ອີໂບລາ ຂ້າຊີວິດຄົນກົງໂກ 100 ຄົນ

  ສະຖານະການການແພ່ລະ ບາດຂອງເຊື້ອອີໂບລາໃນກົງໂກ ຢູ່ໃນລະດັບວິກິດ ໂດຍມີຜູ້ເສຍ ຊີວິດເພີ່ມປະມານ 100 ຄົນ ພາຍ ໃນໄລຍະເວລາພຽງ 3 ອາທິດ.

ຕາມຂ່າວຕ່າງປະເທດລາຍ ງານໃນທ້າຍອາທິດທີ່ຜ່ານມາວ່າ ກະຊວງສາທາລະນະສຸກກົງໂກ ລາຍງານວ່າ ຈຳນວນຜູ້ເສຍຊີວິດ ຈາກເຊື້ອອີໂບລາທີ່ລະບາດຄັ້ງ ໃຫຍ່ໃນເດືອນສິງຫາປີທີ່ຜ່ານມາ ຢູ່ທີ່ 702 ຄົນ ຈາກຈຳນວນດັ່ງ ກ່າວປະມານ 100 ຄົນເປັນການ ເສຍຊີວິດພາຍໃນໄລຍະເວລາພຽງ 3 ອາທິດທີ່ຜ່ານມາ ສ່ວນຈຳນວນ ຄົນເຈັບສະສົມຢູ່ທີ່ຢ່າງໜ້ອຍ 1.117 ຄົນ ແຕ່ຈຳນວນນີ້ 339 ຄົນມີອາການດີຂຶ້ນແລ້ວ, ຢ່າງ ໃດກໍຕາມ ຍັງມີຄົນເຈັບທີ່ໜ້າສົ່ງໄສຕິດເຊື້ອອີໂບລາອີກຢ່າງໜ້ອຍ 295 ຄົນ. ຂະນະທີ່ອົງການອະນາ ໄມໂລກອອກລາຍງານໃນອາທິດ ທີ່ຜ່ານມາວ່າ ໄດ້ເລັ່ງແຈກຈ່າຍວັກແຊງເພີ່ມຕື່ມອີກ 95.000 ໂດສໃຫ້ກັບກົງໂກ ແລະຍອມຮັບວ່າການແພ່ລະບາດຂອງເຊື້ອອີ ໂບລາໃນກົງໂກຄັ້ງນີ້ມີຄວາມຮຸນ ແຮງຂຶ້ນກວ່າເກົ່າ.

ນອກຈາກນີ້ ສະຖານະການ ການແພ່ລະບາດຂອງເຊື້ອໄວຣັດ ອີໂບລາໃນກົງໂກຄັ້ງນີ້ຍັງເປັນ ການແພ່ລະບາດທີ່ແກ່ຍາວ ແລະມີ ຄວາມສ່ຽງສູງທີ່ຈະແພ່ລະບາດ ອອກນອກປະເທດ ເນື່ອງຈາກຄົນ ເຈັບແລະຜູ້ເສຍຊີວິດສ່ວນໃຫຍ່ ຢູ່ເມືອງເບນີ ໜຶ່ງໃນເມືອງໃຫຍ່ ຂອງແຂວງຄິວູເໜືອທີ່ມີປະຊາ ກອນຫຼາຍເຖິງ 8 ແສນຄົນ ແລະ ມີຊາຍແດນຕິດກັບອູກັນດາ.

 ນສພ ເສດຖະກິດ-ສັງຄົມ

แชร์