ອພບ ເລັ່ງແກ້ໄຂຂີ້ເຫຍື້ອອັດຮ່ອງລະບາຍນໍ້າ ສາເຫດນໍ້າຖ້ວມຂັງໃນຕົວເມືອງ

ວັນທີ 20 ສິງຫາ 2023, ຫ້ອງການຄຸ້ມຄອງ ແລະ ບໍລິການຕົວເມືອງ ໄດ້ອະນາໄມຮ່ອງລະບາຍນໍ້າແຄມທາງ ຢູ່ເຂດບ້ານໜອງສ້າງທໍ່ ເມືອງໄຊເສດຖາແລະ ຮ່ອງລະບາຍນໍ້າແຄມທາງ ຖະໜົນສຸພານຸວົງ ເຂດເມືອງສີໂຄດຕະບອງ ນະຄອນຫລວງວຽງຈັນ ເນື່ອງຈາກມີນໍ້າຖ້ວມຂັງ ແລະໄຫລເປື້ອນຫົນທາງ.

ພາຍຫລັງໃງ້ຝາຮ່ອງລະບາຍນໍ້າອອກມາພົບວ່າຮ່ອງລະບາຍນໍ້າເຕັມໄປດ້ວຍກະຕຸກນໍ້າ, ປ໋ອງເຄື່ອງດື່ມ ແລະຂີ້ເຫຍື້ອຈາໍພວກຖົງປລາສຕິກອັດແໜ້ນຢູ່ຈຳນວນຫລາຍອັນເປັນສາເຫດເຮັດໃຫ້ນໍ້າໄຫລບໍ່ໄດ້ສົ່ງຜົນໃຫ້ເກີດມີນໍ້າຖ້ວມເມື່ອເວລາມີຝົນຕົກ.

ສິ່ງທີ່ຕ້ອງປັບປຸງຖອດຖອນບົດຮຽນ ແລະຕ້ອງເຮັດຄື: ທຸກພາກສ່ວນຕ້ອງຮ່ວມແຮງຮ່ວມໃຈກັນບໍ່ຖິ້ມຂີ້ເຫຍື້ອຊະຊາຍ ແລະພາກສ່ວນກ່ຽວຂ້ອງ ຫລືພາກສ່ວນ ອພບ ຕ້ອງໝັ່ນອະນາໄມລວງຕະຄອງຮ່ອງລະບາຍນໍ້າຢູ່ເປັນໄລຍະໆ, ຫາກປະຕິບັດໄດ້ຄືແນວນີ້ບັນຫານໍ້າຖ້ວມຂັງໃນຕົວເມືອງຈະຫລຸດໜ້ອຍຖອຍລົງຢ່າງແນ່ນອນ.
ທີ່ມາ: ລາວພັດທະນາ

• 21/08/2023