ສະຫວັນນະເຂດ ເປີດການສອບເສັງຊີງທຶນຮຽນຕໍ່ຢູ່ ສສ ຫວຽດນາມ

ພະແນກສຶກທິການ ແລະກິລາ ແຂວງສະຫວັນນະເຂດ ເປີດການສອບເສັງເອົາທຶນການສຶກສາສຳລັບນັກຮຽນຈົບຊັ້ນມັດທະຍົມສຶກສາຕອນປາຍ (ມ7) ໄປຮຽນຕໍ່ຢູ່ ສສ ຫວຽດນາມ ປະຈຳສົກຮຽນ 2023-2024ໃນສາຂາວິຊາຕ່າງໆ ໃນລະດັບຊັ້ນສູງ ແລະປະລິນຍາຕີ ຈຳນວນທັງໝົດ 89 ທຶນ. ເງື່ອນໄຂຜູ້ເຂົ້າຮ່ວມການສອບເສັງສໍາລັບສາຍທົ່ວໄປຕ້ອງໄດ້ຄະແນນສະເລ່ຍປະຈຳປີ ທຸກໆວິຊາຕັ້ງແຕ່ຊັ້ນມ5,ມ6 ແລະຄະແນນສອບເສັງມ.7ໄດ້ 7,00 ຂຶ້ນໄປ. ພິທີສອບເສັງໄດ້ຈັດຂຶ້ນໃນຕອນເຊົ້າຂອງວັນທີ 17 ສິງຫາ 2023 ນີ້ ທີ່ໂຮງຮຽນ ມ.ສ ສະຫວັນ ມີນັກສອບເສັງຈຳນວນ 119 ຄົນ, ຍິງ 69 ຄົນ.

ທ່ານ ພິມມະສອນ ວໍລະຍຸດ ຮອງຫົວໜ້າພະແນກສຶກສາທິການ ແລະກິລາແຂວງ ໃຫ້ຮູ້ວ່າ: ການສອບເສັງຄັ້ງນີ້ແມ່ນເປີດຢ່າງກວ້າງຂວາງເພື່ອຄັດເລືອກເອົານັກຮຽນທີ່ມີຄວາມຮູ້, ຄວາມສາມາດ ແລະ ມີພອນສະຫວັນ ແລະ ມີຄວາມຖືກຕ້ອງຕາມມາດຖານ ແລະເງື່ອນໄຂຂອງແຕ່ລະວິຊາຮຽນ, ເລັ່ງໃສ່ແຜນການກໍ່ສ້າງຊັບພະຍາກອນມະນຸດໃຫ້ມີຄຸນນະພາບໂດຍແທ້ຈິງ; ສຳລັບທຶນການສຶກສາໄປຮຽນຕໍ່ຢູ່ ສສ ຫວຽດນາມຄັ້ງນີ້ ແມ່ນຮຽນຢູ່ໃນ 05 ແຂວງຄື: ຢູ່ນະຄອນດານັງ ລະດັບປະລິນຍາຕີ 10 ທຶນ, ແຂວງເທື່ອທຽນເຫວ້ ປະລິນຍາຕີ 15 ທຶນ; ແຂວງຮ່າຕິງ ຊັ້ນສູງ-ປະລິນຍາຕີ 20 ທຶນ; ແຂວງເຫງ້ອານ ຊັ້ນສູງ-ປະລີນຍາຕີ15 ທຶນ; ແຂວງຖ່າຍຫງວຽນ ລະດັບຊັ້ນສູງ 25 ທຶນ ແລະຍັງມີທຶນຊ່ວຍເຫຼືອ 50%ທີ່ ນະຄອນດານັງໃນລະດັບປະລິນຍາຕີ ຈຳນວນ 04 ທຶນຕື່ມອີກ. ສຳລັບຜົນການສອບເສັງຄາດວ່າຈະປະກາດຜົນໃນອາທິດຕໍ່ໄປ.

แชร์