ດ່ານພາສີສາກົນດາກຕະອອກ ໃຫ້ບໍລິການວ່ອງໄວ ແລະຈັດເກັບລາຍຮັບໂປ່ງໃສ

ທ່ານ ແສງຕາວັນ ຫອມສົມບັດ ຫົວໜ້າດ່ານພາສີສາກົນດາກຕະອອກ ໃຫ້ຮູ້ວ່າ: ດ່ານສາກົນດາກຕະອອກໄດ້ປະກາດເປັນດ່ານສາກົນໃນປີ 2021 ຜ່ານມານີ້, ເຊິ່ງເປັນເຂດພູສູງມີປ່າໄມ້ຕືບໜາມີຊາຍແດນຕິດກັບດ່ານສາກົນນໍ້າຢາງ ແຂວງກວາງນາມ ສສ ຫວຽດນາມ, ພາຍໃນດ່ານປະກອບມີຢູ່ 4 ຂະແໜງການເປັນຕົ້ນ: ຂະແໜງຄຸ້ມຄອງດ່ານ-ບໍລິຫານດ່ານ; ຂະແໜງພາສີ; ຂະແໜງ ຕມ ດ່ານ; ຂະແໜງກັກກັນພືດ ແລະສັດ. ສຳລັບໂຄງປະກອບ ແລະດ້ານຈຳນວນພົນຂອງຂະແໜງພາສີ; ປະຈຳຢູ່ດ່ານມີທັງໝົດ 13 ສະຫາຍ, ຍິງ 4 ສະຫາຍ; ປະກອບມີ 3 ກຸ່ມວຽກຄື: ກຸ່ມວຽກບໍລິຫານຄວາມສ່ຽງ ແລະ ຄຸ້ມຄອງການແຈ້ງ; ກຸ່ມວຽກຄຸ້ມຄອງພາຫະນະ ແລະຜູ້ໂດຍສານ; ກຸ່ມວຽກວຽກງານສາງ ແລະກວດກາສິນຄ້າເຊິ່ງແຕ່ລະກຸ່ມໄດ້ແບ່ງຄວາມຮັບຜິດຊອບໃຫ້ພະນັກງານຢ່າງລະອຽດ, ເພື່ອອໍານວຍຄວາມສະດວກທາງດ້ານການຄ້າ, ການບໍລິການ, ໃຫ້ຄວາມສະດວກ, ບໍລິການວ່ອງໄວ, ການຈັດເກັບລາຍຮັບໃຫ້ໂປ່ງໃສ, ສາມາດກວດສອບໄດ້.

ໃນປີ 2023 ດ່ານດັ່ງກ່າວໄດ້ຮັບຕົວເລກແຜນການຈັດເກັບລາຍຮັບເຂົ້າງົບປະມານທັງໝົດ 9 ຕື້ກີບ, ຜ່ານການຈັດຕັ້ງປະຕິບັດຕົວຈິງ 6 ເດືອນຕົ້ນປີໄດ້ທັງໝົດ 5,9 ຕື້ກີບ ທຽບໃສ່ແຜນການ 6 ເດືອນຕົ້ນປີເທົ່າກັບ 105,8%, ຖ້າທຽບໃສ່ແຜນການປີເທົ່າກັບ 65,59%. ທັງນີ້, ກໍ່ຍ້ອນມີລະບຽບກົດໝາຍ ແລະ ນິຕິກໍາເປັນບ່ອນອີງໃນການຈັດຕັ້ງປະຕິບັດວຽກງານ, ຍ້ອມມີກົນໄກທາງດ້ານວຽກງານພາສີຫັນເຂົ້າສູ່ທັນສະໄໝ ແລະສາຍຕັ້ງສາຍຂວາງໃຫ້ທິດຊີ້ນໍາ, ລົງຕິດຕາມໃກ້ສິດຕິດແທດຢ່າງເປັນປົກະຕິ.

