ຍິງອາຍຸ 54 ປີ ຄ້າຢາບ້າເອົາເງິນມາໃຊ້ຈ່າຍພາຍໃນຄອບຄົວ

ເຈົ້າໜ້າທີ່ ປກສ ເມືອງໂພນໂຮງ ແຂວງວຽງຈັນ ຈັບເປົ້າໝາຍຢາເສບຕິດ ໄດ້ຊື່ນາງ ຍົນຄໍາ ອາຍຸ 54 ປີ ຢູ່ບ້ານໂພນສູງ ເມືອງໂພນໂຮງ ພ້ອມຂອງກາງ ຢາບ້າ 536 ເມັດ ໄປດຳເນີນຄະດີ ເມື່ອວັນທີ 20 ກໍລະກົດ 2023 ຜ່ານມາ.

ຜ່ານການສອບສວນ ນາງ ຍົນຄໍາ ຮັບສາລະພາບວ່າ: ໃນຄັ້ງວັນທີ 19 ກໍລະກົດ 2023,ໄດ້ໂທລະສັບສັ່ງຊື້ຢາບ້ານໍາຄົນຮູ້ຈັກ ຈໍານວນ 3 ຖົງ ເທົ່າກັບ 600 ເມັດ. ຫຼັງຈາກໄດ້ຢາບ້າມາແລ້ວ, ກໍເອົາໄປຂາຍໃຫ້ກັບກຸ່ມມົ້ວສຸມຢາເສບຕິດຢູ່ພາຍໃນບ້ານ ແລະບ້ານໃກ້ຄຽງ, ເຊິ່ງຍັງເຫຼືອ ຈຳນວນ 536 ເມັດ.ມື້ຕໍ່ມາ, ກໍຖືກຈັບພ້ອມຂອງກາງຈຳນວນດັ່ງກ່າວໄປດຳເນີນຄະດີຕາມກົດໝາຍ.

ຜູ້ຖືກຫາຍັງສາລະພາບອີກວ່າ: ນັບແຕ່ເດືອນກໍລະກົດ 2022 ເປັນຕົ້ນມາໄດ້ເຄື່ອນໄຫວຊື້-ຂາຍຢາບ້າ ມາແລ້ວຫຼາຍຄັ້ງ, ຊື້ຄັ້ງລະ 2-5 ຖົງ (ຖົງລະ 200 ເມັດ), ສ່ວນເງິນໄດ້ຈາກຂາຍຢາບ້າ ແມ່ນເອົາມາໃຊ້ຈ່າຍພາຍໃນຄອບຄົວ.

แชร์