ສປປ ລາວ ເປັນເຈົ້າພາບຈັດກອງປະຊຸມລັດຖະມົນຕີສິ່ງແວດລ້ອມອາຊຽນ ຄັ້ງທີ 17

ກອງປະຊຸມລັດຖະມົນຕີສິ່ງແວດລ້ອມອາຊຽນຄັ້ງທີ 17 (PREP-AAME) ທີ່ ສປປ ລາວ ຮັບກຽດເປັນເຈົ້າພາບ ໄດ້ໄຂຂຶ້ນຢ່າງເປັນທາງການທີ່ຫໍປະຊຸມແຫ່ງຊາດ ໃນວັນທີ 23 ສິງຫາ 2023 ນີ້ ເພື່ອຮ່ວມມືແກ້ໄຂບັນຫາດ້ານສິ່ງແວດລ້ອມໃນຂົງເຂດອາຊຽນ ແລະ ພາກພື້ນ ພາຍໃຕ້ການເປັນປະທານຂອງທ່ານນາງ ບຸນຄໍາ ວໍລະຈິດ ລັດຖະມົນຕີ ກະຊວງຊັບພະຍາກອນທໍາມະຊາດ ແລະສິ່ງແວດລ້ອມມີລັດຖະມົນຕີສິ່ງແວດລ້ອມອາຊຽນເຈົ້າໜ້າທີ່ອາວຸໂສສິ່ງແວດລ້ອມອາຊຽນ ແລະປະເທດສັງເກດການເຂົ້າຮ່ວມ.

ທ່ານລັດຖະມົນຕີ ກະຊວງຊັບພະຍາກອນທໍາມະຊາດ ແລະສິ່ງແວດລ້ອມໄດ້ກ່າວໃນກອງປະຊຸມວ່າ: ກອງປະຊຸມຄັ້ງນີ້ຖືເປັນເວທີສໍາຄັນໃນການປຶກສາຫາລື ແລະຕົກລົງກ່ຽວກັບນະໂຍບາຍ ມາດຕະການ ແລະ ແຜນການລະດັບພາກພື້ນ ເພື່ອສະໜັບສະໜູນໃນການຄຸ້ມຄອງສິ່ງແວດລ້ອມ ແລະ ການພັດທະນາທີ່ຍືນຍົງໂດຍຮັບຮູ້ຄວາມຄືບໜ້າ ແລະ ຜົນສໍາເລັດຂອງການຮ່ວມມືອາຊຽນດ້ານສິ່ງແວດລ້ອມ ໂດຍສະເພາະສຸມໃສ່ບັນດາຂົງເຂດທີ່ສໍາຄັນພາຍໃຕ້ປະຊາຄົມວັດທະນະທໍາ-ສັງຄົມອາຊຽນ ແລະແຜນແມ່ບົດປີ 2025 ກອງປະຊຸມໄດ້ລາຍງານຄວາມຄືບໜ້າ ແລະຜົນສໍາເລັດຂອງ 7 ບູລິມະສິດຍຸດທະສາດດ້ານສິ່ງແວດລ້ອມຂອງຄະນະປະຕິບັດງານເຈົ້າໜ້າທີ່ອາວຸໂສອາຊຽນສິ່ງແວດລ້ອມ ແລະວຽກງານຂອງຄະນະບໍລິຫານງານສູນຊີວະນາໆພັນອາຊຽນ ພ້ອມນີ້ຍັງໄດ້ພິຈາລະນາ ແລະຮອງຮັບແຜນການຮ່ວມມືທີ່ສໍາຄັນໃນຕໍ່ໜ້າ ແລະ ຫາລືວຽກງານສໍາຄັນຕ່າງໆທາງດ້ານສິ່ງແວດລ້ອມເພື່ອນໍາໄປສູ່ການປັບປຸງສະພາບແວດລ້ອມ ແລະ ມາດຕະຖານການດໍາລົງຊີວິດຂອງມວນມະນຸດ.

ຕໍ່ກັບແຜນປະຊາຄົມວັດທະນະທໍາ-ສັງຄົມອາຊຽນ ແລະແຜນແມ່ບົດປີ 2025 ລັດຖະບານ ສປປ ລາວ ໄດ້ໃຫ້ຄວາມສໍາຄັນ ແລະເອົາໃຈໃສ່ຕໍ່ການພັດທະນາແບບຍືນຍົງ ເພື່ອຮັບປະກັນການເຕີບໂຕຂອງເສດຖະກິດ-ສັງຄົມ ແລະການປົກປັກຮັກສາສິ່ງແວດລ້ອມໄປພ້ອມໆກັນລັດຖະບານໄດ້ພັດທະນາຈັດຕັ້ງປະຕິບັດ ແລະປັບປຸງນະໂຍບາຍກົນໄກ ເຄື່ອງມືທາງດ້ານກົດໝາຍເພື່ອຮັບປະກັນການຈັດຕັ້ງປະຕິບັດການພັດທະນາແບບຍືນຍົງໂດຍເນັ້ນໃສ່ມາດຕະການແກ້ໄຂການຄຸ້ມຄອງສິ່ງເສດເຫຼືອມົນລະພິດສິ່ງແວດລ້ອມ ແລະຊັບພະຍາກອນທໍາມະຊາດທີ່ທົດແທນໄດ້.

ດ້ວຍຄວາມພະຍາຍາມຢ່າງສຸດຄວາມສາມາດເພື່ອໃຫ້ບັນລຸຄໍາໜັ້ນສັນຍາໃນການຈັດຕັ້ງປະຕິບັດວາລະປີ 2030 ກ່ຽວກັບເປົ້າໝາຍການພັດທະນາແບບຍືນຍົງ ແລະ ສົນທິສັນຍາປາຣີ ວ່າດ້ວຍການປ່ຽນແປງດິນຟ້າອາກາດ ລັດຖະບານ ສປປ ລາວ ໄດ້ວາງແຜນເພື່ອແກ້ໄຂການປ່ຽນແປງຂອງດິນຟ້າອາກາດໃຫ້ມີປະສິດທິຜົນ ແລະ ກະກຽມຍຸດທະສາດການພັດທະນາການປ່ອຍອາຍພິດຕໍ່າໃນໄລຍະຍາວເຊິ່ງຄວາມພະຍາຍາມໃນການປົກປ້ອງຊັບພະຍາກອນທໍາມະຊາດ ແລະສະພາບອາກາດໃຫ້ອຸດົມສົມບູນສະນັ້ນຈຶ່ງມີຄວາມຈໍາເປັນຈະຕ້ອງໄດ້ມີການຮ່ວມມືຈາກບັນດາປະເທດສະມາຊິກອາຊຽນ ແລະພາກພື້ນ.

แชร์