ຫົວເຫວີຍລາວ ມອບເງິນປະກອບສ່ວນແກ້ໄຂໄພພິບັດທຳມະຊາດ

ບໍລິສັດຫົວເຫວີຍລາວ ໄດ້ມອບເງິນຊ່ວຍເຫລືອໃຫ້ລັດຖະບານລາວ ເພື່ອປະກອບສ່ວນບັນເທົາທຸກແກ້ໄຂໄພພິບັດທໍາມະຊາດ, ຊຶ່ງພິທີມອບ-ຮັບການຊ່ວຍເຫລືອດັ່ງກ່າວໄດ້ຈັດຂຶ້ນໃນຕອນແລງ ວັນທີ 16 ສິງຫາຜ່ານມາທີ່ ຫໍປະຊຸມແຫ່ງຊາດ ໃຫ້ກຽດມອບໂດຍທ່ານ ຮົວຈື່ເໝິງ ຜູ້ບໍລິຫານບໍລິສັດ ຫົວເຫວີຍລາວ ແລະຕາງໜ້າຮັບໂດຍທ່ານ ສອນໄຊ ສີພັນດອນ ນາຍົກລັດຖະມົນຕີ, ມີພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

ນັບແຕ່ທ້າຍເດືອນກໍລະກົດ 2023 ເປັນຕົ້ນມາ ສປປ ລາວ ໄດ້ຜະ​ເຊີນ​ໜ້າ​ກັບ​ໄພ​ທໍາມະຊາດນໍ້າ​ຖ້ວມ​ຢ່າງ​ຮ້າຍ​ແຮງໃນຫຼາຍພື້ນທີ່ຂອບເຂດທົ່ວປະເທດອັນໄດ້ສົ່ງຜົນກະທົບເສຍຫາຍຢ່າງໜັກໜ່ວງໃຫ້ແກ່ຊີວິດ, ຊັບສິນຂອງປະຊາຊົນກໍ່ຄືໂຄງລ່າງພື້ນຖານໄດ້ຖືກທໍາລາຍເປັນຈໍານວນຫຼວງຫຼາຍ. ທ່ານ ສອນໄຊ ສີພັນດອນ ໄດ້ແຈ້ງໃຫ້ຊາບວ່າ: ສະພາບຜົນກະທົບຈາກໄພນໍ້າຖ້ວມໃນປີນີ້ແມ່ນໜັກໜ່ວງໂດຍສະເພາະຢູ່ແຂວງສະຫວັນນະເຂດ, ແຂວງຄຳມ່ວນ ແລະ ແຂວງບໍລິຄຳໄຊ, ຊຶ່ງໄດ້ສ້າງຄວາມເສຍຫາຍຕໍ່ຊີວິດ ແລະຊັບສິນຂອງປະຊາຊົນ, ລວມທັງໂຄງລ່າງພື້ນຖານຕ່າງໆ ເປັນຈຳນວນຫຼວງຫຼາຍເຮັດໃຫ້ການເດີນທາງໄປມາຕະຫຼອດຮອດການດຳລົງຊີວິດຂອງປະຊາຊົນຢູ່ເຂດພື້ນທີ່ຖືກຜົນກະທົບພົບກັບຄວາມຫຍຸ້ງຍາກ. ຕໍ່ສະພາບການດັ່ງກ່າວ,  ລັດຖະບານກໍ່ຄືບັນດາຂະແໜງການ, ທ້ອງຖິ່ນ ແລະພາກສ່ວນຕ່າງໆ ໃນທົ່ວສັງຄົມກໍ່ໄດ້ສຸມໃສ່ໃຫ້ການຊ່ວຍເຫຼືອຜູ້ປະສົບໄພນໍ້າຖ້ວມ ຢ່າງວ່ອງໄວ, ຕິດຕາມສະພາບການຢ່າງໃກ້ຊິດ ແລະຟື້ນຟູຜົນກະທົບໃຫ້ກັບຄືນສູ່ສະພາບປົກກະຕິເປັນກ້າວໆ. ພ້ອມກັນນີ້, ທ່ານນາຍົກລັດຖະມົນຕີ ໄດ້ກ່າວສະແດງຄວາມຊົມເຊີຍ, ຂອບໃຈ ແລະ ຮູ້ບຸນຄຸນຕໍ່ພາກສ່ວນຕ່າງໆ ທີ່ໄດ້ມີຈິດໃຈມະນຸດສະທໍາ, ເອື້ອເພື້ອເຜື່ອແຜ່ໃຫ້ການຊ່ວຍເຫຼືອຕໍ່ບັນດາຜູ້ປະສົບອຸທົກກະໄພໃນຄັ້ງນີ້, ຊຶ່ງການຊ່ວຍເຫຼືອດັ່ງກ່າວແມ່ນສອດຄ່ອງກັບຄວາມຮຽກຮ້ອງຕ້ອງການຂອງສະພາບການຕົວຈິງໃນປະຈຸບັນ, ເປັນການເສຍສະຫຼະເພື່ອປະກອບສ່ວນເຂົ້າໃນການແກ້ໄຂຜົນກະທົບ ແລະຟື້ນຟູຊີວິດການເປັນຢູ່ຂອງປະຊາຊົນ ຜູ້ທີ່ປະສົບໄພທໍາມະຊາດໃຫ້ກັບຄືນສູ່ສະພາບປົກກະຕິໂດຍໄວ; ພ້ອມກັນນັ້ນ, ທ່ານນາຍົກລັດຖະມົນຕີ ກໍ່ໄດ້ໃຫ້ຢືນຢັນວ່າຈະນຳເອົາການຊ່ວຍເຫຼືອດັ່ງກ່າວໄປມອບໃຫ້ພາກສ່ວນກ່ຽວຂ້ອງນຳໃຊ້ເຂົ້າໃນການຊ່ວຍເຫຼືອບັນເທົາທຸກໃຫ້ແກ່ຜູ້ປະສົບໄພພິບັດດ້ວຍຄວາມໂປ່ງໃສ, ສາມາດກວດສອບໄດ້, ອັນສຳຄັນແມ່ນໃຫ້ເຖິງ ແລະຖືກເປົ້າໝາຍຢ່າງແທ້ຈິງ.

