6 ເດືອນ ຫ້ອງການ-ການເງິນເມືອງລະມາມ ເກັບລາຍຮັບໄດ້ 15,39 ຕື້ກີບ

ທ່ານ ຄໍາປານ ພິມມະເສນ ວ່າການຫົວໜ້າຫ້ອງການ-ການເງິນເມືອງລະມາມ ແຂວງເຊກອງ ໃຫ້ສຳພາດວ່າ: ການຈັດຕັ້ງປະຕິບັດມາດຕະການຈັດເກັບລາຍຮັບ 06 ເດືອນຕົ້ນປີ 2023 ສາມາດປະຕິບັດໄດ້ທັງໝົດ 15,39 ຕື້ກີບ ໃນນັ້ນ ລາຍຮັບຈາກແຂວງດຸ່ນດ່ຽງຈໍານວນ 12,23 ຕື້ກີບ ເທົ່າກັບ 47% ຂອງແຜນການປີ ແລະ ລາຍຮັບປົກກະຕິຂອງເມືອງ 3,16 ຕື້ກີບເທົ່າກັບ 41% ຂອງແຜນການປີ, ສົມທຽບໃສ່ໄລຍະດຽວເພີ່ມຂຶ້ນ 123% ເນື່ອງມາຈາກວ່າການຫັນຄຸ້ມຄອງເກັບລາຍຮັບຜ່ານລະບົບເຄື່ອງມືທັນສະໄໝຕິດພັນກັບການອັດຊ່ອງຫວ່າງການຮົ່ວໄຫຼຂອງ ງົບປະມານຕາມຄໍາສັ່ງວ່າດ້ວຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ ສະບັບເລກທີ 18/ນຍ; ສໍາລັບການຈັດເກັບພາສີທີ່ດິນກໍເຫັນວ່າມີລັກສະນະເພີ່ມຂຶ້ນເຊັ່ນດຽວກັນສົມທຽບໃສ່ໃນໄລຍະດຽວປີຜ່ານມາເຫັນວ່າເພີ່ມຂຶ້ນ 25% ໃນນັ້ນ ມີ 01 ບ້ານຈັດເກັບລາຍຮັບໄດ້ຕາມແຜນການ, ມີ 07 ບ້ານປະຕິບັດໄດ້ລື່ນແຜນການ, ມີ 18 ບ້ານເກັບລາຍຮັບເກີນ 50% ແຕ່ຍັງມີບາງບ້ານຈໍານວນໜຶ່ງເກັບລາຍຮັບຍັງຕໍ່າບໍ່ເກີນ 30% ຂອງແຜນການປີ.

ດ້ານລາຍຈ່າຍໃນ 6 ເດືອນຕົ້ນປີ 2023 ສາມາດປະຕິບັດໄດ້ທັງໝົດ 14,79 ຕື້ກີບເທົ່າກັບ 44% ຂອງແຜນການປີ ໃນນັ້ນໄດ້ສຸມໃສ່ການເບີກຈ່າຍເງິນເດືອນ, ເງິນອຸດໜູນ, ເງິນນະໂຍບາຍຕ່າງໆເປັນບຸລິມະສິດ. ນອກນັ້ນແມ່ນສຸມໃສ່ພ້ອມທັງຮັບປະກັນລາຍຈ່າຍບໍລິຫານຂອງພັກ-ລັດທີ່ຈຳເປັນ ແລະຮີບດ່ວນຂອງເມືອງ.
ທ່ານກ່າວຕື່ມອີກວ່າ: ຄຽງຄູ່ກັບດ້ານຕັ້ງໜ້າແຕ່ຍັງມີສິ່ງທ້າທາຍຫຼາຍດ້ານທີ່ສົ່ງຜົນກະທົບຕໍ່ກັບການຈັດຕັ້ງປະຕິບັດແຜນງົບປະມານແຫ່ງລັດໃນ 6 ເດືອນທ້າຍປີ 2023 ເຖິງແມ່ນວ່າຈະມີລາຍຮັບໃໝ່ທີ່ເກີດຂຶ້ນກໍຕາມແຕ່ກໍ່ເປັນຖານຂໍ້ມູນທີ່ບໍ່ແນ່ນອນຍັງເປັນອຸປະສັກໃນການກໍານົດຖານຂໍ້ມູນໃນຕໍ່ໜ້າໂດຍຕິດພັນກັບການວາງຄາດໝາຍສູ້ຊົນໃນປີຕໍ່ໄປອີງຕາມທິດຂອງຂັ້ນເທິງອະນຸຍາດ; ການຈັດເກັບພາສີທີ່ດິນໃນຂອດການຈັດຕັ້ງປະຕິບັດຕົວຈິງກັບບ້ານຍັງມີຄວາມຫຍຸ້ງຍາກຍ້ອນຂໍ້ມູນຕອນດິນຍັງບໍ່ຊັດເຈນ; ການໂຄສະນາເຜີຍແຜ່ປຸກລະດົມ, ບຸກຄົນ, ນິຕິບຸກຄົນ, ການຈັດຕັ້ງໃນການປະຕິບັດການແຈ້ງ-ມອບພັນທະຜ່ານລະບົບ TAXRIS ຍັງບໍ່ທັນກວ້າງຂວາງ; ການປະສານສົມທົບກັບພາກສ່ວນທີ່ກ່ຽວຂ້ອງຍັງພົບພໍ້ຄວາມຫຍຸ້ງຍາກໂດຍສະເພາະດ້ານຂໍ້ມູນຍັງບໍ່ຊັດເຈນ; ສ່ວນດ້ານລາຍຈ່າຍງົບປະມານແຫ່ງລັດແມ່ນໄດ້ຮັບຜົນກະທົບຈາກອັດຕາແລກປ່ຽນ ແລະໄພເງິນເຟີ້ເຊິ່ງໄດ້ສ້າງຜົນກະທົບໂດຍກົງຕໍ່ການຄິດໄລ່ຄ່າໃຊ້ຈ່າຍບໍລິຫານລັດເປັນຕົ້ນ: ນໍ້າມັນເຊື້ອໄຟ, ເຄື່ອງໃຊ້ຫ້ອງການ ແລະອື່ນໆ.

