ກອງທຶນຊ່ວຍເຫຼືອສັງຄົມ ສະພາແຫ່ງຊາດ ມອບເຄື່ອງຊ່ວຍເຫຼືອຜູ້ປະສົບໄພນໍ້າຖ້ວມ ຢູ່ແຂວງຄໍາມ່ວນ

ວັນທີ 20 ສິງຫາ 2023 ທີ່ຫ້ອງວ່າການແຂວງຄໍາມ່ວນທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ມອບເຄື່ອງຊ່ວຍເຫຼືອໃຫ້ຄະນະກໍາມະການຄຸ້ມຄອງໄພພິບັດຂັ້ນແຂວງເພື່ອນໍາໄປມອບຕໍ່ໃຫ້ແກ່ປະຊາຊົນ ທີ່ໄດ້ຮັບຜົນກະທົບຈາກໄພນໍ້າຖ້ວມ ຢູ່ບັນດາເມືອງ ແລະບ້ານຕ່າງໆ ໃນທົ່ວແຂວງ. ໂດຍການເປັນກຽດຮັບຂອງທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ມີທ່ານ ບຸນມີ ພິມມະສອນ ປະທານສະພາປະຊາຊົນແຂວງ, ພ້ອມດ້ວຍປະທານຄະນະກໍາມະການຄຸ້ມຄອງໄພພິບັດຂັ້ນແຂວງເຂົ້າຮ່ວມ.

ເຄື່ອງທີ່ກອງທຶນຊ່ວຍເຫຼືອສັງຄົມສະພາແຫ່ງຊາດ ໄດ້ຊ່ວຍເຫຼືອໃນຄັ້ງນີ້ລວມມູນຄ່າ 120 ລ້ານກີບ, ໃນນີ້ເປັນເງິນສົດ 50 ລ້ານກີບ ແລະແນວພັນເຂົ້າປູກ 5 ໂຕນ ມູນຄ່າ 70 ລ້ານກີບ.

ທ່ານ ວັນໄຊ ພອງສະຫວັນ ຍັງໄດ້ມອບໃບຍ້ອງຍໍຂອງແຂວງໃຫ້ແກ່ຮອງປະທານສະພາແຫ່ງຊາດ, ພ້ອມທັງສະແດງຄວາມຂອບໃຈຕໍ່ການຊ່ວຍເຫຼືອຄັ້ງນີ້.
ໃນໂອກາດດຽວກັນຍັງໄດ້ຮັບການຊ່ວຍເຫຼືອຈາກຕາງໜ້າອົງການພຸດທະສາສະໜາສໍາພັນລາວ ແລະຄະນະພຣະຄູປຣັດສີທໍາມະວັດ ເຈນຢູທະນາ ຈິຣະຢູໂທ ຈາກສະກົນນະຄອນ ຣາຊະອານາຈັກໄທ ໄດ້ນໍາເອົາເຄື່ອງບໍລິໂພກ ຈໍານວນ 300 ຊຸດ, ມູນຄ່າ 45 ລ້ານກີບ. ອົງການກາແດງແຫ່ງຊາດລາວມອບເຄື່ອງບໍລິໂພກ ມູນຄ່າ 65 ກວ່າລ້ານກີບ, ຮັບໂດຍທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄໍາມ່ວນ, ປະທານຄະນະກໍາມະການຄຸ້ມຄອງໄພພິບັດຂັ້ນແຂວງ.

ສໍາລັບຜູ້ທີ່ສົນໃຈຢາກຈະປະກອບສ່ວນ ແລະຊ່ວຍເຫຼືອສາມາດເຂົ້າຮ່ວມການບໍລິຈາກໄດ້ທີ່ຫ້ອງວ່າການ ແຂວງຄຳມ່ວນ ຫຼືຕິດຕໍ່ທາງກອງເລຂາໄດ້ທີ່ເບີໂທລະສັບ: 020 22157273 ແລະ ເບີ 02058823499.
ທີ່ມາ: ມະນີວັນ

แชร์