ເມືອງໄຊທານີ ກຽມຫັນວຽກງານບໍລິການ ເກັບມ້ຽນຂີ້ເຫຍື້ອເຂົ້າສູ່ລະບົບທັນສະໄໝ

ເມື່ອບໍ່ດົນຜ່ານມານີ້ ຫ້ອງການຄຸ້ມຄອງ ແລະບໍລິຫານຕົວເມືອງວຽງຈັນ (ຄບຕ) ຮ່ວມກັບ ເມືອງໄຊທານີ ອ້ອມຂ້າງເມືອງ 10 ໜ່ວຍ ຈັດກອງປະຊຸມການຫັນວຽກງານການບໍລິການ ແລະເກັບມ້ຽນຂີ້ເຫຍື້ອເຂົ້າສູ່ລະບົບທີ່ທັນສະໄໝ.

ເພື່ອຜັນຂະຫຍາຍວຽກງານການບໍລິການ ແລະເກັບມ້ຽນຂີ້ເຫຍື້ອຂອງທຸກບ້ານພາຍໃນເມືອງໄຊທານີໃຫ້ເຂົ້າສູ່ລະບົບທີ່ທັນສະໄຫມບໍ່ວ່າຈະເປັນການເກັບກຳປະລິມານຂີ້ເຫຍື້ອຂອງແຕ່ລະຄົວເຮືອ, ຖານຂໍ້ມູນຂອງປະຊາຊົນແຕ່ລະຄົວເຮືອນພາຍໃນເມືອງໄຊທານີໃຫ້ເຂົ້າມາໃນລະບົບທີ່ທັນສະໄຫມທັງໝົດ ແລະການຊໍາລະຄ່າບໍລິການການເກັບມ້ຽນຂີ້ເຫຍື້ອທາງບໍລິສັດສະມໍຣບີກໍໄດ້ພັດທະນາຮ່ວມກັບທະນາຄານການຄ້າຕ່າງປະເທດລາວເພື່ອຕອບສະໜອງຄວາມສະດວກແລະວ່ອງໄວໃຫ້ແກ່ປະຊາຊົນໂດຍການໃຫ້ມີການຊໍາລະຄ່າບໍລິການເກັບມ້ຽນຄ່າຂີ້ເຫຍື້ອໃນແອັບຂອງການຄ້າ BCEL ONE ແລະເປັນການແກ້ໄຂປະກົດການຫຍໍ້ທໍ້ຕ່າງໆເຊັ່ນ: ບັນຫາເລື່ອງຂີ້ເຫຍື້ອທີ່ຕົກຄ້າງຕ່າງໆໃຫ້ຫຼຸດລົງເທື່ອລະໜ້ອຍເພື່ອເປັນການສ້າງບ້ານອານາໄມເພື່ອໃຫ້ສອດຄ່ອງກັບ 6 ສ ໂດຍເປັນໂຄງການການພັດທະນາຮ່ວມມືກັບຫ້ອງການຄຸ້ມຄອງແລະບໍລິການຕົວເມືອງວຽງຈັນໂດຍອີງຕາມທິດຊີ້ນຳຈາກເຈົ້າຄອງນະຄອນຫຼວງ.

ໃນກອງປະຊຸມຍັງໄດ້ຜ່ານເອກະສານຂໍ້ຕົກລົງຂອງທ່ານເຈົ້າເມືອງ ເມືອງໄຊທານີວ່າດ້ວຍການແຕ່ງຕັ້ງຄະນະກຳມະການຜູ້ຊີ້ນຳລວມ ແລະຜູ້ປະສານງານກ່ຽວກັບວຽກງານຂີ້ເຫຍື້ອ ແລະເຜີຍແຜ່ຂໍ້ຕົກລົງວ່າດ້ວຍການແຕ່ງຕັ້ງຄະນະກຳມະການລະດັບຊາດເພື່ອການຫັນເປັນດິຈິຕອນຂອງ ສປປ ລາວ.

ຂ່າວ: ບຸນນິກ

แชร์