ວັນທີ 19 ສິງຫາ 2023 ນີ້, ເມືອງໂຂງ ແຂວງຈຳປາສັກ ໄດ້ມີພິທີວາງສີລາລຶກໂຄງການກໍ່ສ້າງຫໍຫຼັກເມືອງ ເພື່ອເປັນບ່ອນສັກກາລະບູຊາ ແລະເປັນສະຖານທີ່ທ່ອງທ່ຽວດ້ານວັດທະນະທຳ; ໃຫ້ກຽດເຂົ້າຮ່ວມພິທີຄັ້ງນີ້ມີທ່ານ ສະນັ່ນ ສີພາພົມມະຈັນ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ, ທ່ານ ສາຍທອງ ໄຊຍະວົງ ຮອງເລຂາພັກແຂວງປະທານສະພາປະຊາຊົນແຂວງ, ພຣະອາຈານ ບຸນສີ ຄຳສະຫວັດ ເຈົ້າຄະນະສົງເມືອງ, ພຣະອາຈານ ບຸນຈອນ ແກ້ວສັນຕິໄຊ ຮອງເຈົ້າຄະນະສົງ, ມີຫົວໜ້າ, ຮອງຫົວໜ້າພະແນກການອ້ອມຂ້າງແຂວງ, ເຈົ້າເມືອງ, ຮອງເຈົ້າເມືອງອ້ອມຂ້າງ, ແຂກຖືກເຊີນ, ຫົວໜ່ວຍທຸລະກິດພາຍໃນເມືອງ ພ້ອມດ້ວຍອຳນາດການການປົກຄອງບ້ານທົ່ວເມືອງ 114 ບ້ານເຂົ້າຮ່ວມຢ່າງພ້ອມພຽງ.
ໂອກາດນີ້ທ່ານນາງ ຄຳພູ ລິດທິສັກ ເຈົ້າເມືອງໆໂຂງໄດ້ຂຶ້ນລາຍງານວ່າ: ໂຄງການກໍ່ສ້າງຫໍຫຼັກເມືອງນອນໃນເນື້ອທີ່ 1.800 ຕາແມັດ, ປະກອບດ້ວຍຫໍ ແລະສ່ວນດອກໄມ້, ຮູບແບບອາຄານແມ່ນຊົງລາວ ແລະ ລາຍລາວທີ່ເປັນເອກະລັກລາວ; ມີຂະໜາດຄວາມກວ້າງຂອງກົມມະລຽນ 20X20 ແມັດ, ຍົກຈາກພື້ນດິນສູງ 1,2 ແມັດ, ຕົວອາຄານມີຄວາມກວ້າງ 8X6,5 ແມັດ, ປະກອບດ້ວຍແອວຂັນ ແລະ ມີ 2 ລະດັບນັບແຕ່ໜ້າດິນຫາໂຕຫໍ, ແຕ່ລະຊັ້ນລື່ນກັນ 1,2 ແມັດ ຫາ 1,3 ແມັດ ປະກອບດ້ວຍລາຍທີ່ເປັນເອກະລັກຂອງລາວທັງໝົດ. ຕົວອາຄານຫໍຫຼັກເມືອງມີຄວາມສູງແຕ່ໜ້າດິນຫາຍອດຊໍ່ຟ້າ 17,5 ແມັດ, ເສົາຫຼັກເມືອງແມ່ນເຮັດດ້ວຍຫີນໜ້າຕັດ 90 ຊັງຕີແມັດ, ແກະສະຫຼັກລາຍລາວ ລວມມູນຄ່າການກ່ໍສ້າງທັງໝົດ 2.000 ລ້ານກີບ.
ທ່ານເຈົ້າເມືອງໆໂຂງ ໃຫ້ຮູ້ຕື່ມວ່າ: ການກໍ່ສ້າງຫໍຫຼັກເມືອງ ນີ້ແມ່ນການສືບທອດມູນເຊື້ອອັນດີງາມຂອງຊາດກໍຄືຂອງທ້ອງຖິ່ນ ແລະເປັນການສົ່ງເສີມສິລະປະວັດທະນະທຳຂອງທ້ອງຖິ່ນ, ເປັນສັນຍາລັກແຫ່ງຄວາມສາມັກຄີປອງດອງອັນໜຶ່ງອັນດຽວກັນຂອງຊາວເມືອງໂຂງ, ເປັນສັນຍາລັກຂອງເມືອງໂຂງຍຸກໃໝ່ຍຸກແຫ່ງຄວາມນຈະເລີນສີວິໄລ ແລະທັນສະໄໝ; ເປັນບ່ອນສັກກາລະບູຊາ ແລະເປັນມິ່ງຂວັນ, ເປັນມໍລະດົກອັນລໍ້າຄ່າຢູ່ຄູ່ບ້ານຄູ່ເມືອງຂອງຊາວເມືອງໂຂງຕະຫຼອດໄປ.
ໂດຍ: ໂພທິລາດ
| ສະກຸນເງີນ | ອັດຕາຊື້ | ອັດຕາຂາຍ | |
|
EUR | 21.356 | 21.571 |
|
USD | 21.996 | 22.140 |
|
THB | 683 | 690 |
|
CNY | 2.713 | 2.740 |