ບໍລິສັດຫົວເຫວີຍລາວ ເວລາໃດກໍໃຫ້ຄວາມສໍາຄັນຢ່າງຍິ່ງໃນການປະກອບສ່ວນຊ່ວຍເຫຼືອສັງຄົມດ້ວຍຫຼາຍຮູບແບບທັງສະແດງໃຫ້ເຫັນຄວາມມຸ່ງໝັ້ນທີ່ມີຄວາມຮັບຜິດຊອບຕໍ່ສັງຄົມກໍ່ຄືເພື່ອນມະນຸດດ້ວຍກັນ, ດ້ວຍການອຸທິດຕົນເພື່ອຢືນຄຽງຂ້າງປະຊາຊົນຜູ້ທີ່ໄດ້ຮັບຜົນກະທົບ ແລະພ້ອມທີ່ຈະສືບຕໍ່ໃຫ້ການສະໜັບສະໜູນ, ຊ່ວຍເຫຼືອຕາມຄວາມສາມາດຂອງຕົນຈົນກວ່າສະຖານະການຈະກັບຄືນສູ່ສະພາບປົກກະຕິ ແລະເຊື່ອໝັ້ນຢ່າງຍິ່ງວ່າດ້ວຍຈິດໃຈອັນຄວາມເຂັ້ມແຂງຂອງປະຊາຊົນລາວ ຜູ້ທີ່ໄດ້ຮັບຜົນກະທົບໃນຄັ້ງນີ້ຈະພ້ອມກັນຜ່ານຜ່າອຸປະສັກນາໆປະການໄປດ້ວຍດີ.

แชร์