ສະນັ້ນ, ເພື່ອເຮັດໃຫ້ການຈັດຕັ້ງປະຕິບັດລາຍຮັບໃຫ້ບັນລຸຄາດໝາຍ ແລະລື່ນຄາດໝາຍຂອງຫ້ອງການ–ການເງິນ, ຈະໄດ້ສູ້ຊົນການຈັດຕັ້ງປະຕິບັດບັນດາມາດຕະການ ແລະ ຄາດໝາຍທີ່ໄດ້ກຳນົດຕິດພັນກັບວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ໂດຍສຸມໃສ່ວຽກຈຸດສຸມດ້ານລາຍຮັບ, ດ້ານລາຍຈ່າຍ, ການດຸ່ນດ່ຽງ ແລະ ສືບຕໍ່ປະສານສົມທົບຢ່າງກົມກຽວກັບພະແນກການເງິນ, ເພື່ອຕອບສະໜອງຕາມແຜນ ການຂາດດູນຕົວຈິງຂອງເມືອງໃຫ້ທັນຕາມກໍານົດເວລາ ແລະ ບັນດາມາດຕະການຈຸດສຸມຕົ້ນຕໍຈໍານວນໜຶ່ງເຊັ່ນ: ສືບຕໍ່ຂະຫຍາຍຖານລາຍຮັບດ້ວຍການຫັນບັນດາຫົວໜ່ວຍທຸລະກິດທີ່ບໍ່ແມ່ນຈຸນລະວິສາຫະກິດແຕ່ຍັງເສຍອາກອນແບບມອບເໝົາ ໃຫ້ເຂົ້າສູ່ລະບົບອາກອນມູນຄ່າເພີ່ມ ແລະປະຕິບັດຕາມກົດໝາຍວ່າດ້ວຍອາກອນມູນຄ່າເພີ່ມໃຫ້ຖືກຕ້ອງ; ສືບຕໍ່ຊຸກຍູ້ໃຫ້ຜູ້ເສຍອາກອນມາແຈ້ງມອບອາກອນດ້ວຍຕົນເອງຜ່ານລະບົບທັນສະໄໝຫຼາຍຂຶ້ນ ແລະຂະຫຍາຍຖານລາຍຮັບດ້ວຍການຫັນບັນດາຫົວໜ່ວຍທຸລະກິດເຂົ້າສູ່ລະບົບອາກອນມູນຄ່າເພີ່ມໃຫ້ຖືກຕ້ອງ, ໂປ່ງໃສ ແລະເຂັ້ມງວດປະຕິບັດຕາມກົດໝາຍວ່າດ້ວຍອາກອນມູນຄ່າເພີ່ມນຳຫົວໜ່ວຍທຸລະກິດທີ່ມີເງື່ອນໄຂ; ສືບຕໍ່ປະຕິບັດການນໍາເອົາລາຍຮັບຈາກຊັບສິນ ແລະ ການຂາຍເຄື່ອງຮີບທີ່ສານຕັດສິນເປັນຂອງລັດໃຫ້ຄົບຖ້ວນ ແລະ ຖືກຕ້ອງຕາມກົດໝາຍ; ຖືເອົາການປະຕິບັດລາຍຈ່າຍເງິນເດືອນ ແລະເງິນອຸດໜູນ, ເງິນນະໂຍບາຍ ແລະ ຊ່ວຍໜູນຕ່າງໆເປັນບຸລິມະສິດໂດຍໃຫ້ບັນດາຫ້ອງການອ້ອມຂ້າງເມືອງ, ສ້າງແຜນລາຍຈ່າຍໃຫ້ສອດຄ່ອງກັບສະພາບຄວາມ ເປັນຈິງ, ເພື່ອຮັບປະກັນການຈັດຕັ້ງປະຕິບັດລາຍຈ່າຍໃຫ້ເປັນປົກກະຕິ ແລະ ຕໍ່ເນື່ອງ; ເອົາໃຈໃສ່ຈັດຕັ້ງປະຕິບັດແຈ້ງການຂອງສຳນັກງານນາຍົກລັດຖະມົນຕີ ສະບັບເລກທີ529/ຫສນຍ,ລົງ ວັນທີ 29 ມີນາ 2023 ທິດຊີ້ນຳກ່ຽວກັບກົນໄກການນໍາໃຊ້ບ້ວງເງິນເກີນແຜນປີ 2022 ແລະ ປະຕິບັດຄຳແນະນຳຂອງກະຊວງການເງິນ ສະບັບເລກທີ 0888/ກງ, ລົງວັນທີ 30 ມີນາ 2023 ວ່າດ້ວຍການສ້າງແຜນງົບປະມານແຫ່ງລັດ ປະຈໍາປີ 2024. ສ່ວນວຽກງານການດູ່ນດ່ຽງຈະໄດ້ສືບຕໍ່ປະສານສົມທົບຢ່າງກົມກຽວກັບພະແນກການເງິນ (ຂະແໜງງົບປະມານແຫ່ງລັດ) ເພື່ອຕອບສະໜອງຕາມແຜນການຂາດດູນຕົວຈິງຂອງເມືອງໃຫ້ຖ່ວງທັນຕາມກໍານົດເວລາ.
ທີ່ມາ: ກະຊວງການເງິນ

แชร์