ເປີດແຂ່ງຂັນດອກປີກໄກ່ ຊີງຂັນປະທານສະພາແຫ່ງຊາດ ປະຈຳປີ 2023

ເປີດສາກຂຶ້ນຢ່າງເປັນທາງການການແຂ່ງຂັນກີລາດອກປີກໄກ່ ທົ່ວປະເທດ ຄັ້ງທີ 22 ຊິງຂັນທ່ານປະທານສະພາແຫ່ງຊາດ ປະຈຳປີ 2023 ຫຼື ລາຍການ (22nd BeerLao Badminton Championship 2023 Presented by Lao Brewery Company) ໃນວັນທີ 23 ສິງຫາ 2023 ທີ່ສະໂມສອນ ເສດຖາ ຊີງເງິນລາງວັນລວມ 146 ລ້ານກວ່າກີບ ເພື່ອເປັນການສ້າງຂະບວນການຂໍ່ານັບຮັບຕ້ອນວັນຢຶດອຳນາດ ຄົບຮອບ 48 ປີ (23 ສິງຫາ 1975 ຫາ 23 ສິງຫາ 2023) ແລະສົ່ງເສີມນັກກີລາດອກປີກໄກ່ຮຸ່ນສືບທອດມີການເຄື່ອນໄຫວຢ່າງຕໍ່ເນື່ອງເພື່ອກ້າວສູ່ທີມຊາດໃນຕໍ່ໜ້າ.

ລາຍການດັ່ງກ່າວຈັດຂຶ້ນເປັນຄັ້ງທີ 22 ແລ້ວ ໂດຍໄດ້ຮັບການສະໜັບສະໜູນຫຼັກຈາກບໍລິສັດ ເບຍລາວ ຈຳກັດ ແລະປີນີ້ເບຍລາວ ກໍສືບຕໍ່ມອບເງິນຈຳນວນ 362 ລ້ານກີບ ສະໜັບສະໜູນງານດັ່ງກ່າວ ເປັນການກ່າວມອບໂດຍທ່ານ ຈັນສະໝອນ ຜ່ອງຈັນທາ ຜູ້ອຳນວຍການຝ່າຍການຕະຫຼາດ ບໍລິສັດ ເບຍລາວ ຈຳກັດ ແລະ ກ່າວຮັບແມ່ນທ່ານ ໄຊບັນດິດ ຣາຊະພົນ ຮອງປະທານ-ເລຂາທິການ ສະຫະພັນດອກປີກໄກ່ແຫ່ງຊາດລາວໃຫ່ກຽດເຂົ້າຮ່ວມເປັນສັກຂີພິຍານມີທ່ານ ນາງ ທຸມມາລີ ວົງພະຈັນ ປະທານກຳມາທິການວັດທະນະທຳ ແລະສັງຄົມ ສະພາແຫ່ງຊາດ ທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງສຶກສາທິການ ແລະ ກີລາ ປະທານຄະນະກຳມະການພາລາແລມປິກແຫ່ງຊາດລາວທັງເປັນຮອງປະທານຄະນະກຳມະການໂອແລມປີກແຫ່ງຊາດລາວ ຫຼືຄອລ ແລະທ່ານ ແສງພອນ ພົນອາມາດ ຫົວໜ້ກົມກິລາລະດັບສູງ ທັງເປັນເລຂາທິການ ຄອລ ພ້ອມດ້ວຍຄະນະບໍລິຫານງານສະຫະພັນຄະນະນຳແຕ່ລະພາກສ່ວນ ຄູເຝິກ ແລະນັກກີລາ ຕະຫຼອດຮອດມວນຊົນຊາວນະຄອນຫຼວງ ແລະຊາງຕ່າງຊາດເຂົ້າຮ່ວມຢ່າງຫຼວງຫຼາຍ.

ລາຍການນີ້ ຈະຈັດຂຶ້ນ ລະຫວ່າງວັນທີ 23-26 ສິງຫານີ້ ມີການຊີງໄຊທັງໝົດ 13 ລາຍການ ມີນັກກີລາເຂົ້າຮ່ວມທັງໝົດ 324 ຄົນ ຍິງ 47 ຄົນ ຈາກ 24 ພາກສ່ວນໃນນັ້ນມີ 5 ແຂວງເຂົ້າຮ່ວມ ປະກອບມີ ແຂວງຈໍາປາສັກ ແຂວງສະຫວັນນະເຂດ ແຂວງຄຳມ່ວນ ແຂວງຫຼວງພະບາງ ແລະ ແຂວງອຸດົມໄຊ ນອກຈາກນັ້ນ ກໍຍັງມີບັນດາສະໂມສອນອ້ອມຂ້າງສູນກາງ ແລະບັນດານັກກິລາອິດສະລະທີ່ບໍ່ມີສັງກັດຈຳນວນໜຶ່ງເຂົ້າຮ່ວມຊີງໄຊຢ່າງເປັນຂະບວນຄືກຄັກ.

แชร์