ສປປ ລາວ ເປັນເຈົ້າພາບຈັດແຂ່ງຂັນລົດວິບາກ ຂ້າມປະເທດສົ່ງເສີມການທ່ອງທ່ຽວລາວ

ສປປ ລາວ ໄດ້ຮັບກຽດເປັນເຈົ້າພາບຈັດແຂ່ງຂັນລົດ ຮ່ວມລາຍການແຂ່ງຂັນລົດວິບາກຂ້າມປະເທດໃນທະວີບອາຊີ (ASIA CROSS COUNTRY RALLY) ຂຶ້ນເປັນຄັ້ງທໍາອິດ ໂດຍຈັດຢູ່ 2 ແຂວງ ຄື: ແຂວງຈໍາປາສັກ ແລະແຂວງອັດຕະປື ໃນລະຫວ່າງວັນທີ 17-19 ສິງຫາ 2023 ນີ້ ຊຶ່ງມີຂະບວນລົດຫລາຍກວ່າ 100 ຄັນ ແລະຜູ້ເຂົ້າຮ່ວມແຂ່ງຂັນຫລາຍກວ່າ 200 ຄົນ, ທີ່ມາຈາກຫລາຍກວ່າ 10 ປະເທດໃນອາຊີເຂົ້າຮ່ວມແຂ່ງຂັນ.

ການແຂ່ງຂັນດັ່ງກ່າວ ແບ່ງອອກເປັນ 3 ເສັ້ນທາງ ແລະ 3 ວັນຂອງການແຂ່ງຂັນ ຄື:
ວັນທີ 17 ສິງຫາ 2023, ແຂ່ງຂັນເສັ້ນທາງທີ 1 ຫຼື SS4: ທີ່ສາມແຍກບ້ານວັງເຕົ່າ, ເມືອງໂພນທອງ, ແຂວງຈໍາປາສັກ, ໄລຍະທາງ 150 Km, ໃຊ້ເວລາແຂ່ງຂັນປະມານ 5 ຊົ່ວໂມງ ແລະມີຈຸດເຂົ້າເສັ້ນໄຊທີ່ປາກທາງເຂົ້າບ້ານກ້ວຍ ເມືອງໂພນທອງ ແຂວງຈໍາປາສັກ.

ວັນທີ 18 ສິງຫາ 2023, ແຂ່ງຂັນເສັ້ນທາງທີ 2 ຫຼື SS5: ເລີ່ມຕົ້ນຈາກສາມແຍກບ້ານຫຼັກ 48, ເມືອງປະທຸມພອນ ແຂວງຈໍາປາສັກ ຜ່ານເຂົ້າເຂດເມືອງສະໜາມໄຊ ແຂວງອັດຈະປື ແລະກັບຄືນມາທີ່ເມືອງປາກຊ່ອງ, ໄລຍະທາງ 168 Km, ໃຊ້ເວລາປະມານ 5 ຊົ່ວໂມງ ແລະມີຈຸດເຂົ້າເສັ້ນໄຊທີ່ບ້ານກົງຕຸ່ນ, ເມືອງປາກຊ່ອງ ແຂວງຈຳປາສັກ.

ວັນທີ 19 ສິງຫາ 2023: ແຂ່ງຂັນເສັ້ນທາງທີ 3 ຫຼື SS6: ເລີ່ມຕົ້ນຈາກຈຸດປ່ອຍລົດ ບ້ານທາງແບ່ງ ເມືອງຈຳປາສັກ ແຂວງຈຳປາສັກ ແລະມີຈຸດເຂົ້າເສັ້ນໄຊ ທີ່ບ້ານຝັ່ງແດງ ເມືອງໂພນທອງ ໃນນີ້ມີລົດປະເພດລົດໃຫຍ່ວີບາກ ເເລະລົດຈັກວີບາກ.

ການແຂ່ງຂັນລາຍການ ASIA CROSS COUNTRY RALLY ຖືເປັນກິດຈະກໍາໜື່ງເພື່ອປະກອບສ່ວນໂຄສະນາ-ສົ່ງເສີມການທ່ອງທ່ຽວລາວໂດຍສະເພາະການໂຄສະນາປີທ່ອງທ່ຽວລາວ 2024 ທີ່ຈະມາເຖີງນີ້. ນອກຈາກນີ້ ຍັງເປັນການສ້າງຄວາມສາມັກຄີ ແລະ ແລກປ່ຽນບົດຮຽນລະຫວ່າງຜູ້ເຂົ້າຮ່ວມແຂ່ງຂັນດ້ວຍກັນໂດຍແມ່ນກົມໂຄສະນາການທ່ອງທ່ຽວ ກະຊວງຖະເເຫລງຂ່າວວັດທະນະທໍາ ເເລະທ່ອງທ່ຽວ ອົງການເເຂວງຈໍາປາສັກ ແລະອັດຕະປື ເເລະບໍລິສັດຄຣີນເເອັດເເວນເຈີ ຈຳກັດຜູ້ດຽວ ຮ່ວມກັນຈັດຂຶ້ນ.

ທີ່ມາ: ຂປລ

แชร์