ຍິງສາວ ອາຍຸ 20-25 ປີ ເສຍຊີວິດຍ້ອນສູບຢາໄຟຟ້າ

ບັນຫາຢາສູບໄຟຟ້າແມ່ນແຜ່ລາມໄປຫຼາຍໃນປະເທດລາວເຮົາ ແລະໃນທົ່ວໂລກ, ກາຍເປັນສິ່ງຍອດນິຍົມທີ່ໄວໜຸ່ມທຸກຄົນຕ້ອງມີ, ເປັນສິ່ງເບື່ອເມົາໃຫ້ກັບຄົນໃນສັງຄົມ ຢ່າງຫຼີກລ່ຽງບໍ່ໄດ້.

ລ່າສຸດໃນວັນທີ 22 ສິງຫາ 2023 ທ່ານ ດຣ ທອງພູນ ໝື່ນພິລົມ ຫົວໜ້າພະແນກພາຍໃນ ໂຮງໝໍມິດຕະພາບ (150ຕຽງ ) ໄດ້ເປີດເຜີຍຂໍ້ມູນກ່ຽວກັບສະຖິຕິກຸ່ມຄົນທີ່ເປັນພະຍາດປອດອັກເສບທີ່ເກີດຈາກການສູບຢາສູບໄຟຟ້າ ທ່ານໃຫ້ຮູ້ວ່າ: ໃນປະຈຸບັນຢາສູບໄຟຟ້າ ແມ່ນແຜ່ລາມຫຼາຍໃນກຸ່ມໄວໜຸ່ມ ແລະນັບມື້ຍິ່ງເພີ່ມທະວີຂຶ້ນຫຼາຍເລີ່ມຈາກປີ 2020 ເປັນຕົ້ນມາໃນໂຮງໝໍມິດຕະພາບແມ່ນພົບກໍລະນີຄົນເຈັບທາງເດີນຫາຍໃຈເປັນພະຍາດປອດອັກເສບຮຸນແຮງມີ 2 ກໍລະນີ, ໃນນີ້ມີ 1 ກໍລະນີ ເປັນເພດຍິງອາຍຸປະມານ 20-25 ປີ ມີອາການແໜ້ນໜ້າເອິກ, ຫາຍໃຈຝຶດ, ຫາຍໃຈບໍ່ອອກ,ໄອແຫ້ງ ແລະເຈັບຄໍ ທ່ານໝໍຈື່ງໄດ້ສ່ອງລັງສີ (XRay) ຈື່ງພົບເນື້ອປອດ 90 ເປີເຊັນເປັນສີຂາວ, ສອບຖາມຜູ້ປົກຄອງຈື່ງຮູ້ວ່າຜູ້ກ່ຽວແມ່ນສູບຢາສູບໄຟຟ້າມາເປັນເວລາ 2-3 ປີ ແລ້ວ, ພາຍຫຼັງນອນປິ່ນປົວຢູ່ໂຮງໝໍໄດ້ 3-4 ວັນກໍ່ເສຍຊີວິດ.

ກຸ່ມຄົນທີ່ເປັນພະຍາດປອດອັກເສບທີ່ເກີດຈາກການສູບຢາສູບໄຟຟ້າ ເບື້ອງຕົ້ນຈະມີອາການຄື: ຄໍແຫ້ງ, ປາກແຫ້ງ, ວິນຫົວ, ປວດຮາກ, ໄອແບບແຫ້ງໆ. ຖ້າຍັງສືບຕໍ່ສູບໄລຍະຍາວ ສ່ຽງຕໍ່ເສັ້ນເລືອດຫົວໃຈ, ພາໃຫ້ເສັ້ນເລືອດຫົວໃຈແຂງ, ເປັນພະຍາດລະບົບທາງເດີນຫາຍໃຈ,ປອດອັກເສບ, ຫຼອດປອດອັກເສບ, ມີອາການຊັກເກີດຈາກສະໝອງມີສານຕົກຄ້າງ, ຖ້າເກີດມີອາການທີ່ກ່າວມານັ້ນຕ້ອງຮີບຮ້ອນໄປພົບແພດໝໍໂດຍດ່ວນ.

