ອຸດົມໄຊ ໄດ້ຮັບຜົນເສຍຫາຍ ຈາກໄພພິບັດ 1,6 ຕື້ກວ່າກີບ

ໃນໄລຍະ 6 ເດືອນຕົ້ນປີ 2023 ນີ້, ແຂວງອຸດົມໄຊ ປະສົບກັບບັນຫາໄພພິບັດຕ່າງໆ ໂດຍສະເພາະໄພແຫ້ງແລ້ງ, ລົມພະຍຸ ແລະອັກຄີໄພ ເຊິ່ງໄດ້ສ້າງຄວາມເສຍຫາຍ ຢ່າງມະຫາສານເປັນຕົ້ນທີ່ພັກອາໄສ ແລະພື້ນທີ່ທຳການຜະລິດ ໂດຍຄະນະກຳມະການ ແລະ ກອງເລຂາຄຸ້ມຄອງໄພພິບັດຂັ້ນແຂວງ ແລະເມືອງ ໄດ້ລົງເກັບກຳຂໍ້ມູນ ມີເມືອງທີ່ໄດ້ຮັບຜົນເສຍຫາຍ 7 ເມືອງ, 17 ບ້ານ, 132 ຄອບຄົວ ແລະພົນລະເມືອງ ຈໍານວນ 768 ຄົນ, ເສຍຊີວິດ 2 ຄົນ. ຄາດຄະເນ ມູນຄ່າເສຍຫາຍ 1,6 ຕື້ກວ່າກີບ. ພ້ອມທັງໃຫ້ການຊ່ວຍເຫລືອສຸກເສີນໃຫ້ແກ່ປະຊາຊົນທີ່ໄດ້ຮັບຜົນກະທົບຢ່າງທັນການແນໃສ່ເຮັດໃຫ້ຊີວິດການເປັນຢູ່ຂອງເຂົາເຈົ້າກັບຄືນສູ່ສະພາບປົກກະຕິໂດຍໄວ ແລະໄດ້ສືບຕໍ່ໃຫ້ການຊ່ວຍເຫລືອ ແລະຟື້ນຟູຊີວິດການເປັນຢູ່ຫລັງໄພພິບັດຕື່ມອີກ.

ສ່ວນວຽກງານກອງທຶນຄຸ້ມຄອງໄພພິບັດ ໃນໄລຍະ 6 ເດືອນຜ່ານມາ ໄດ້ມີການເຄື່ອນໄຫວຢ່າງເປັນປົກກະຕິໂດຍສະເພາະດ້ານລາຍຮັບແມ່ນໄດ້ຮັບຈາກບັນດາພະແນກການ ແລະຂະແໜງການກ່ຽວຂ້ອງຂັ້ນແຂວງ ຈຳນວນ 200 ລ້ານກວ່າກີບ, ຂັ້ນເມືອງ 170 ລ້ານກວ່າກີບ ບວກກັບຍອດຍົກມາ ໃນປີ 2022 ຈຳນວນ 1,3 ຕື້ກວ່າກີບ,ລວມເປັນເງິນທັງໝົດ 1,7 ຕື້ກວ່າກີບ ໃນນີ້ໄດ້ນໍາໃຊ້ເຂົ້າໃນການຊ່ວຍເຫລືອຜູ້ທີ່ໄດ້ຮັບຜົນກະທົບຈາກໄພພິບັດ ແລະວຽກງານອື່ນໆ ໃນເບື້ອງຕົ້ນແລ້ວຈຳນວນໜຶ່ງ.

ຂໍ້ມູນດັ່ງກ່າວໄດ້ຮັບການລາຍງານໃນກອງປະຊຸມສະຫລຸບວຽກງານໄພພິບັດ ແລະວຽກງານກອງທຶນຄຸ້ມຄອງໄພພິບັດ ແລະສັງຄົມສົງເຄາະ ປະຈຳ 6 ເດືອນຕົ້ນປີ ແລະກຳນົດທິດທາງແຜນການ 6 ເດືອນທ້າຍປີ 2023 ຂອງແຂວງອຸດົມໄຊທີ່ຈັດຂຶ້ນເມື່ອບໍ່ດົນຜ່ານມາ.

แชร์