ສ່ວນລາຍຮັບຫຼັກໆໄດ້ຈາກຄ່າຊັກພິເສດ, ປະເພດເຄື່ອງກໍ່ສ້າງ, ເຄື່ອງອຸປະໂພກ-ບໍລິໂພກ, ຄ່າປັບໄໝ, ຄໍາທໍານຽມ ແລະອື່ນໆ. ນອກນີ້ ຍັງມີຖານລາຍຮັບຈາກການສິນຄ້ານໍາເຂົ້າ, ໄດ້ຈາກການເກັບຄ່າທໍານຽມພາຫະນະນຳເຂົ້າທ່ອງທ່ຽວຢ້ຽມຢາມ, ການເກັບຄ່າທໍານຽມພາຫະນະທີ່ຮັບໃຊ້ຂົນສົ່ງເຄື່ອງໂຄງການ, ການເສຍພາສີເຄື່ອງອຸປະໂພກບໍລິໂພກ, ເຄື່ອງກໍ່ສ້າງທີ່ຮັບໃຊ້ໂຄງການພັດທະນາພື້ນຖານໂຄງລ່າງທີ່ບໍ່ນອນຢູ່ໃນແຜນມາດສະເຕີລິດ (ທີ່ຍົກເວັ້ນພາສີອາກອນ), ໂຄງກາານເຄື່ອນໄຟຟ້າອີມູນ, ໂຄງການເຄື່ອນໄຟຟ້ານໍ້າພາກ, ໂຄງການເຄື່ອນໄຟຟ້າເຊຂະໝານ 03, ໂຄງການກໍ່ສ້າງກັງຫັນລົມ, ໂຄງການແຮ່ບົກສິດ, ສ່ວນຖານລາຍຮັບຂອງດ່ານ (ຂາອອກ) ສິນຄ້າສົ່ງອອກແມ່ນໄດ້ຈາກການເກັບຄ່າສັກພິເສດສົ່ງອອກ ປະເພດສິນຄ້າອຸດສາຫະກຳ ໄມ້ແປຮູບ, ເຄິ່ງສໍາເລັດຮູບຕາມການອະນຸຍາດຂອງຂະແໜງການອ້ອມຂ້າງແຂວງ ແລະແຈ້ງການສະບັບເລກທີ 5642/ກງ, ແຈ້ງການສະບັບເລກທີ 885/ຫສນຍ/0851/ອຄ ແລະ ອື່ນໆ.

ທ່ານ ແສງຕາວັນ ຫອມສົມບັດ ເນັ້ນຕື່ມອີກວ່າ: ສຳລັບທິດທາງແຜນການວຽກງານຕໍ່ໜ້າ 6 ເດືອນທ້າຍປີ, ຈະສຸມໃສ່ດ້ານແນວຄິດການເມືອງໃຫ້ອ້າຍນ້ອງພະນັກງານຢ່າງເປັນປົກກະຕິໃຫ້ມີຈັນຍາບັນຈັນຍາທໍາຕໍ່ການຈັດຕັ້ງປະຕິບັດໜ້າທີ່ວຽກງານ,ຊຸກຍູ້ຫົວໜ່ວຍທຸລະກິດ ແລະຜູ້ປະກອບການໃຫ້ມານໍາໃຊ້ບໍລິການໃຫ້ເພີ່ມຂຶ້ນ, ອໍານວຍຄວາມສະດວກທາງດ້ານການຄ້າ, ການບໍລິການ, ໃຫ້ຄວາມສະດວກ, ບໍລິການວ່ອງໄວ, ການຈັດເກັບລາຍຮັບໃຫ້ໂປ່ງໃສ, ສາມາດກວດສອບໄດ້, ຕ້ານສະກັດກັ້ນການລັກລອບໜີພາສີທຸກຮູບແບບພາຍໃນດ່ານ ແລະນອກດ່ານ, ລົງລາດຕະເວນຈຸດທີ່ມີຄວາມສ່ຽງທີ່ເຫັນວ່າມີການລັກລອບໜີພາສີ ແລະສຸມໃສບັນດາມາດຕະການຕ່າງໆໃນການຈັດເກັບລາຍຮັບໃຫ້ໄດ້ຕາມແຜນການທີ່ວາງໄວ້.
ທີ່ມາ: ກະຊວງການເງິນ

แชร์