ທ່ານຍັງໄດ້ເປີດເຜີຍຂໍ້ມູນຈາກອົງການອະນາໄມໂລກ ( WHO ) ກ່ຽວກັບກຸ່ມຄົນທີ່ເປັນພະຍາດປອດອັກເສບທີ່ເກີດຂື້ນຈາກການສູບ ຢາສູບໄຟຟ້າໄລຍະເວລາ 1 ປີ ໃນ 50 ລັດຂອງ ສະຫະລັດ ອາເມລິກາມີ 2.807 ຄົນທີ່ຕ້ອງນອນປິ່ນປົວໃນໂຮງໝໍ ແລະ ມີຈຳນວນເພີ່ມຫຼາຍຂຶ້ນຈົນພາໃຫ້ເສຍຊີວິດ 68 ຄົນ; ສະເລ່ຍອາຍຸ ແມ່ນຢູ່ລະຫວ່າງ 15-70 ປີ, ໂດຍອົງການອະນາໄມໂລກໄດ້ສະຫຼຸບສັງລວມເກນອາຍຸທີ່ສູບຢາກສູບໄຟຟ້າຫຼາຍ ໃນນີ້ 15% ອາຍຸຕໍ່າກວ່າ 18 ປີ, 38% ອາຍຸລະຫວ່າງ 18 – 24ປີ, 24% ອາຍຸ 25-35 ປີ, 25% ອາຍຸ 35 ປີຂື້ນໄປ, ແຕ່ໃນ ສປປ ລາວເຮົາແມ່ນຍັງບໍ່ທັນໄດ້ ເກັບກຳຂໍ້ມູນລະອຽດເທື່ອ, ກຸ່ມຄົນທີ່ສູບຢາໄຟຟ້າໃນກຸ່ມອາຍຸສູງແມ່ນຍ້ອນຢາກເຊົາຢາຈື່ງສູບ ຢາສູບໄຟຟ້າທົດແທນ, ສ່ວນກຸ່ມໄວໜຸ່ມ ແມ່ນຍ້ອນຢາກລອງ, ຢາກຮູ້ ແລະຈາກການຊັກຊວນຂອງໝູ່ເພື່ອນ, ແຕ່ໃນປັດຈຸບັນນີ້ພັກ-ລັດເຮົາແມ່ນເລັງເຫັນໃນໂທດຂອງພວກມັນຊຶ່ງຈັດເຂົ້າເປັນສິ່ງເສບຕິດ ແລະໄດ້ອອກກົດໝາຍຄຸ້ມຄອງ ແລະວາງມາດຕະການຕໍ່ຜູ້ທີ່ຊື້-ຂາຍ, ມີໄວ້ໃນຄອບຄອງຢາສູບໄຟຟ້າ.

ໃນຕອນທ້າຍທ່ານຍັງໄດ້ຝາກເຕືອນໃຫ້ກຸ່ມຄົນໃນສັງຄົມຈົ່ງເຂົ້າໃຈວ່າຢາສູບໄຟຟ້າບໍ່ສາມາດທົດແທນການເຊົາສູບຢາໄດ້, ຖ້າຢາກເຊົາຕ້ອງເລີ່ມປະຕິບັດດ້ວຍການຫຼຸດຈຳນວນທີ່ສູບລົງໃນແຕ່ລະມື້ຈື່ງຈະເຊົາໄດ້ສຳເລັດ, ສ່ວນໄວໜຸ່ມຕ້ອງຮັບຮູ້, ເຂົ້າໃຈເຖິງຜົນຮ້າຍ ແລະບໍ່ຄວນຄິດຢາກລອງຢ່າງເດັດຂາດ. ເພາະມັນສົ່ງແຕ່ຜົນເສຍໃຫ້ກັບຕົນເອງ ແລະຄົນອ້ອມຂ້າງ, ຖ້າເຈົ້າໜ້າທີ່ພົບເຫັນກໍ່ຈະຖືກປະຕິບັດວິໃນ.
ທີ່ມາ: Lao Youth radio FM90.0 mhz

แชร์