ບໍລິສັດ ພູເບ້ຍ ມາຍນິງ ມອບເງິນ 500 ລ້ານກີບ ເພື່ອຊ່ວຍບັນເທົາຜົນກະທົບຈາກໄພນໍ້າຖ້ວມ

ບໍລິສັດ ພູເບ້ຍ ມາຍນິງ ໄດ້ມອບເງິນຈໍານວນ 500,000,000 ກີບ ໂດຍມອບຜ່ານກະຊວງພະລັງງານ ແລະບໍ່ແຮ່ ເພື່ອຊ່ວຍເຫຼືອບັນເທົາທຸກໃຫ້ແກ່ຜູ້ປະສົບໄພນໍ້າຖ້ວມ ແລະດິນເຈື່ອນ.

ພິທີມອບຮັບໄດ້ຈັດຂຶ້ນຢູ່ທີ່ກະຊວງພະລັງງານ ແລະບໍ່ແຮ່ ໃນນະຄອນຫຼວງວຽງຈັນ ວັນທີ 22 ສິງຫາ ເຊິ່ງທ່ານ ຈັນເພັງ ບຸນນະຜົນ, ປະທານບໍລິສັດ ພູເບ້ຍ ມາຍນິງ ແລະທ່ານ ສະຕີບ ຈິມໂປ, ຜູ້ອໍານວຍການບໍລິສັດ ພູເບ້ຍ ມາຍນິງ ຊຶ່ງຕາງໜ້າບໍລິສັດ ແພນອອສ໌ ແລະບໍລິສັດ ກວາງດົງ ຣາຍຊິງ ໂຮລດິງ ກຼຸບ ຈໍາກັດ ໄດ້ມອບເງິນຊ່ວຍເຫຼືອດັ່ງກ່າວໃຫ້ກະຊວງພະລັງງານ ແລະບໍ່ແຮ່ ໂດຍພະນະທ່ານ ໂພໄຊ ໄຊຍະສອນ,ລັດຖະມົນຕີກະຊວງພະລັງງານ ແລະບໍ່ແຮ່, ໃນໂອກາດນີ້, ບໍລິສັດ ພູເບ້ຍ ມາຍນິງ ໄດ້ລາຍງານທ່ານລັດຖະມົນຕີ ກ່ຽວກັບການດໍາເນີນງານ, ຜົນປະກອບການ, ແຜນໃນຕໍ່ໜ້າ,ການຊະນະເລີດລາງວັນ ແລະໂຄງການທີ່ມີການປະຕິບັດທີດີເລີດລະດັບສາກົນຂອງພວກເຮົາຢູ່ແຂວງໄຊສົມບູນ, ແຜນງານຕ່າງໆໄດ້ສ້າງຂຶ້ນເພື່ອເຮັດໃຫ້ການພັດທະນາເສດຖະກິດ-ສັງຄົມສໍາລັບບັນດາຊຸມຊົນທ້ອງຖິ່ນມີຄວາມກ້າວໜ້າ, ຜົນປະໂຫຍດທາງກົງ ແລະທາງອ້ອມໃຫ້ແກ່ປະຊາຊົນກໍ່ຄືປະເທດລາວ.

ນອກຈາກນັ້ນບໍລິສັດກໍ່ໄດ້ຂໍຄວາມຊ່ວຍເຫຼືອຈາກທ່ານລັດຖະມົນຕີເພື່ອແກ້ໄຂບັນຫາທີ່ຍັງຄົງຄ້າງ ແລະຄວາມທ້າທາຍຕ່າງໆທີ່ມີຜົນກະທົບຕໍ່ການເຕີບໂຕໃນອະນາຄົດຂອງບໍລິສັດ. ທ່ານ ຈັນເພັງ ແລະທ່ານ ສະຕີບ ໄດ້ທາບທາມເຊື້ອເຊີນທ່ານລັດຖະມົນຕີ ເພື່ອລົງໄປຢ້ຽມຢາມເບິ່ງໂຄງການລະດັບໂລກຂອງບໍລິສັດ ພູເບ້ຍ ມາຍນິງ ດ້ວຍຕົວທ່ານເອງ ຢູ່ແຂວງໄຊສົມບູນ.

