ເປີດເປັນທາງການສາຍການບິນ ວຽງຈັນ-ບາງກອກ ວັນລະ 2 ຖ້ຽວ

ບໍລິສັດ ການບິນໄທ ຈຳກັດ (ມາຫາຊົນ) ໄດ້ຈັດພິທີເປີດຖ້ຽວບິນປະຖົມມະເລີກ ເສັ້ນທາງ ລະຫວ່າງ ວຽງຈັນ-ບາງກອກ ໃນວັນທີ 15 ສິງຫາ 2023 ທີ່ສະໝາມບິນສາກົນວັດໄຕ, ນະຄອນຫລວງວຽງຈັນ ສປປ ລາວ ໂດຍມີທ່ານ ແສງສະຫງວນ ຈັນທະວົງ ຮອງຫົວໜ້າກົມການບິນພົນລະເຮືອນ ສປປ ລາວ, ທ່ານ ນາງ ມໍລະກົດ ສີສະຫວັດ ເອກອັກຄະລາດຊະທູດແຫ່ງຣາຊະອານາຈັກໄທ ປະຈຳ ສປປ ລາວ, ທ່ານ ອາລຸນ ຈັນໃສ ຜູ້ອຳນວຍການທົ່ວໄປ L-JATS, ທ່ານ ຄຳສິດ ສີພັນດອນ ຫົວໜ້າຕຳຫຼວດກວດຄົນເຂົ້າເມືອງປະຈຳສະໝາມບິນສາກົນວັດໄຕ, ທ່ານ ຄຳແຕນ ແສນມຸດທະລາດ ຫົວໜ້າພາສີປະຈຳສະໝາມບິນສາກົນວັດໄຕ, ທ່ານ ນາງ ຈັນທະລີ ຈັນທະລາວັນ ຜູ້ອຳນວຍການ ບໍລິສັດ Joy Travel ຜູ້ຕາງໜ້າບໍລິສັດການບິນໄທ ຈຳກັດ (ມະຫາຊົນ), ຜູ້ແທນຈາກໜ່ວຍງານພາກລັດ ແລະເອກະຊົນ ເຂົ້າຮ່ວມພິທີ.

ທ່ານ ວິດ ກິດຈາທອນ ຜູ້ອຳນວຍການຝ່າຍຂາຍບໍລິສັດການບິນໄທ ຈຳກັດ (ມາຫາຊົນ) ກ່າວວ່າ: ສືບເນື່ອງມາຈາກການແຜ່ລະບາດຂອງເຊື້ອໄວຣັສ ໂຄວິດ-19 ໃນເດືອນມີນາ 2020 ສົ່ງຜົນກະທົບໃຫ້ບໍລິສັດຈຳເປັນຕ້ອງຫຍຸດໃຫ້ບໍລິການຂົນສົ່ງຜູ້ໂດຍສານ ແລະ ສິນຄ້າທາງອາກາດ ລະຫວ່າງ ວຽງຈັນ-ບາງກອກ ເມື່ອສະຖານະການແຜ່ລະບາດເລີ່ມລົດລົງປະກອບກັບມາດຕະການ ການເດີນທາງລະຫວ່າງປະເທດເລີ່ມຜ່ອນຄາຍຫລາຍຂຶ້ນບໍລິສັດຈຶ່ງໄດ້ໃຫ້ສາຍການບິນ ໄທສະມາຍ ຊຶ່ງຢູ່ໃນເຄືອຂອງການບິນໄທມາໃຫ້ບໍລິການແທນໃນເສັ້ນທາງນີ້ເພື່ອໃຫ້ການບໍລິຫານທຸລະກິດດ້ານການບິນຂອງບໍລິສັດມີປະສິດຕິພາບສູງຂຶ້ນ ຝ່າຍບໍລິຫານຈຶ່ງໄດ້ມີຄຳເຫັນໃຫ້ມີການປັບໂຄງສ້າງທຸລະກິດໂດຍລວບລວມສາຍການບິນໄທ ແລະໄທສະມາຍເພື່ອການບໍລິການທີ່ດີສ້າງຄວາມປະທັບໃຈ ແລະໃຫ້ປະສົບການການເດີນທາງເປັນທີ່ໜ້າຈົດຈຳ.

ນັບຕັ້ງແຕ່ວັນທີ 15 ສິງຫາ 2023 ເປັນຕົ້ນໄປສາຍການບິນໄທເປີດໃຫ້ບໍລິການລະຫວ່າງ ວຽງຈັນ-ບາງກອກ ວັນລະ 2 ຖ້ຽວບິນ ຫຼື 14 ຖ້ຽວບິນຕໍ່ໜຶ່ງອາທິດໂດຍສາມາດຈອງບ່ອນນັ່ງ ແລະຊື້ບັດໂດຍສານໄດ້ທີ່ຕົວແທນຈຳໜ່າຍບັດໂດຍສານຂອງການບິນໄທ ຫຼືເວັບໄຊ www.thaiairways.com

แชร์