບກົດໝາຍ ແລະຮັບປະກັນປະສິດທິພາບ; ເພື່ອເປັນການລະດົມສະຕິປັນຍາ, ຄໍາຄິດເຫັນທີ່ເປັນປະໂຫຍດຂອງສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງໃນຖານະເປັນຕົວແທນແຫ່ງສິດ ແລະຜົນປະໂຫຍດຂອງປະຊາຊົນບັນດາເຜົ່າກໍຄືເປົ້າໝາຍທີ່ກ່ຽວຂ້ອງຕ່າງໆ ເພື່ອປັບປຸງກົດໝາຍ 4 ສະບັບ ໃຫ້ຄົບຖ້ວນ, ຮັດກຸມ ແລະແທດເໝາະກັບສະພາບຕົວຈິງກ່ອນນຳສະເໜີຕໍ່ກອງປະຊຸມຄະນະປະຈຳສະພາແຫ່ງຊາດພິຈາລະນານຳເຂົ້າກອງປະຊຸມສະໄໝສາມັນຂອງສະພາແຫ່ງຊາດ.

ໂອກາດນີ້, ທ່ານ ຈະເລີນ ເຢຍປາວເຮີ ໄດ້ມີຄຳເຫັນກ່າວເປີດກອງປະຊຸມວ່າ: ເນື້ອໃນການປະເມີນຄັ້ງນີ້ ຈະໄດ້ສຸມໃສ່ (1) ຕີລາຄາເບິ່ງການໂຄສະນາເຜີຍແຜ່ແຕ່ລະກົດໝາຍເລິກເຊິ່ງ, ທົ່ວເຖິງທຸກເປົ້າໝາຍແນວໃດ?, (2) ມີມາດຕາໃດແດ່ທີ່ສອດຄ່ອງສາມາດປະຕິບັດໄດ້? ມີມາດຕາໃດແດ່ສອດຄ່ອງຢູ່ແຕ່ປະຕິບັດໄດ້ຍາກ? ມີມາດຕາໃດແດ່ທີ່ບໍ່ສອດຄ່ອງຕ້ອງໄດ້ປັບປຸງ? ມີມາດຕາໃດແດ່ທີ່ຊໍ້າຊ້ອນກັບກົດໝາຍອື່ນຊຶ່ງຕ້ອງໄດ້ປັບປຸງໃຫ້ລະອຽດຈະແຈ້ງ? ມີບັນຫາໃດແດ່ທີ່ຄວນເພີ່ມເປັນມາດຕາໃໝ່?, (3) ບັນຫາທີ່ພົວພັນກັບກົດໝາຍອື່ນເຊັ່ນ: ກົດໝາຍວ່າດ້ວຍລັດຖະບານ ແລະ ກົດໝາຍວ່າດ້ວຍການປົກຄອງທ້ອງຖິ່ນ; ກົດໝາຍວ່າດ້ວຍສານປະຊາຊົນ; ກົດໝາຍວ່າດ້ວຍອົງການໄອຍະການປະຊາຊົນ; ກົດໝາຍວ່າດ້ວຍການກວດກາລັດ; ກົດໝາຍວ່າດ້ວຍການກວດສອບແຫ່ງລັດ; ກົດໝາຍວ່າດ້ວຍການລົງທຶນຂອງລັດ; ກົດໝາຍວ່າດ້ວຍງົບປະມານ ເປັນຕົ້ນ, (4) ສັງເກດຕີລາຄາການຈັດຕັ້ງປະຕິບັດແຕ່ລະກົດໝາຍ ມີຂໍ້ສະດວກ, ຂໍ້ຫຍຸ້ງຍາກແນວໃດ? ມີດ້ານດີ, ດ້ານຄົງຄ້າງແນວໃດ? ຈະຕ້ອງປັບປຸງແກ້ໄຂແນວໃດຈຶ່ງສອດຄ່ອງ?. ກອງປະຊຸມຄັ້ງນີ້ ມີຄວາມໝາຍສຳຄັນຫຼາຍ, ມີເນື້ອໃນກວ້າງຂວາງ, ເລິກເຊິ່ງ ແລະ ພົວພັນເຖິງການຈັດຕັ້ງປະຕິບັດລັດຖະທຳມະນູນ ສະບັບປີ 1991 ຄົບຮອບ 32 ປີ ແລະ ສະບັບປີ 2015 ຄົບຮອບ 7 ປີ, ແຕ່ເວລາມີພຽງ 2 ວັນ ເທົ່ານັ້ນ ຈຶ່ງຮຽກຮ້ອງມາຍັງບັນດາທ່ານທີ່ເຂົ້າຮ່ວມ ຈົ່ງເຊີດຊູຄວາມຮັບຜິດຊອບ, ສຸມສະຕິປັນຍາ ເພື່ອຄົ້ນຄວ້າປະກອບຄຳເຫັນ ຕໍ່ແຕ່ລະເນື້ອໃນຂອງແຕ່ລະກົດໝາຍ ຕາມວາລະກອງປະຊຸມໃຫ້ມີຈຸດສຸມ, ຮັກສາເວລາ. ຄຳເຫັນຂອງບັນດາທ່ານ ຈະເປັນຂໍ້ມູນສຳຄັນໃຫ້ແກ່ຄະນະຮັບຜິດຊອບ ນຳໄປຄົ້ນຄວ້າ, ວິເຄາະວິໄຈ ປັບປຸງກົດໝາຍແຕ່ລະສະບັບ ເຮັດໃຫ້ແຕ່ລະກົດໝາຍ ມີເນື້ອໃນຈະແຈ້ງ, ຄົບຖ້ວນ, ຮັດກຸມ ແລະສາມາດຈັດຕັ້ງປະຕິບັດໄດ້ ດ້ວຍຄຸນນະພາບສູງ.

ໃນກອງປະຊຸມໄດ້ຮັບຟັງບົດປະເມີນການຈັດຕັ້ງປະຕິບັດກົດໝາຍວ່າດ້ວຍສະພາແຫ່ງຊາດ ແລະກົດໝາຍວ່າດ້ວຍສະພາປະຊາຊົນຂັ້ນແຂວງ; ບົດປະເມີນການຈັດຕັ້ງປະຕິບັດກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະສະພາປະຊາຊົນແຂວງ.
ທີ່ມາ: ສພຊ

แชร์