ທ່ານ ດາລິງ ເຊັງ, ຜູ້ອໍານວຍການໃຫຍ່ ແລະປະທານບໍລິຫານຂອງບໍລິສັດ ແພນອອສ໌ ໄດ້ກ່າວຢໍ້າຄໍາເຫັນທີ່ສະເໜີໃນໄລຍະກອງປະຊຸມຕາງໜ້າຜູ້ຖືຮຸ້ນຂອງບໍລິສັດ - ກວາງດົງ ຣາຍຊິງ ໂຮລດິງ ກຼຸບ ຈໍາກັດ - ກ່ຽວກັບຄວາມຊ່ວຍເຫຼືອຂອງບໍລິສັດເຂົ້າໃນການບັນເທົາທຸກຂອງປະເທດໃຫ້ແກ່ປະຊາຊົນລາວ ແລະບັນດາຊຸມຊົນທ້ອງຖິ່ນ.

ທ່ານ ດາລິງ ເຊັງກ່າວວ່າ “ຄວາມມຸ້ງໝັ້ນ ແລະຄວາມປາດຖະໜາດີຂອງຜູ້ຖືຮຸ້ນພວກເຮົາແມ່ນເພື່ອຊ່ວຍເຫຼືອປະຊາຊົນລາວ ແລະບັນດາຊຸມຊົນ ໃນຫຼາຍຊ່ອງທາງ ໃນໄລຍະທີ່ທ້າທາຍເວລານີ້. ບໍລິສັດ ພູເບ້ຍ ມາຍນິງ ໄດ້ຕອບຮັບໂດຍໄວເພື່ອຊ່ວຍເຫຼືອການບັນເທົາທຸກຂອງປະເທດເຂົ້າໄປໃນແຂວງໄຊສົມບູນ, ບໍລິຄໍາໄຊ ແລະຄໍາມ່ວນ ຊຶ່ງເປັນເຂດການດໍາເນີນງານຂອງພວກເຮົາ.”

ທ່ານ ດາລິງ ເຊັງ ໃຫ້ຮູ້ຕື່ມອີກວ່າ “ພວກເຮົາມຸ້ງໝັ້ນໃນການຮ່ວມມືກັບລັດຖະບານຂັ້ນສູນກາງ ແລະຂັ້ນແຂວງເພື່ອຊ່ວຍເຫຼືອສັງຄົມໃນຍາມທີ່ຈໍາເປັນ, ປັບປຸງຊີວິດການເປັນຢູ່ຂອງປະຊາຊົນລາວ ແລະຊຸມຊົນໃຫ້ດີຂຶ້ນ.”

ທ່ານ ຈັນເພັງ ບຸນນະຜົນ, ປະທານບໍລິສັດ ພູເບ້ຍ ມາຍນິງ, ໄດ້ກ່າວຢໍ້າເຖິງການໃຫ້ຄວາມຊ່ວຍເຫຼືອຂອງບໍລິສັດວ່າ “ພວກເຮົາຢືນຄຽງຂ້າງປະຊາຊົນລາວ ແລະ ບັນດາຊຸມຊົນທ້ອງຖິ່ນ ເພື່ອຜ່ານຜ່າຄວາມທ້າທາຍດັ່ງກ່າວນີ້. ການຊ່ວຍເຫຼືອຂອງພວກເຮົາຈະສະໜັບສະໜູນຄວາມຕ້ອງການການຊ່ວຍເຫຼືອເປັນພິເສດເພື່ອແກ້ໄຂສະຫວັດດິພາບຂອງບັນດາຄອບຄົວ ແລະເດັກນ້ອຍທີ່ປະສົບໄພນໍ້າຖ້ວມ.”

ໃນໄລຍະທ້າຍຂອງພິທີມອບຮັບ, ພະນະທ່ານ ໂພໄຊ ໄດ້ສະແດງຄວາມຂອບໃຈບໍລິສັດ ພູເບ້ຍ ມາຍນິງ ທີ່ໄດ້ລາຍງານກ່ຽວກັບການດໍາເນີນງານ, ຜົນປະກອບການ ແລະແຜນໃນຕໍ່ໜ້າ ແລະໃຫ້ການສະໜັບສະໜູນຊ່ວຍເຫຼືອປະເທດ ແລະລັດຖະບານແຫ່ງ ສປປ ລາວ. ພະນະທ່ານລັດຖະມົນຕີ ຈະຮ່ວມມືກັບລັດຖະບານຂັ້ນສູນກາງ ແລະຂັ້ນແຂວງຈະນໍາເອົາການຊ່ວຍເຫຼືອດັ່ງກ່າວໄປມອບໃຫ້ບັນດາເຂດທີ່ປະສົບໄພນໍ້າຖ້ວມ.

แชร์